SODANG 2
2
Joeui dah Phauh Shangh
1Ngah lo eh, ngos nvng lyis jyauh yvlyis xuq aq, ngos tyingtoh dang khanhamp eq vtohnyhik. 2Joeui lhyi kamp gyo las nah nhaiq mas seqgyo shoq kuot aq. 3Nghuot goeus, seq cho bos shoq sang aq. Seqgyo cho bos shoq sang aq. 4Hauh zis lyis ngwis xo teh xo lha, shung toh zisyos lyis phehxo teh xo aq. 5Housoeh kuot lyis nvng Yhensain lhyi gyukwoms cho dah vjyuk seqgyo los das, Mangso cho xuq yvmas ung cho yoh das. 6Joeui dyei soeu ka Yhensain nghuot. Seq cho yahge seqgyo cho ka nyah jyank masyah los. 7Nyang gas ehnyet zungh bang lyis pangh, kop kop toq toq suh e bang lyis gos toh dyei. 8Nyang gas lyi jus cho kuot bang lyis gos toh dyei, nyang lyis phauh nyang bang lyis gomh toh dyei.
9Housoeh nvng ngah dang gyo lyis nvng jus cho, lyi jus cho yahge yih cho lhyi seq los das. Nvng cha kuot chah yvlyis seq los das. 10Nvng joeui bos los das las, seq cho mha nvng gauslaus nyeis das. 11Nvng seq cho yahge seq gyo cho ka nvng lyis gos toh dyei das. 12Joeui ka nvng ma jus zis kuot cho mhayah khyuot kat das. Hauh zis gas nyamoq dah dang ma yungh zis yah soe lhoeu thuq bang masyah gomh kat das. 13Dan dah kang dwis cho lhyi tyamp las yaunos dah mauchuotdwang mas kang dwis bang masyah eq, 14ma jus zis kuot yvmas pyo soeu, lhung cho mha gauslaus soeu masyah eq, 15guih cho chank las ma yoh loms bang masyah eq gomh dyei das.
16Joeui ka, nvng lyis wotwu dyoq dah vmesbih gas mhuih dang yah chuq shwih loh masyah khyuot das. 17Nyang gas nyah yhensain phoq lyis tyamp khoq, nyah Mangso lhyi toh dah thanghchvp lyis tohnyhik tyamp. 18Nvng nyah yhen mha loh lyis nvng gas shei das cho pheh suh loh nyeis. Houmha loh zis gas shei mau yah ni loh nyeis. 19Nyah jyank mas kwang loh bang hank khanhamp eq ma doms los lo. Nyamoq kang dwis cho pheh ma tauh los lo. 20Housoeh las nvng gas dius gis dah yikhyoh chank las dan dah kang dwis cho yah kang dwis chah. 21Khasoeh ge lyis dan bang hauh mau mas nyeis das, koptoq bang houmha doengs joq das. 22Nghuot laus eq Mangso ka lhung bang lyis hauh mau masyah thyuk tyamp das. Saiqzains lyis nyeisjvng masyah nuot tyamp teh yaunos wons bang lyis hauh mau masyah yoeus tyamp das.
Ngochang Common Language Bible © Bible Society of Myanmar, 2010.