Ehokora 21

Diwiru dyodipe no kaye kokape

1Ngou na monine diwiru dyodipe no kaye kokape, inene diwiru dyo kutanga no kaye ko kutanga ya pwire, karo ka kwekarire karo diwate. 2Na monine Thsikuña Thsoshokenu, aye Yerusalema omupe, o ku shurumuka ku tunda mu wiru kwa Nyambi, o ku na roithsiwa nawa no ku yengiwera munuwenthzi eci mwenga.

3Na yuvire diywi dyodikuru ku tunderera ku ngunja ci: “O mone, ndau omu a tunga Nyambi mu kaci kanuenthzi thzi di honi, karo kenge a ku yoyano. Kenge a kwikarano, karo kenge a kwikara anuenthzi, karo aye Nyambi kenge a kwikara Nyambi wo. 4Kenge a ku porora mihothzi thzothzihe ku meho o. Ka kwa kwikara kufa nji thsidiro nji kudira nji kukora, inene enu yo kare i na pu.”

5Oyu wekarire pa ngunja wa ambire ci: “Mu mone, naa kwama enu yoihe ope!” Ngou a ambire ci: “O ñore eyi, inene aa maywi po aa kuruperiwa karo a shemwa.”

6Wa ni amberire ci: “Ku na pu. Yame no Alufa no Omega, Matatekero no Mamaneneno. Oyu na fu dinotwa kenge na ku mu pa meyu aa a tunda mu dinowa dyo mwoyo o ku piwa kengekenge. 7Wahe awa a ku othza kenge a ku tambura yoihe eyi, kenge na kwikara Nyambi wo, nawo kenge a kwikara anange. 8Uno honi owawowa, akwakukana ku tawa, owamango, epaanu, o ruthziho, arothzi, akwakurombera ekupuro nakwakwangera wahe, awo kenge mba konthzeriwa mu diviya edi di yuuma mudiro no sulufura. Oku kodiyo kufa ko muthsidi.”

9Kamweya ko tuya tungeru to mutanu na twidi, tuya twa kwatererire turonga to mutanu na twidi to ku yara to makarara o mutanu naedi o mamaneneno, ka keyire no ku na ni ambera ci: “O keye, kenge na ni ku monithsa mwenga, munu wa Dinguana.”

10Ngou ka ni shimbire mu Mupepo ku thza ku mukinya oukuru oure, ka ka ni monithsire Thsikuña thso Shokenu aye Yerusalema, o ku tunda mu wiru kwa Nyambi. 11Thsa tethzimine ko kutethzima kwa Nyambi. Thsa tethzimine eci diwe dyodikuru mu thsivaka, eci jasipere no ku vyakima eci kirisitale. 12Thsekarire no dimota dyodikuru dyodire no mathsero o dikumi na edi aa a nyungiwire ku tungeru to dikumi na twidi. Apo pa mathsero pa ñoriwire mathzina o mikuta thzo dikumi na thzidi thza Isiraele. 13Kwekarire mathsero ahatu ku muvo, ahatu ku wiko, ahatu ku mboera no a ahatu ku mutoko. 14Edyo dimota dyethso thsikuña dya umbiwire pa mishisho thzo mawe thzo dikumi na thzidi, apo pa mishisho pa ñoriwire mathzina o tunganda to dikumi na twidi twa Dinguana.

15Ako kangeru ka ambire nange kekarire no thsianekethzithso thso gauda thso ku anekethzithsa ethso thsikuña, mathsero athso no dimota dyathso. 16Ethso thsikuña thsa cipiturire mu ure no mu wipi, ore no wipi mofoci. Wa anekethzire ethso thsikuña ko thsianekethzithso thsenthzi, wa wanine unaure wadyo, wipi wadyo nore wadyo nedi tunano to 2,200. 17Kangeru ka anekethzire karo dimota dyathso, kwa wanaharire ci mucika wadyo nedi mamita o ku twethsa ku kwana 65#21.17 Mu Thsigerike po kwaa ñoriwa makubiti o 144. kokuthza ko muanekethzithso wanu ou ka kwamithsire kangeru.

18Edyo dimota shime dya kwamiwire pa mawe o jasipere, athso thsikuña shime thsa umbiwire ko gauda shemwa oyu weerire eci divotoro. 19Mushisho odyo dimota dyethso thsikuña shime wa yengiwire no mawe oakuru mu thsivaka o dikumi na edi. Mushisho o kutanga nedi jasipere, o muthsidi nedi safire, o muthsihatu nedi kalisedo, o muthsine nedi emaraludi, 20o muthsitanu nedi saridonikisi, o muthsitanu na ofoci nedi karinelia, o muthsitanu na thzidi nedi kirisolite, o muthsitanu na thzihatu nedi berileo, o muthsitanu na thzine nedi topazi, o mudikumi nedi kirisoparase, o mudikumi na ofoci nedi jasinito, o mudikumi na thzidi nedi ametisito.

21Ao mathsero o dikumi na edi nedi mapiare o dikumi na edi, thsero no thsero shime thza kwamiwire pa piare thzofoci. Mukwakwa omo mu thsikuña shime wa kwamiwire pa gauda shemwa, oyu weerire eci divotoro.

22Ka na monine Tembere omo mu thsikuña, inene Fumu Nyambi Shokoro Ouhe na Dinguana po wodiyo a Tembere thzathso. 23Ethso thsikuña ka kwa fotaharire ci shime kwikare diyuwa nji ngonda ku thsi munekera, inene kutethzima kwa Nyambi kwa thsi pire mwethzi, karo Dinguana yodiyo kambarambara kathso. 24Matunga kenge a ku enda mu mwethzi wathso, mafumu o kaye kenge a ku reta rufumo rwo omo mu thsikuña. 25Mathsero othso thsikuña a ku yanthzuruka mayuwa oahe. Ka a ku yanthzeriwa, inene mbera ka mwikara othsiku omo.

26Matunga oahe kenge a ku reta kutethzima kwao no direma dyao kwethso thsikuña. 27Kwithsa thso dithziro ethsi mba thsingenamo omo mu thsikuña, nji munu oyu na a kwama omango o kupiterera nji kwangera. Kenge mba kwingena pohuma awa ñoriwa mu Vuka thzo Mwoyo thza Dinguana.

Currently Selected:

Ehokora 21: mho

Highlight

Copy

Compare