Yiib 19

Israel dim paae Sinai zuorin

1Israel dim la da yi Egipt la li nwadis atan' daar ka ba paae Sinai pipirigin. 2Ban da yi Refidim ka kpɛn' Sinai mɔɔgin la, ba da kena kpɛlim nɛ Sinai zuor la ni. 3Ka Moses dʋ zuor la zug ye o sia'al Wina'am. Ka Zugsɔb buol zuor la zug ka yɛl o ye, “Yɛlim Jakob yaas banɛ an Israel dim la ye, 4‘Yanam mɛŋ nyɛ mam maal Egipt dim la si'em, ka nyɛ mam zii ya si'em wʋʋ silʋg kpʋkpama nɛ mɔri ya paae m san'an na. 5#Zie 4:20; 7:6; 14:2; 26:18; Tit 2:14 Dinzug ya ya'a siak mam nɔɔr ka di'e m kaanbʋg la, ya na an mam nyɔɔrin kɔnbʋg, ka m ba'a na bɛɛ ya ni gaad buudi wʋsa, bɔzugɔ dunia la wʋsa manɛ sʋ'oe. 6#Nie 1:6; 5:10 Ka ya na an maanmaannib buudi tisim, ka lɛn an sʋ'ʋlim kanɛ an kasi tisim.’ Yɛlim nwa' tis Israel dim la.” 7Ka Moses sig na ka buol Israel kpɛɛmnam la yɛli ba linɛ ka Zugsɔb yɛl la wʋsa. 8Ka ba wʋsa siak ka yɛl ye, “Ti na tʋm dinɛ wʋsa ka Zugsɔb la yɛl la.” Ka Moses lɛm mɔr nidib la yɛl si'ela lɛbi yɛl Zugsɔb la. 9Ka Zugsɔb yɛl Moses ye, “M na bɛ saŋgbansabilin kɛɛn fʋ san'an na ka nidib la na wʋm mam pian'adi tisidif, ala ka ba na niŋif yadda hali zina zaŋi ken.” Ka Moses yɛl nidib la Zugsɔb la yɛl si'em.

10Ka Zugsɔb yɛl Moses ye, “Sigim teŋin ka kɛ ka nidib la maali ti'eb ka m kena. Maalimi ba sʋ'ʋŋa zina nɛ bɛog, ka kɛ ka ba pie ba fuud nyain. 11Maalimi siri daba atan' daar, ka mam Zugsɔb na sig Sinai zuor la ni na ka ba nini nyɛ. 12#Hib 12:18-20 Maalim bɛŋi gilig zuor la ka nidib la da gaŋi kenaa. Sa'alimi ba ye ba gu'usim ka sɔ' da dʋ zuor la zug bɛɛ si'isi li zin'isi'a baa bi'elaa. Onɛ wʋsa si'is zuor la, asɛɛ ba kʋʋ o. 13Ka nid bɛɛ bʋnkɔnbʋg ya'a zɔɔ gaŋ bɛn la, ba kʋ si'is o sɔb nɛ nu'usɛ, amaa ba na lɔb o nɛ kuga kʋ, bɛɛ ba tɔɔn o nɛ piema kʋ. Nidib la na bɛ lalli, ka ba ya'a ti wʋm na'atan ka li pieb zuor la ni, asɛɛ ka ba li'el zuor la na.” 14Ka Moses sig na ka kɛ ka nidib la ti'ebi ba mɛŋ ka pie ba fuud nyain. 15Ka o yɛli ba ye, “Ti'ebimini ya mɛŋ daba atan' nwa', ka din yi zina wa'ae la, mid ka ya digin nɛ pu'a.”

16 # Nie 4:5 Daba atan' la bɛogʋn ka zin'ig la wʋsa dammidnɛ satansʋg nɛ sa-ian'asʋg hali nɛ sisi'etita'ar. Ka saŋgbana sig zuor la ni na, ka na'atan pieb ka nidib la wʋsa kirid. 17Ka Moses kɛ ka nidib la dɔl o yi ye ba sia'al Wina'am, ka ba paae zi'en zuor la teŋir. 18Ka Sinai zuor la wʋsa kpan'alim nɛ nyɔ'ɔs, bɔzugɔ Zugsɔb da sig nɛ na wʋʋ bugum nɛ. Ka nyɔ'ɔs la duoe agɔla paad saŋgbana ni, wʋʋ sian'anr ka ba nyu'oe bugum nɛ. Ka zuor la dam nɛ paŋ. 19Ka na'atan la piebʋgʋ da dʋt hali la, Moses da pian'ad ka Wina'am lɛbisid o ka nidib la wʋm. 20Ka Zugsɔb sig Sinai zuor la zug na ka buol Moses ye o dʋ na. Ka Moses dʋ zuor la. 21Ka Zugsɔb yɛl Moses ye, “Sigim ka yɛl nidib la ye ba da lɔ'ɔŋ bɛn la. Ba mɛ da dʋ kpɛla na ye ba nyɛ Zugsɔb la. Ka onɛ wʋsa maal ala na kpi. 22Hali banɛ an maanmaannib ka ɛɛn kennɛ m san'an na la mɛ maalimi ba mɛŋ sʋ'ʋŋa, ka ya'a ka' alaa, m na san'ami ba.” 23Amaa ka Moses lɛbis ye, “Nidib la kʋ nyaŋi dʋ zuor nwa' ni naa. Fʋ pʋn yɛlim ye m da kɛ ka ba dʋ naa, ka yɛlim ye, ‘Maalim titɔndig gilig zuor la, ka kɛ ka li an kasi tis man Zugsɔb.’” 24Amaa ka Zugsɔb yɛl o ye, “Sigim mɔr Aaron na. Amaa da kɛ ka maanmaannib la bɛɛ nidib la sɔ' gaŋ bɛn la ye ba dʋ kpɛla naa, ka m na namisi ba.” 25Ka Moses sigi yɛl nidib la Zugsɔb la yɛl si'em la.

Currently Selected:

Yiib 19: kus_gh

Highlight

Copy

Compare