Mateu 10

Tunganda to dikumi na twidi

(Mar 3.13-19; Luk 6.12-16)

1Yesu wethsire erongwa yenthzi yo dikumi na idi, no ku i pa okoro o ku cithza mathzimu, ku porithsa mishovo thzothzihe thzekora no mawethzi.

2Mathzina oto tunganda to dikumi na twidi po aa: O kutanga po Simoni oyu nethsiwa ci Peturu, no Andereasi minenthzi, Jakovo na minenthzi Johani ana Zebedea, 3Filipu no Batolomeu, Tomasi no Mateu o muterithsi, Jakovo mwana Alufea, no Tadea, 4Simoni o Zeloti#10.4 Diywi dyo Thsigerike dyaa amba ci munu oyu na shimi nene thsinu. no Judasi Isikariota oyu wa ombire Yesu.

Yesu aa tuma oto tunganda to dikumi na twidi

(Mar 6.7-13; Luk 9.1-6)

5Yesu wa tumine oto tunganda to dikumi na twidi no ku tu raerera ci: “Mwa thza kwAnukenge nji kwingena mu mambongi o Masamaria. 6Uno honi mu thze pohuma ku mangu o kuyonga a Isiraele. 7Mu thze mu ka wa honge ci: ‘Kutumina ko ku Wiru pepi ku di!’ 8Mu ka porithse akwakukora no ku pindura afu, mu ka porithse akwengondwe no ku cithza mathzimu. Mwaa piwa kengekenge, namwe mu ka pe kengekenge.

9“Mwa shimba madi o gauda, nji o silivera, nji o kopa mwipaupau yenu. 10Karo omu mu ruendo mwa shimba mukotana nji ku shimba thsikoveyo thso muthsidi, mashangu nji muramu o ku endera. Inene mukwakukwama aa roera ku dyera pekwama yenthzi.

11“Yoihe mu kuma mu mbongi nji mu diumbo, mu fotithsithse nawa ci mu wanemo munu oyu nga roera ku mi tambura. Ngeci amwepo mu mu wana, mwaa roera kwikara mu mwanda wenthzi shime ou mwa ku tundamo ku thza kumweya. 12O ku mwingena omo mu mwanda, mu ambe ci: ‘Thsiyaro thsikare nenu.’ 13Ngeci awa a di omo mu mwanda awopo a mi tambura, thsiyaro thsenu thsikare kukwo. Unone ngeci awa a di omo mu mwanda ka fotire, thsiyaro thsenu thsi mi hukere. 14Yoihe mu kuma mu diumbo nji mu mwanda omu a na kana ku mi tambura, nji ku teerera ku maywi enu, mu tundemo. Karo o ku mu thza mu kukumune dikungu dyo kwidyato yenu.#10.14 Ku mi kukumwena dikungu dyo ku mauru yaa monithsa ci mu na wa kana. 15Naa mi tongwera yoshemwa ci mu diyuwa dyo raturo kenge ya kwikara tangonaho ku mambongi a Sodoma na Gomora kupita anu omo mu mbongi.

Makando o ku rupara

(Mar 13.9-13; Luk 21.12-17)

16“Mu mone, naa mi tuma eci mangu mu kaci ko winthzi. Mweyo, mu nyanyame eci mayoka, karo mu pire thsothsimango eci makuci. 17Mu mamere, inene anu kenge a ku mi twara ku makuta, no ku ka mi mwashaura mu masinagoge o. 18Kenge mwa ku twariwa ku manguvuru no mafumu mukaci kange ci mu ka pe ombangi ku kwo, noku kwAnukenge. 19Ou a ku mi kwata, mwa ku cithzekera dyo ku ka amba, nji ci ine yo ku ka amba. Inene mwethso thsikati Nyambi kenge a ku mi pa eyi mwa ku ka amba. 20Kadi yamwe mwa ku ka amba, unone Mupepo wa Tata wenu yo wa ku ka mi ambithsa.

21“Mukurwamunu kenge a ku omba minamunu ci a paiwe, no tatawamunu kenge a ku tenda kengeyo kwa mwanenthzi. Ana kenge a ku pirukera ashemi wo no ku wepaithsa. 22Anu wahe kenge a ku mi thzimba mukaci kange. Unone oyu wa ku citanarithsa ku ka kuma ku hura, kenge a ku yoyithsiwa. 23Yoihe a mi nyandithsa mothzi mbongi, mu cirere mothzi thzimweya. Naa mi tongwera yoshemwa ci ka mwa ku mana ku pita mu mambongi oahe a Isiraele, Mwana Munu o ku shime ku kuma.

