Yiib 6

Wina'am kaanb ye o na faaɛn Israel dim

1Ka Zugsɔb yɛl Moses ye, “Nannanna fʋ na nyɛ mam na maal Faaro si'em. Mam mɔr paŋ tita'ar la zug, o na kɛ ka ba yi, asida mam mɔr paŋ tita'ar la zug, o na kadi ba yis o teŋin la.”

2Ka Wina'am lɛn yɛl Moses ye, “Manɛ an Zugsɔb la. 3M da nɔki m mɛŋi pa'al Abraham, nɛ Isaak, nɛ Jakob ye manɛ an Wina'am Onɛ Galis la, amaa m daa pʋ nie m yʋ'ʋr kanɛ buon ‘Zugsɔb’ la pa'ali baa. 4M lɛn kaanb ye m na tisi ba Keenan teŋ la, teŋ kanɛ ka ba da bɛ ka an saam la. 5M mɛ lɛn wʋm Israel dim banɛ ka Egipt dim namisidi ba la fabʋlʋg, ka tiɛn man da maal nɔnaar nɛ ba la yɛla. 6Dinzugɔ, yɛlim Israel dim la ye, ‘Manɛ an Zugsɔb la, ka m na mɔri ya yis Egipt dim namisʋg pʋʋgin. 7M na nɔki ya ka ya aan m mɛŋ nidib, ka m na aan ya Wina'am; ka ya na baŋ ye manɛ an Zugsɔb Wina'am onɛ mɔri ya yi Egipt dim namisʋgʋn la. 8M na mɔri ya keŋ teŋ kanɛ ka m kaanbi tis Abraham, nɛ Isaak, nɛ Jakob la, ka nɔki tisi ya ka li aan ya bʋn. Manɛ an Zugsɔb la.’” 9Ka Moses pian' ala tis Israel dim la, ka ba pʋ siak Moses nɔɔrɛ, bɔzugɔ ba sʋnf da digilimnɛ ba tʋʋm kpi'ema la zug.

10Ka Zugsɔb pian' tis Moses ye, 11“Kem yɛl Egipt Na'ab Faaro ye o kɛ ka Israel dim la yii o teŋin la!” 12Ka Moses yɛl Zugsɔb ye, “Israel dim la ya'a pʋ siak mam nɔɔrɛ, Na'ab Faaro na niŋ wala wʋm tisi ma, ka m mɛ pʋ tun'e pian'ad la?” 13Ka Zugsɔb pian' tis Moses nɛ Aaron ye, “M bɔɔd ye ya mɔr Israel dim la yi Egipt teŋin la. Kem yɛli Israel dim nɛ Egipt Na'ab Faaro nɛ'ɛŋa.”

Moses tuŋ yɛla

14Banɛ da an Israel dim dɔɔd kpɛɛmnam la yʋda nwa': Israel bikpɛŋ Reuben biis da anɛ Hanok nɛ Pallu nɛ Heziron nɛ Karmi. Bama da an Reuben dɔɔg dim. 15Simeon dɔɔg dimi nwa': Jemuel nɛ Jamin nɛ Ohad nɛ Jakin nɛ Zohar, nɛ Sauul onɛ maa da an Keenan nid la. Bama an Simeon dɔɔg dim. 16#Kal 3:17-20; 26:57-58; 1Yɛ 6:16-19 Ka Levi dɔɔg dim mɛ da an; Gerson nɛ Kohat nɛ Merari: Levi da anɛ yʋma kɔbiga nɛ pistan' nɛ ayɔpɔi (137) ka naan kpi. 17Ka Gerson tuŋ dim mɛ an Libni nɛ Simie. 18Kohat tuŋ dim mɛ da anɛ Amram nɛ Izar nɛ Hebron nɛ Uziel. Kohat da anɛ yʋma kɔbiga nɛ pistan' nɛ atan' (133) ka naan kpi. 19Merari tuŋ dim mɛ da anɛ Mahili nɛ Musi. Bama da an Levi dɔɔg la dim.

20Ka Amram da nɔknɛ o saam taʋn Jokɛbɛd ka o lieb o pu'a, ka ba du'a biis ayi' ka ba pʋd o ba yʋda ye Aaron nɛ Moses. Amram da anɛ yʋma kɔbiga nɛ pistan' nɛ ayɔpɔi (137) ka naan kpi. 21Izar tuŋ dim da anɛ Kora nɛ Nefeg nɛ Zikir. 22Ka Uziel tuŋ dim an Misael nɛ Elizafan nɛ Sitri.

23Aaron da nɔknɛ Eliseba, Aminadab bipuŋ onɛ an Nason taʋn la, ka o lieb o pu'a, ka ba du'a Nadab nɛ Abihu nɛ Eleazar nɛ Itamar. 24Ka Kora tuŋ dim mɛ an Asir nɛ Elkana nɛ Abiasaf. Bama an Kora tuŋ dim. 25Eleazar onɛ an Aaron biig la da nɔk Putiel bipuŋ yinne ka o lieb o pu'a, ka ba du'a Finehas.

Bama da an Levi Dɔɔg Dim la. 26Li anɛ Aaron nɛ Moses kaŋa ka Zugsɔb da yɛli ba ye, “Yisimi Israel dim la ka ba dɔl taaba dɔɔg-dɔɔg yi Egipt teŋin na.” 27Li da anɛ Moses nɛ Aaron n pian' tis Egipt Na'ab Faaro ye o yis Israel dim teŋin la.

Aaron di'es Moses pian'ad

28Ka Zugsɔb la da pian' tis Moses Egipt teŋin la, 29o da yɛl Moses ye, “Manɛ an Zugsɔb la. Yɛlim Egipt Na'ab Faaro man yɛlif si'el la wʋsa.” 30Amaa ka Moses yɛl Zugsɔb ye, “Mam pʋ tun'e pian'ada, ka Na'ab Faaro ye o niŋ wala wʋm tis mam?”

Currently Selected:

Yiib 6: kus_gh

Highlight

Copy

Compare