SODANG 4
4
Joeui dah Vkyuh
1Ngah lo jens eh, namoq dah uwus jyauh yvlyis gyo yoeus aq, kamp gyo aq, seqgyo cho bos los das. 2Housoeh las ngos namoq lyis gis dah jyauh cho dyei. Ngos jyauh cho lhyi vtyamp. 3Ngos gas loshang nghuot uhlyis ngah ungwes xikkhonh mas noeuh las dvyuk kyingh nghuot. 4Ngah uwus ngos lyis jyauh las taiq zis gas, Ngah dang nah nhaiqlom mas kat shung toh aq. Ngos tyingtoh dang lyis chank kuot lyis nvng kang dwis das. 5Joeui xo aq, seqgyo cho xo yung toh aq. Ngah nhuot mas dang lyis vtohnyhik, nungsyos vtoh. 6Joeui lhyi vtyamp, khasoeh ge lyis nyang nvng lyis gomh das. Nyang lyis jyet aq, nyang nvng lyis zungh das. 7Joeui ka yhaugyen thank zis nghuot. Housoeh las joeui xo aq. Nvng xo zis dvnganh mas seqgyo cho xo aq. 8Nyang lyis chunghtoq aq, nyang nvng lyis toeushap das. Nyang lyis po toh#4.8 Po toh aq, nghuot ya phauh nyhang nyhang tap toh aq aq, nyang nvng lyis nyoqnho ngelang dyei das. 9Nyang gas nah uhloms mas yungh dah bankhwank kih dyei zis yah nvng lyis phunk bos buismuk dyei das, ge.
10Ngah lo eh, ngah dang gyo yoeus las, ngah sangkhyangh lhom yoeus aq. Housoeh lyis nah kang xing das. 11Ngos nvng lyis joeui cho jyauh las, dan khyvlyis kang dwis nhang, choshe los. 12Nvng suh lyis nah beszoh thomtho ma mus das. Wuih lyis khyeiuh ma thungh das. 13Jyauh cho lhyi zwizains toh aq, vkat khyoq. Hauh zis gas nah kang nghuot yvmvyah tsomh toh aq. 14Lhung bang kuot teh vkuot, Nyamoq dah ma gis cho chank vsuh. 15Hauh cho lhyi jhank aq, vloh; jhank las nah cho nvng loh aq. 16Nyamoq gas ma gis zis ma yoh kuot lyis ma yoh yhet. Dvyuk yuk lyis ma yoh toeulhain lhyi nyamoq yhet ma yoh muih. 17Nyamoq gas ohlhyoq zo, zvbiq shuk teh lhung cho yahge lhuot zo cho mha gauslaus.
18Dan bang dah cho ka buis canh los teh nghuot. Houka bvng doengs shoq zes zes bvng los. 19Nghuot laus eq lhung bang dah cho ka mauchotdwang teh nghuot. Nyamoq gas nyamoq lyis cha yah thungh lains nhang zis ma tsain seq.
20Ngah lo eh, ngah dang kamp gyo aq. Ngah sangkhyangh lyis nah no vlhomuh gyo aq. 21Houka nah nyoqjeih masyah vgang loh nhang. Nah nhaiqlom khau mha comh toh aq. 22Khasoeh ge lyis hauh zis gas xo nyvng bang xiklyis kang nghuot. Gungs gonh xiklyis yanghzan cho nghuot. 23Nhaiqlom gas nvng kuot ya kuot yvlyis vkyuh dyei yvmvyah nah nhaiqlom lyis ma lan lo tsomh toh aq. 24Mhuih dah nhuot, hwah dah nhuotkuk lyis nvng masyah we loh nhang aq. 25Nah nyoqjeih lyis dan dan yoeuh nhang aq, nah nyoqkuk nah xikkhonh mas jeih jeih yoeuh nhang aq. 26Nvng loh cho lhyi nghamh suon yoeuh las, nah cho dvnganh doengs nhang aq.#Heb 12.13 27Loqwi loqyos v i loh; nah khyei ma gis cho mhayah jhank aq.
Ngochang Common Language Bible © Bible Society of Myanmar, 2010.