SODANG 31
31
Hwankti lhyi Joeui Dang
1Heika hwankti Lemuel dah ungwes, nyah lo lyis taiq dah noq dah tying dang nghuot.
2Nyang taiq zis gas, Nvng gas ngos jyetdap, ngah shvmanh dung dang yah dvyhangteh yoh los dah lo nghuot. Ngos nvng lyis cha yah sen cho taiq das lah? 3Nah yom dvnganh nyetnau cho mha vyhung tyamp, nah ngwis dvnganh vmesbih jens mas vyhung tyamp; nyamoq gas hwankti jens lyis mhont tyamp ku goeus. 4Lemuel eh, gyo aq, hwankti jens gas zvbiq shuk cho, nghuot ya yhei shuk cho lhyi jhank chah. 5Nyamoq shuk nyeis lyis lyi tohnyhik zis yah vshoh vjyen dius jens mas chah nyeis dah toeuh lyis chaxwe manhang seq mus. 6Yhei ka shei loh nyeis bang xiklyis yahge, kham nanh nosthyoh xauh bang dah xiklyis nghuot. 7Nyamoq shuk las nyamoq dah shohjyen cho yahge ehnyet ma tap cho lhyi tohnyhik bas jungh.
8Vsainnyang dah cho ma yoh taiq bang nyhenshang bos taiq dyei aq. Pangh das soeu ma yoh bang dvnganhmoq dah toeuh lyis bos gos dyei aq. 9Nyamoq xiklyis dang taiq dyei las dan dah soetuon soeu kuot dyei aq. Shohjyen bang yahge nyungs bang dah toeuh lyis gos dyei aq.
Wotwons yhensain nyhiq
10Wotwons dah yhensain nyhiq lyis xo nyvng das zis kha iq yau lah? Nyang gas phauhdap luk thoq lyis zes phauh.
11Nyah yhensain phoq gas nyang mas nghamhnywe las, nyang khanhamp eq ma shohjyen das.
12Nyang dwis nyeis dvchank nyah yhensain phoq xiklyis gis dah muh zwi las, vkyuh nain nhang muh khanhamp eq ma kuot.
13Nyang gas sauh khying yahge jei khying yah yoqgan yoq yvmas ma ngo ma banh nghuot.
14Nyang gas soenghi sangpho jens kuot teh, we masyah yhen pheh zonoms chi los.
15Nyang mau ma buh shih lyis toq las nyah yhenbang xiklyis wom ba las nyah jyeidwis nyih jens kuot das muh shet nyeis.
16Nyang gas maunyeis lyis yoeuh toeuq las wis. Nyang yoh xo dah ngwis yah zvbiq khyam tsungh.
17Nyang gas muh zwi dah vmesbih nghuot las yombos, kank kat nyeis.
18Nyang kuot thuq dah vyhang dvnganh dah phauh lyis nyang seq las nyenh gungs jweh shoq muh zwi nyeis.
19Nyang jeini las, yoqgan yoq.
20Nyang gas shohjyen bang yahge nyungs bang lyis magons magoh mes gvm dyei nyeis.
21Nyah yhenbang gas nywe dah dyimis xauh wuot yvmvyah gyu gyoh uhlyis nyang ma chiqh noh.
22Nyang gas yhetyos mvlhyoeuq kuot. Nesnoq vwot thuq las yungh dah jyuhmahsen dyimis wuot toh.
23Nyah yhensain phoq gas wus mas shwih uhshe soeu dvyuk nghuot las nyings hoeuh.
24Nyang gas misseh yahge dyichih tsain yoq las soenghi jens lyis ungh dyei.
25Nyang gas yom yahge nyoqnho ngelang bos las jweh los das shishenh nyhenshang nyang ma chiq.
26Nyang gas noeuh noeuh nhamp nhamp joeui dang taiq nyeis.
27Nyang gas vjangh yah ma ngo ma banh muh zwi zis yah nyah yhen khau mha chah nyeis cho lhyi yoeuh nyeis.
28Nyah lo jens nyang lyis phauhtap toh. Nyah yhensain phoq eq nyang lyis chungh.
29Nyang gas, vmesbih jens nyoshoq gas gis dah yhensain nyhiq jens nghuot laus eq, hauh bang dvnganh thoq lyis nvng gas gis thank soeu nghuot, ge.
30Gungs khyank yungh zis gas seq mhuih, yungh zis gas seq bi loh laus eq, Yhensain lhyi gyukwoms dah vmesbih gas chungh mon soeu nghuot.
31Nyang kuot dah muh dvnganh phauhdap yvlyis comh dyei aq. Yuk khanghmuh nyang lyis phauh nyang das zis gis.
Currently Selected:
SODANG 31: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.