ESTHER 5
5
Esther Zo Pwe Khi
1Esther ka nyang womkyi dah somh vnyeih lyis nyah hwankti nyhiq gungs shunk las hwankti tank joq yvp pheh xoeu toh dah hwankti yhen khyam vkhau pheh loh yap joq. Hwankti ka vkhau mha hwankti tank mas tsung lha khomhdwang pheh nyoqnho xoeu toh. 2Hwankti nyhiq Esther ka nghe mha yap joq yvlyis hwankti nyvng lyis, Esther ka nyah xikkhonh mas nyoqnho yoh joq las hwankti ka nyah xing dunghkuq Esther jyank mas tuonh kat. Esther eq lhamloq thyoh mas los tanh. 3Hwankti nyang lyis nyei zis gas, Hwankti nyhiq Esther eh, cha nghuot? Nvng cha o zis taiq aq, yoh das. Ngah munghdan dvgohyih jweh shoq dyei das, ge.
4Esther phuk taiq zis gas, Hwankti nhaiqdoeus lyis gas, Khvnyens ngos nah xiklyis sont toh dah zo shuk pwe mha hwankti lyis Haman yah dvgeh lyih nhang mes, ge.
5Housoeh hwankti ka Esther khi yvmas yoh e shoq Haman lyis lvnyap los das xiklyis zau dang khyoq. Housoeh hwankti yahge Haman gas Esther sont toh pwe mha e. 6Zvbiq shuk nyeis lyis hwankti ka Esther lhyi nyei, Nvng cha o zis taiq aq, yoh das. Ngos nvng sang zis dyei das, nvng ngah munghdan dvgohyih sang lhyi yangh dyei das, ge.
7Esther phuk taiq zis gas, 8Hwankti ka ngos dung zis dyei das lyis gas, ngos phvnaq nyeihyo nah xiklyis gohtoeu dvlhain doms sont das zo pwe mha hwankti yahge Haman lyih shih geh. Hauh uhlyis ngos o zis nvng lyis taiq das, ge.
Haman Mordekhai lhyi Lhaink
9Haman gas zo pwe mhayah thuq loh lyis pyo pyo gausyis nyeis. Nghuot laus eq nyang hwankti yhen khyam khomh mas Mordekhai lyis nyvng. Mordekhai ka nyang lai loh lyis ma toq yap, phauh nyang vlho ma chixoeuq las Haman gas nhaiqlom phot phot tsoeu. 10Nghuot laus eq Haman nyah nhaiqlom lyis zaiq las nyah yhen pheh loh. Hauh thang lhyi nyang nyah dyenschangh jens lyis nyah yhen mha khi. Nyah yhensain nyhiq Zeresh lyis eq bos nhang. 11Haman nyamoq lyis moengs kyoh zis gas, nyang kha iq dis cho, loloeu khanyhoq yuk yoh cho, hwankti ka nyang lyis zau khom nyhang nyhang toqh dyei cho, nyang gas hwankti dah gohtoeu zau jens thoq lyis kha iq zes yhaugyen cho nghuot. 12Cha bos shih, Haman tsoq taiq shih. Hwankti nyhiq Esther ka nyang kuot dyei dah zo pwe mha hwankti yahge ngos mas lai las gohyuk hank lyis eq ma yus. Phvnaq nyeihyo eq doms yus toh shih. 13Nghuot laus eq ngos hwankti yhen khyam khomh mas Jew Mordekhai tsung toh zis lyis nyvng nyeis dvchank, hai ngos taiq cho ka ngah xiklyis chah vkyuh ma bos, ge.
14Housoeh las nyah yhensain nyhiq Zeresh yahge nyah dyenschangh jens dvnganhmoq joeui dyei zis gas, 75 pe nyhang dah lhangh sat das zains chamus ma cuk toh? Houmha Mordekhai lhyi lhangh sat das zis nvpyo hwankti lhyi sang aq. Hauh thang lhyi nvng zo pwe mha pyo pyo yoh loh, ge. Haman gas hau joeui dyei zis gis ge nghamh las lhangh sat das zains tsain cuk toh.
Ngochang Common Language Bible © Bible Society of Myanmar, 2010.