MATHE 3
3
Jeisnyhop Yohan Jyauh Cho
(Mak 1.1-8; Luk 3.1-18; Yoh 1.19-28)
1Hauh buisnyeis lyis jeisnyhop dyei soeu Yohan thuq los las, Yuda mau mhanhdyvp mas taiq hoeuh nyeis zis gas. 2Maukhung munghdan jweh ni los las, nhaiqlom thaiq geh, ge.#Mat 4.17; Mak 1.15 3Lvpe Esaia gas haih soeu cho heisoeh ge:#Esa 40.3 (LXX)
Mhanhdyvp mas dvyuk kaiq nyeis dah thwe ka,
Yhensain dah cho lhyi sont toh geh,
Nyah chokhyoh lyis soq dan geh,
ge.
4Yohan ka, gola-u mauh dyi wuot, thyikdom mas shohyeis dyichih chih toh. Nyah wom gas janghgyik yahge mhanhdyvp mas dah dyoyhei nghuot.#2Hw 1.8 5Hauh uhlyis Yerusalem, Yuda mau gonh mas bang, Yodan lvng vwi vyvm mas bang dvnganh, nyah jyank mas e lha, 6nyamoq dah yaunos lyis rhen lha, Yodan lvng Yohan jyank mas nyamoq jeisnyhop tsain kham.
7Pharishe yahge Saduke jens nyoshoq jeisnyhop kham das xiklyis lyih yvlyis nyvng las, nyang nyamoq lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah?#Mat 12.34, 23.33 8Housoeh yvmvyah nhaiqlom thaiq zis yah mon yih dah vshih shih geh. 9Namoq ehnyet mas Abraham gas namoq dah phauh thyeih nghuot oen vtaiq zo goh. Ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang.#Yoh 8.33 10Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das.#Mat 7.19 11Ngos namoq lyis nhaiqlom thaiq das xiklyis jeis yah jeisnyhop dvdyei shih, nghuot laus eq ngah thang mha los soeu ka ngah thoq lyis yombos soeu nghuot las, ngos gas hauh soeu dah thyvkoq dvng dyei das zis yangh ma mon. Nyang gas namoq lyis gyingshang Dyos yah eq, nyi yah eq jeisnyhop dyei das. 12Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge.
Yesu Jeisnyhop Kham
(Mak 1.9-11; Luk 3.21-22)
13Hauh uhlyis Yesu gas Yohan loq mas jeisnyhop kham das xiklyis Galile mau masyah Yohan nyeis dah Yodan lvng mas jweh los. 14Nghuot laus eq Yohan nyang lyis tomp las taiq, Ngos yuk nah jyank mas jeisnyhop dvkham chah zis, nvng ngah jyank mas lyih lhyeh, ge.
15Yesu nyang lyis phuk taiq zis gas, Gvshih gas heisoeh kuot aq, khasoeh ge lyis heisoeh kuot zis gas dan cho dvnganh nyuk los das xiklyis nghuot, ge. Housoeh ge lho lhyi nyang dvkham dyei.
16Yesu jeisnyhop kham lha jeis khau mhayah toq los yah dvyih, nyah jyank mas maukhung phank los las, Mangso dah Dyos gas khotjyauh teh gyoh los las nyah thoq mas los no joq yvlyis ngos nyvng. 17Maukhung mhayah thwe eq dvkoeuq los zis gas, Haih soeu ka ngos jyetdap dah ngah Lo nghuot, ngos nyang lyis nhaiqdoeus, ge.#Vpm 22.2; Chd 2.7; Esa 42.1; Mat 12.18, 17.5; Mak 1.11; Luk 9.35
Currently Selected:
MATHE 3: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.