Ehokora 12
12
Mbuyama no mbarange
1Ngou kwa monaharire thsimonithso thsothsikuru mu wiru, thso mbuyama oyu wa vatire diyuwa, no ngonda kushi thzedyato yenthzi no mushukwe o matungwethzi o dikumi na edi ku mutwi wenthzi. 2Shime ekarire poremu, wa dirire ko diywi dyodikuru mukaci ko kukora ko kunyatithsa.
3Kwa monaharire karo thsimonithso thsimweya mu wiru, mbarange o mukuru o mukihu o mitwi thzo mutanu na thzidi no manyia o dikumi no mishukwe thzo mutanu na thzidi ku mitwi thzenthzi. 4Muthsira wenthzi wa kokire rwavu ro muthsihatu ro matungwethzi o ku wiru no ku a kuhera pa kaye. Oya mbarange ngou emanine pa rupara royo mbuyama wekarire po pepi no ku shamuruka ci a dye kambu kenthzi popa ka shamurukiwa. 5Wa shamurukire kambu kokakwerume oyu mbo tumina matunga oahe no muramu o thsifu. Unone oyo kambu wa comboriwire no ku twariwa kwa Nyambi no ku ngunja thzenthzi. 6Oyo mbuyama wa cirerire mu dikunguthsitu oku a mu roithserire ndau Nyambi ku ka mu nyungerako mu mayuwa o 1,260.
Mvo mu wiru
7Ngou kwa katukire mvo mu wiru. Mikaele no tungeru twenthzi a rwithsire oyo mbarange. Naye mbarange no tungeru twenthzi a ciamwenine ko ku rwa. 8Unone mbarange wa othziwire omo mu mvo, aye no tungeru twenthzi kekarire karo no ndau mu wiru. 9Oyo mbarange shokuru wa kuheriwire pashi, adyo diyoka dyo kare edi di nethsiwa shamaonga nji ci Satana, oyu na angera kaye kokahe. Wa kuheriwire pa kaye mofoci kengeyo no tungeru twenthzi.
10Ngou na yuvire diywi dyodikuru mu wiru o ku di amba ci:
“Kuyoyithsiwa, nokoro nofumu wa Nyambi wetu i na kumu honi.
Krisitu na monithsa okoro wenthzi,
inene mukwakuthzekithsa aenthzetu akwakutawa na kuheriwa pa kaye,
oyu na wa thzekithsa mutenya nothsiku pa meho a Nyambi.
11Na mu othzo konyinga wa Dinguana nombangi wo.
Ka shimine nene myoyo thzo mane shaanga ku twara ku kufa.
12Mweyo, mu roere amwe mwa mawiru
namwe mwa tungamo!
Unone mwakwothsimo amwe mwa kaye no diwate,
inene shamaonga na keye pashi
koanthzi oukuru,
inene na dimuka ci thsikati thsenthzi thsipu.”
13Oyo mbarange ou a monine ci na kuheriwa pa kaye, wa cithzacithzire oya mbuyama wa shamurukire kambu kokakwerume. 14Uno honi oya mbuyama wa piwire mando edi o ngonga o mukuru ci a unduke ku thza ku ndau ethzi a roithsiwerire mu dikunguthsitu, oku a ku ka nyungiwera mu myaka thzihatu no kaci ko mwaka ci a pare kwedyo diyoka. 15Diya diyoka#12.15 Mbarange. dya ndanyunine meyu mu kanwa kadyo eci rware munyima thzoyo mbuyama ci ru mu pukithse. 16Unone kaye ka kwathsire oya mbuyama, ka yanthzururire kanwa kako no ku mina rware oru rwa tundire mu kanwa koya mbarange. 17Oya mbarange ngou a anthziperire oyo mbuyama, wa ka rwithsire anahokenthzi wahe awa thsiarirepo, awa a hengeka eraerera ya Nyambi no ku rurama mumbangi wo keyi ya Yesu [Krisitu].
18Oyo mbarange ngou emanine pa dikambo dyo diwate.#12.18 Mañoro amweya o ñanyiñanyi aa amba ci “Nemanine pa dikamba dyo diwate.”
Currently Selected:
Ehokora 12: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company
