Yiib 1
1
Jakob biis yʋda
(Pin 46:8-27)
1Jakob biribis nɛ ba yidim banɛ da dɔlli ba saam onɛ yʋ'ʋri mɛ da an Israel keŋ Egipt la yʋda nwa': 2Reuben nɛ Simeon nɛ Levi nɛ Juda 3nɛ Isaka nɛ Zebulun nɛ Benjamin 4nɛ Dan nɛ Naftali nɛ Gad nɛ Aser. 5Banɛ wʋsa da yii keŋ nɛ Jakob la da anɛ pisyɔpɔi, ka Josef on pʋn bɛ Egipt sa.
6Ka li nya'aŋ ka Josef nɛ o bieyanam la da kpi, ban nɛ zʋmaʋŋ kan la nidib wʋsa.
Egipt na'apaalli da namis Israel dim la yɛla
7Israel nidib da nɔbigid hali nɛ du'am pʋʋgin, ka mɔr paŋ ka zu'oe pɛ'ɛl teŋ la wʋsa. 8Ka na'apaalig onɛ zi' Josef yɛla da di na'am Egipt teŋin. 9O da yɛl o nidib la ye, “Gɔsimiya, Israel dim la nɔbigidnɛ galisi gaadi ti. 10Kɛlli ka ti bɔ suoya namisi ba ka ba da nɔbigi gaadi tii. Ya'a ka' ala, zaba ya'a duoe, ba na la'as nɛ ti dataas la zab nɛ ti ka zɔɔ yi ti teŋin la.” 11Ka ba gaans tʋʋma zugdaannam ye ba gur Israel dim la ka kɛ ka ba tʋm tʋʋm kpi'ema. Nimbama da kɛ ka Israel dim la mɛ tempʋbanɛ an Pittom nɛ Rameses ka li an na'ab la la'ad digilʋg zin'is ka Egipt dim nɔkidi ba la'adi niŋid ani. 12Amaa la'an nɛ ban da maan si'em bɔɔd ye ba kal sie la, ba da nan kpɛn nɔbigidnɛ. Ka ba zɔt Israel dim la dabiem. 13Egipt dim la da kɛ ka Israel dim tʋm tʋʋm kpi'ema hali ka pʋ zɔti ba nimbaanliga. 14Ba da kɛ ka Israel dim la bɛllim tɔi hali ka ba nwɛ'ɛd tampiga ka tʋm pɔɔd tʋʋm kpi'ema bɛdegʋ dinɛ ka' na'anaa. 15Egipt Na'ab la da buol Hibiru pu'adu'asnam banɛ yʋda an Sifra nɛ Pua la, yɛli ba ye, 16“Ya ya'a du'asid Hibiru pu'ab la ka nyɛ ka biig la an biribiŋ, yanam kʋʋm o; amaa o ya'a an bipuŋ, yanam da kʋʋ oo.” 17Amaa pu'adu'asnam la da zɔt Wina'am dabiem ka pʋ tʋm wʋʋ Egipt na'ab la yɛl si'em laa, ka bas biribis la. 18Ka Egipt Na'ab la buol pu'adu'asnam la ka yɛli ba ye, “Bɔɔ nwa' ka ya tʋm? Ya niŋ wala bas biribis la ka pʋ kʋʋ ba?” 19Ka pu'adu'asnam la yɛl na'ab Faaro ye, “Hibiru pu'ab la pʋ nwɛnɛ Egipt pu'ab laa. Ba du'am pʋ tɔiya, ka tinamɛ ti ye ti baŋ la ka ba pʋn du'a sa.” 20Li anɛ Wina'am da sʋŋ pu'adu'asnam la, ka nidib la da nɔbig ka mɔr paŋ. 21Pu'adu'asnam la zɔt Wina'am dabiem la zug ka o kɛ ka ba zak yalig. 22Ka Na'ab Faaro yɛl o nidib la ye, “Bikanɛ wʋsa ka ba du'a o ka o an biribiŋ, yanam nɔkim o lɔb kɔldaugin, amaa o ya'a anɛ bipuŋ yanam basim o.”
Currently Selected:
Yiib 1: kus_gh
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
