Yiib 2

Moses du'am yɛla

1Saŋkan la ka Levi dau di Levi dɔɔg pu'asadir 2ka o pu'a la nɔk pʋʋgʋ du'a biribiŋ. Ka on nyɛ ka o an vɛnliŋ la, o da nɔk o su'a nwadis atan'. 3Amaa on da gɔs ka o kʋ lɛn nyaŋi su'a biig la, o da nɔk nɛ pɛog, ka nɔk kotaali bʋligi li. Ka nɔk biig la niŋ pɛog la pʋʋgin ka keŋ digil o Nail mu'ar nɔɔrin mɔɔd sʋʋgin. 4Ka biig la taʋn zi'e lalli ka gɔsid dinɛ na maal o.

5Ka Na'ab Faaro bipuŋ sɔ' da sig mu'arin la ye o sʋ, ka banɛ gɔsid na'abiig la dɔl o dɛn'ɛnid mu'ar la nɔɔr. Ka o nyɛ ka pɛog bɛ mɔɔdin la ka o tʋm pu'asada banɛ gɔsid o la yinne ye o nɔk na. 6Ka Na'abiig la pibigi li ka nyɛ bilia ka o kaasid, ka o zɔ biig la nimbaanlig, ka yɛl ye, “Bikaŋa anɛ Hibiru dim biig yinne.” 7Ka biig la taʋn bu'os Na'ab Faaro bipuŋ la ye, “M keŋ bɔ Hibiru dim pu'ab la yinne na ka o ugus biig la tisi fɔɔ?” 8Ka o lɛbis o ye, “Ɛɛn, kem!” Ka biig la keŋ mɔr bilia la ma na. 9Ka Faaro bipuŋ la yɛl o ye o nɔkim biig la ugusi tis o, ka o na yɔɔ o. Ka pu'a la nɔk biig la ugus o. 10Ka biig la nɔbig, ka o mɔr o keŋ tis Na'ab Faaro bipuŋ la ka o lieb o biig. Ka o pʋd biig la yʋ'ʋr ye Moses.#2:10 Hibiru pian'adin la, li gbin anɛ, ‘M yaae o nɛ ku'omin’.

Moses zɔɔ keŋ Midian teŋin

11Moses n da nɔbig la, daar yinne ka o yii keŋ o nidibin la ka nyɛ ban namisidi ba si'em ba tʋʋma ni la. Ka mɛ nyɛ Egipt nid ka o bʋ'ʋd Hibiru dau sɔ' onɛ an Moses nidib la yinne. 12Ka o gɔsi gɔs ka pʋ nyɛ sɔ' anina babaa, ka o nwɛ' Egipt nid la kʋʋ mum titanbin'isi ni. 13Ka li yimbɛog ka o lɛn yi ka nyɛ ka Hibiru nidib ayi' zabid nɛ taaba ka o bu'os onɛ tʋm taal la ye, “Bɔɔ maal ka fʋ nwɛ'ɛdi fʋ mabiig onɛ an Hibiru nida?” 14Ka dau la yɛl o ye, “Anɔ'ɔnɛ gaŋif ye fʋ an sariakat tinam sʋʋginɛ? Fʋ bɔɔd ye fʋ kʋ mam wʋʋ fʋn sa kʋ Egipt nid si'em laa?” Anina ka Moses ya'am iank ka o tɛn'ɛs ye, “Mam sa tʋm si'el la, nidib baŋ ya!” 15Ka Na'ab Faaro wʋm ka bɔɔd ye o kʋ Moses ka o baŋ ka zɔɔ yi Faaro san'an keŋ bɛ Midian teŋin zin' kpi'e nɛ bulig.

16Ka maanmaan sɔ' bɛ Midian teŋin ka mɔr pu'ayuos ayɔpɔi, ka ba keŋ buligin la ye ba wik ku'om tisi ba saam kɔnbid. 17Ka kɔnbkem sieba kena kadi ba, amaa ka Moses sʋŋi ba ka ba paam ku'om nulis kɔnbid la. 18Ka pu'asada la lɛbi ba saam san'an ka pʋ yuug la, ka o bu'osi ba ye, “Bɔɔ maal ka ya pʋ yuug zina?” 19Ka ba lɛbis ye, “Egipt dau sɔ' sʋŋi ti ka kɔnbkemnib la pʋ daami tii. O la'am wik nɛ ku'om la sʋŋi ti ka ti nulis kɔnbid la.” 20Ka o bu'osi ba ye, “Ka o bɛ yaanɛ? Ka bɔ ka ya bas o ani? Kem buol o nɛ o na ka o paam si'eli di.” 21Ka Moses siak ye o na bɛ dau la yin; ka dau la nɔk o bipuŋ Zippora tis Moses ka o lieb o pu'a. 22Ka Zippora du'a biribiŋ ka Moses pʋd o yʋ'ʋr ye, Gersom, ka li pa'al ye, “M anɛ saan teŋzʋŋin.”

23Li da yuug ya hali ka Egipt Na'ab Faaro kpi. Ka Israel dim la paam namisʋg hali, ka kaasidi bɔɔd sʋŋir, bɔzugɔ ba da anɛ sankpan'asnam teŋ la ni, ka ba kaasig la paae Wina'am san'an. 24#Pin 15:13-14 Ka Wina'am wʋmi ba kaasig, ka tiɛn on da kaanbi zi'el Abraham nɛ Isaak nɛ Jakob la. 25Ka Wina'am gɔs Israel dim la ka zɔɔ ba nimbaanlig.

Currently Selected:

Yiib 2: kus_gh

Highlight

Copy

Compare