24“Thsirongwa tumba thsi piti murongithsi wathso, no mupika tumba a piti ñathsire wenthzi. 25Ku di nawa thsirongwa ku cishoka na murongithsi wathso, no mupika ku cishoka na ñathsire wenthzi. Ene ngeci anu aethsa thsinda thsa nthzio ci Beelezebule, awa anuenthzi ne kadi kenge a ku wa ta mathzina oamango kupita edyo!

Mu yape Nyambi, mwa yapa anu

(Luk 12.2-7)

26“Mweyo, mwa yapa anu! Ethsi thsi na thsikiwa thsothsihe kenge thsa ku thsikuriwa, karo neyi i na horekiwa kenge ya ku hokoriwa. 27Eyi ni mi ambera mu mirema, mu ka i ambe mu mwethzi. Eyi mu yuva o ku i yaayiwa, mu thzine petuwa yo manthzio ku i tongora.

28“Mwa yapa o kwipaa erama, unone kadi akwa ku twethsa kwipaa mwoyo. Unone mu yape pohuma Nyambi, aye o ku twethsa ku nongithsa erama no mwoyo mu dihere. 29Kadi tundumbu twidi po twaa uriwa ko kawayawaya kofoci pohuma? Unone shaanga kengeyo, kwithsa shaanga kandumbu kofoci aka ka ku wera pashi Tata wenu o ku na kana ku i shima. 30Eci amwe honi po no huki thzo ku mitwi thzenu na a thzi tara thzothzihe. 31Mweyo, mwa yapa, amwe po mwakuru mu thsivaka kupita ndumbu thzothzingi.

Ku citawera Krisitu pa meho anu nji ku mu hamura

(Luk 12.8-9)

32“Munu yomuhe oyu wa ku citawera pa meho anu ci wange, name kenge na ku u citawera pa meho a Tata oyu di mu wiru. 33Unone yomuhe o ku ni hamura pa meho anu, name kenge na ku mu hamura pa meho a Tata o mu wiru.

Ka na ku retiwa thsiyaro, unone mwere

(Luk 12.51-53; 14.26-27)

34“Mwa anekera ci shime na ni reta thsiyaro mu kaye. Ka na ni reta thsiyaro, unone mwere na ni reta. 35Inene naa keyera ci:

“ ‘ana wakwerume a ku kane ku ciyuva natata wo,

ana wambuyamaana a ku kane ku ciyuva namama wo,

nambuyama a ku kane ku ciyuva nangumwenyo.

36Akwamwanda ofoci nenthzi munu wodiyo a kwikara akwethzimbo yenthzi.’

37“Munu yomuhe o ku shima nene tata wenthzi no mama wenthzi kupita ame, ka a roerire kwikara wange. Noyu o ku shima nene mwanenthzi o mukwerumeana nji o mbuyamaana kupita ame, naye ka a roerire kwikara wange. 38O ku kana ku shimba mbinda thzenthzi no ku ni shupwera, ka a roerire kwikara wange. 39Munu yomuhe o ku shima nene mwoyo wenthzi kenge a ku u yawa, unone yomuhe o ku yawa mwoyo wenthzi mukaci kange kenge a ku u wana.

Miyambo

(Mar 9.41)

40“Munu yomuhe o ku mi tambura, yame a na tambura. O ku ni tambura, aa tambura oyu na a ni tumu. 41O ku tambura mukwakukethza wa Nyambi mukaci ko kuninga ci mukwakukethza wa Nyambi, kenge a ku wana muyambo o ku cishoka nou wa mukwakukethza. O ku tambura munu o muwawa, pakuninga ci munu o muwawa a na tambura, naye kenge a ku wana muyambo o ku cishoka nou wa munu o muwawa. 42Yomuhe oyu wa ku pa shaanga nganja thzo meyu o kwombora koyu shoonye kwirongwa yange, mukaci ko ku ninga ci thsirongwa thsange, naa mi tongwera yoshemwa ci oya munu ka a ku yawa muyambo wenthzi.”

Currently Selected:

Mateu 10: mho

Highlight

Copy