Mateu 11

Yesu na Johani Mukwakukorovethza

(Luk 7.18-35)

1Yesu ou a manine ku raerera erongwa yenthzi yo dikumi na idi, wa thzire o rongithsa no ku honga Diywi dya Nyambi mu maumbo a Galilea.

2Johani o ku di mu kamenga, wa yuvire ekwama ya Krisitu, wa tumine amweya kwirongwa yenthzi ku kepura Yesu ci: 3“Ene yowe oya twa yuva ci kenge mba a keya nji, nji tu taterere wao?”

4Yesu wa wa tawire ci: “Mu thze mu ka tongwere Johani eyi mu na mono neyi mu na yuvu. 5Tupuputwa twaa mona, ekunga yaa enda, akwengondwe aa porithsiwa, akwa kufa matwi aa yuva, afu aa pinduriwa kwafu, Muthzimbu Ouwa waa hongiwa kwahepwe. 6Wa thsiyauthzi munu o kukana ku kuñuka mukaci kange.”

7Erongwa ya Johani popa ya thzire, Yesu wa tatekire ku ambaura ya Johani ku mbunga ci: “Ou mwa thzire mu dikunguthsitu ne thsine mwa fotire ku ka mona? Dimbungu edi dya pungithsiwire ku mupepo nji? 8Uno honi ne ine mwa ka monine? Munu o ku vata yoiwa nji? Dyombo, anu o ku vata evata yoiwa aekara mu manthzio o thsifumu. 9Edye honi ne mwa ka monine? Ene mukwakukethza nji? Ii, naa mi tongwera ci oyo na mu ka mona po mukuru kupita mukwakukethza. 10Johani yodiyo oyu i na ñoriwa yenthzi mu Mañoro ci:

“ ‘Kenge na ku tuma kanganda kange ku rupara rwoe,

ku ka ku roithsera dikuñwa dyoe.’

11“Naa mi tongwera yoshemwa ci Johani Mukwakukorovethza mukuru kupita anu wahe awa erekiwa pano pashi. Uno honi o muonye mu Kutumina ko ku Wiru po mukuru kwa Johani. 12Ku tunda mu thsikati ethsi a tatekire Johani Mukwakukorovethza ku honga shime ku na kuma thsino thsikati, Kutumina ko ku Wiru shime kwaa rwithsiwa kokoro, karo owangi na ereka ku ku pukura. 13Murao wa Mushe nakwakukethza wahe shime ku na kuma thsikati thsa Johani okethzire yo Kutumina. 14Ngeci mu na ciroithsera ku tawa aa maywi, Johani po yodiyo Eliya oyu a ambire akwakukethza ci kenge mba a keya. 15Oyu di no matwi o ku yuvithsa a yuve.

16“No ine nga ni wa piturithsa anu o rerodino? Aa cipitura eci anuke awa a di pa mbanthza o kwethsa aenthzo ci:

17“ ‘Tu na mi shikera pa paro membo o wenga,

unone ka mu kinine.

Tu na mi mbera membo o pa thsidiro,

unone karo ka mu dirire makuano.’

18“Johani Mukwakukorovethza wa keyire ko kukana ku dya nene edya nji ku nwa waine, unone anu a ambire ci: ‘O di no mupepo oumango.’ 19Mwana Munu wa keyire no ku na dya no ku nwa, unone anu a amba ci: ‘Mu na mono oyu dyakudya no thsitakwa, mbusha waterithsi nanu wevi.’ Unone onyanyami wa Nyambi waa monithsiwa ci uwawa ketenda yao.”

Maumbo o kukana ku tawa

(Luk 10.13-15)

20Yesu ngou a tatekire ku rwithsa maumbo omu a kwamine ongi wekomokithsa yenthzi, inene anu ka cerire etenda yo yoimango. 21“O mukwothsimo owe o Korazini! O mukwothsimo owe o Betisaida! Inene ekomokithsa eyi na i kwamiwa ku kwenu, nga yaa kwamiwa mu Tire na Sidoni, nga na cera kare mirandu thzo no ku vata mathsaka, no ku ciwethsa mututwi ku monithsa ku cera mirandu thzo. 22Shaanga kengeyo, naa mi tongwera ci mu diyuwa dyo raturo kenge kwa kwikara tangonaho ku Tire na Sidoni kupita amwe.

23“Karo owe o Kapenauma ne waa anekera ci kenge wa ku twariwa ku wiru nji? Dyombo! Kenge wa ku huweriwa pashi mu ndau thzafu. Inene ekomokithsa eyi na i kwamiwa ku koe, nga mu Sodoma, edi diumbo no rerodino nga ko di di. 24Shaanga kengeyo, naa ku tongwera ci mu diyuwa dyo raturo kenge ya kwikara tangonaho ku ditunga dya Sodoma kupita owe.”

Mu keye ku kwange na mu turumwithse

(Luk 10.21-22)

25Popo Yesu wa ambire ci: “Tata, Fumu o diwiru no kaye, naa kanderera ku koe pa ku horekera eyi enu owanyanyami nakwa maano, no ku i hokwera o kuninga eci anuke owaonye. 26Ii, Tata, no kwama kengeyo, inene modiyo no shimena.

27“Tata na a paka enu yoihe mu moko ange. Kwithsa oyu na dimuka Mwana shime Tata, karo kwithsa oyu na dimuka Tata shime Mwana nowa na a hangura Mwana ku wa hokwera Tata wenthzi.

28“Mu keye ku kwange amwe mwahe mu na aya mukaci ko mipango thzothziremu kenge na ni mi yooyerithsa. 29Mu shimbe njoko thzange mu thzi cikambeke, karo mu cirongithse ku kwange, inene no mukwa kuwamucima karo no mukwa kucihuthsa kushi. Myoyo thzenu kenge na thzi wana maturumwithsero. 30Inene njoko thzange thzioto o ku shimba, karo mupango wange urethzu.”

Currently Selected:

Mateu 11: mho

Highlight

Copy