ESAIA 65
65
Gomloeus jens lyis Joeng
1 Yhensain taiq, Ngos gas ngah dius jens dah shvmanh dung yvlyis toeuh dyei das zis cicont nghuot laus eq, nyamoq shvmanh ma dung. Ngos gas nyamoq xo nyvng das nyhenshang cicont nyeis laus eq, nyamoq xo yangh ma xo shi yoeuh. Ngos heimha nghuot, ngos namoq lyis pangh das oen toeuh das zis vjangh cicont nghuot joq laus eq, dius nyau jens ngos lyis shvmanh ma dung.#Rom 10.20 2Ehnyet than zis yah shuot zis kuot las nyamoq nyang cho pheh loh dah ngah dius jens lyis zes das zis vjangh cicont nghuot.#Rom 10.21 3Nyamoq gas ma daq xoq ngos lyis tsoq nhaiqyo nhang nyeis. Nyamoq gas gyingshang khyam mha phvra lyis phudyei las phvra phon jens mas xangh tsain ngheq dyei. 4Nyamoq nyenh lyis lukkhyung yahge lop mas tsain loh las shei bang dah sidyos yah xamgoh. Wuq shoh zo las, gohtoeu phvra mas phudyei dah shoh khyot jeis tsain shuk. 5Hauh thang lhyi nyamoq gohyuk lyis taiq zis gas, Ngamoq yah we we nyeis geh, ngamoq gas gyingshang lha namoq ma gis tanh, ge. Ngos houteh bang lyis ma yoh jhen, ngos nyamoq lyis nhaiqyo mes zis gas khanhamp eq ma jom nyi teh nghuot.
6Ngos nyamoq lyis joeng das zis nghamh thyet goeus. Hau joeng das cho yah sen lha lhaih toh goeus. Nyamoq kuot goeus cho lhyi ma lhaiq toh das, ngos nyamoq lyis 7nyamoq dah yaunos yahge nyamoq dah phauh thyeih moq dah yaunos lyis tauh dyei das. Jing thoq mas gohtoeu phvra phon mha xangh ngheq zis yah ngos lyis loeusmus soqzo. Housoeh las nyamoq kuot khoq zis yah dvyhangteh mon yih shoq nyamoq lyis joeng das, ge.
8 Yhensain heisoeh ge: Gis dah zvbiq shih lyis hank ma lhoeu thyoq; hauh gungsthaiq zvbiq jeis dvkuot. Ngos eq ngah dius jens dvnganh lyis ma mhont das. Ngos lyis phuqsoe bang lyis khyuot yoeus das. 9Yuda vkoq yah sen dah Israel jens lyis ngos shvmanh dyei das. Nyamoq dah vnyau vshih gas ngah boms mau lyis sain nhang das. Ngos khyen yoeus dah dius jens ngos lyis phuqsoe bang houmha nyeis das. 10Nyamoq ngos lyis paiq das las nyamoq dah noeu phung yvng phung lhyi buiswvng pheh dah Sharon Pa katjang yahge buisthuq pheh Yau Langhkhau mas shwih los das.#Yosh 7.24-26
11Ngos lyis tyamp las ngah gyingshang jing Zion lhyi ma soh bang, kamh phvra Gad yahge uhpui loqkyoq phvra Meni lyis paiq bang xiklyis gas, 12shotwih yah shei das zis gas namoq dah uhpui loqkyoq nghuot goeus. Khasoeh ge lyis ngos namoq lyis lui lyis namoq ma toeuh, ngos taiq lyis namoq ma gyo, namoq gas ngah domsyos ma gyo das zis yahge ma gis zis kuot das yvlyis khyen yoeus. 13Housoeh las ngos namoq lyis taiq bah, Ngos lyis paiq bang yahge ngah domsyos gyo bang gas zo das shuk das zis nyoshoq yoh das. Nghuot laus eq namoq gas zos yuot jeis shet das. Nyamoq pyo das laus eq namoq gas xoqphuh das. 14Nyamoq gas gauslaus chunghthwe kat das, nghuot laus eq namoq gas kuk las ngaus das. 15Ngos khyen yoeus toh dah ngah dius jens gas namoq dah nyings lyis nhoengh khyvlyis yhung das. Ngos Yomzains Yhensain ka namoq lyis sat das. Nghuot laus eq ngah domsyos gyo bang lyis nyings saiq dyei das. 16Mau khau mha hank laus eq shvmanh jyehjuh lyis sang soeu ka wontang dah Mangso yah shvmanh dyei das xiklyis dung chah. Hank laus eq kyamp tang soeu ka wontang dah Mangso nyings yoeus las maukhi das. Gohlhain dah yaukyenh cho ka lai loh las tohnyhik goeus, ge.
Gvnkhanh cho Vsaiq
17 Yhensain taiq, Ngos maukhung vsaiq, nyeisjvng vsaiq gvnkhanh nyeis. Xik lyis dah cho dvnganh yvlyis tohnyhik tyamp das.#Esa 66.22; 2Pt 3.13; Nyoq 21.1 18Ngos gvnkhanh cho mha vcaiq vto gausyis zis yah gauslaus nyeis geh: Ngos kuot dah Yerusalem vsaiq gas gauslaus cho dyingh shoq bos das las nyah dius jens eq pyo das. 19Yerusalem yahge nyah dius jens gvng mas ngvnyang gauslaus cho dyingh shoq bos. Houmha ngaus cho ma bos, pangh aq ge lui cho eq ma bos das.#Nyoq 21.4 20Lonoeuh jens eq shei lo das zis ma nghuot, dius jens dvnganh eq kang xing shoq nyeis das. Dvxo zvn kang dwis soeu lhyi yangh ngis shih ge nghamh das. Dvxo zvn ma jweh shei loh bang lyis gas ngos nyamoq lyis yobos dyei dah vlho nghuot das. 21-22Nyamoq yhen tsain kuot las houmha lungh das - Gohyuk hank ma los yhung das. Zvbiq khyam tsain tsungh las zvbiq xauh shuk das, gohyuk hank ma los shuk das. Ngah dius jens gas saiqzains teh kang xing shoq nyeis das. Nyamoq kuot dah muhzoh yah nyamoq dyingh shoq xauh pyo das. 23Nyamoq kuot dah muhzoh ung cho bos das, nyamoq dah lojens jens eq dyoqbis zainsmuh ma xauh das. Ngos nyamoq yahge nyamoq dah vnyau vshih lyis jweh los das buisnyeis dvnganh mas shvmanh dyei das. 24Nyamoq ngos lyis ma dye dung shih lyis yangh ngos nyamoq dung yvlyis toeuh dyei das. 25Cauhpau jens yahge yvnglo jens dvgeh zo las khangkhyi ka noeu teh huhyau zo das. Lhangnyis gas gyukphoh ma nghuot lo. Ngah gyingshang jing Zion mha jes shoh, nghuot ya ma gis cho cha ma bos das, ge.#Esa 11.6-9
Currently Selected:
ESAIA 65: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.