Ehokora 20

Satana a angiwa myaka thzo kakore

1Ngou na monine kangeru o ku ka tunda mu wiru, o ku ka na shimbi dipao dyo ku dikwina dyo kupira ondanda, karo ka kwatererire didyenge dyodikuru mu dyoko dyako. 2Ka kwatire oya mbarange, diya diyoka dyo kare, aye shamaonga nji Satana no ku mwanga no madyenge myaka thzo kakore. 3Ka mu kuherire mu dikwina dyo kupira ondanda, ka vukireko no ku vivako ci Satana katere a kwangere matunga karo, shime ou thza ku pwa ethzo myaka thzo kakore. Munyima thzeyo, aa roera ku puturiwa thsikati thsothsipu.

4Na monine mangunja, awa ekarirepo a piwire okoro o ku ratura. Karo na monine myoyo thzowa a tetiwire mitwi mukaci kombangi wa Yesu no ku rongithsa diywi dya Nyambi. Ka romberire thsikondwama nji thsikupuro thsathso, karo ka tamburire thsitamba thsathso pa rupara nji pa moko. A yoyire karo no ku na tumina na Krisitu myaka thzo kakore.

5Oku kodiyo ku pinduka kwafu ko kutanga. (Uno honi amweya afu ka pindukire kwafu shime ou thza pwire ethzo myaka thzo kakore). 6Akwathsiyauthzi, karo akenu awa ku waniwa mu ku pinduka kwafu ko kutanga. Kufa ko muthsidi ka ku di nokoro peuru thzo, unone kenge a kwikara mapurisita a Nyambi na Krisitu, karo kenge a ku tumina nenthzi myaka thzo kakore.

Kuothziwa kwa Satana

7Ou thza ku pwa ethzo myaka thzo kakore, Satana kenge a ku punithsiwa mu kamenga kenthzi. 8Kenge a ku thza ku kangera matunga mu mambango ane o kaye, Gogo na Magogo, no ku ka waneka anu ku ka rwa. Taro thzo po eci ruheke ro pa diya dyo diwate. 9A caurire no ku ciyamba kaye kokahe no ku paka mu kaci thsirombo thsanua Nyambi no thsikuña thso ku shimiwa. Unone mudiro wa tundire ku wiru no ku na wa ñotora.

10Ngou shamaonga oyu wa wangerire a konthzeriwire mu diviya dyo mudiro o sulufura, omu thsa kuheriwire thsiya thsikondwama noya mukwakukethza o mbango. Kenge a ku nyandithsiwa mutenya nothsiku diyere na diyere.

Raturo thzo mamaneneno

11Na monine ngunja thzothzikuru thzothzikenu noyu wekarirepo. Kaye no diwiru ya cirire pa meho enthzi, ka ya monaharire karo. 12Ngou na monine afu, owakuru nowa owaonye o kwa nemana pa rupara ro ngunja thza Nyambi. Mavuka a thsikuriwire. Ngou kwa thsikuriwire vuka thzimweya, athzo Vuka thzo Mwoyo. Afu a raturiwire kokuthza keyi ya ñoriwire mu mavuka, eyi a kwamine. 13Diwate dya huthsire afu awa ekariremo, no kufa no mararo nayo ya huthsire afu. Wahe a raturiwire kekwama yo. 14Ngou honi kufa no mararo#20.14 Mu Thsigerike po Hadesi ku amba Ndau Thzafu. ya kuheriwire mu diviya dyo mudiro. Edi diviya dyo mudiro po kufa ko muthsidi. 15Yomuhe oyu wa waniwire ci ka a ñoriwire mu vuka thzo mwoyo wa kuheriwire mu diviya dyo mudiro.

Currently Selected:

Ehokora 20: mho

Highlight

Copy

Compare