Romḛ-a 7
7
Tɨm kami tuna gṵ hul sul
1Ən ɓungɨ, ən una ɓari ɓə yḭ tɨ bi ne i una gṵ hul ɓari. Gṵ hul na dwari tɨ wo sul gorne ər ti jili ɗang. 2Kuna ne jo, gṵ hul ɓəw ii ne ko ɓər na ər ɓər gorne ɗang ər ti jili. lɛ jo ər ɓər uy teni gɨna, gṵ hul ne ɓəw ər na ər ɓər lɛm ər ɓəwlu cam lo. 3Jo ər ko ɓər jak na lula sul ne ər ɓər ɗang uy lo gɨna, ər ka juna, lɛ jo ər ɓər uy gɨna, ər tɨ kami. Gṵ hul par ər sul cam lo. Ər ɓər jak kula tɨ juna kar cam lo. 4Ən ɓungɨ, yḭ kaw i uy tuna gṵ hul sul na i paa hari na Krist. Ne gɨna, yḭ duga i ti wo jak maan, yḭr ne ər wag tɨ bi tɨ ulu daan. Nejo yi ɓə mum ndinimani ne Ndɨla hul taam kar. 5Tɨ kuri gorne toni yi ti kuna i hul taam, gṵ hul ja gɨ i ɓə wa̰y ne le tɨ ɓijim, jo gorne yi laa in kaw, i taam wa̰y ne kar. Mum ɓijim ne ka cida tɨ i ndɔ la si na i tɨ ulu. 6Lɛ ndogle, Ndɨla jul i teni tɨ gṵ hul ne par i dangay daa, kəysul yi uy teni tuna mum ne par i dangay jaa. Nejo yi wo gɨ Ndɨla cida kar na ul mu ɓaani tɨ Lal ɓari lɔ, wala na ul mu tɨ Moys na gṵ hul ne caa lo bad.
Gṵ hul la ɓijim la
7Kəy jaa jo i ɓə ja cam a? Pay yi ɓə ja ɓə gṵ hul tɨ ɓijim a? M-m, gṵ hul tɨ ɓijim lo bad! Barka tɨ gṵ hul jo ən una na ɓijim. Jo gṵ hul ja ɓə: «Əm ka ji bwi kar lo#7.7 Exo 20.17; Deu 5.21» gɨna, ən ɓə lɛm ji bwi kar una lo. 8Ɓijim ten ul mu tɨ gṵ sula ndɔ ər din ən lɔ tɨ ji bwi lɔ jak jak daan, kəysul jo gṵ hul teni gɨna, ɓijim ɓə ulu. 9Toni ɓagcari gorne ən ti bla gṵ hul una gɨna, ən ti ən tɨm. Lɛ gorne ən una gṵ hul gɨna, tɨ ɓijim jo ɗolɔ tɨ tɨm jili, 10le yin, ən uy. Nejo gṵ hul ne hiina ɓə na bi saal tɨ tɨm jili, duga ər wur ən tɨ ulu. 11Kuri ɓijim ten ul mu tɨ ən ndɔ, tɨ ən tan la, nejo ən uy. 12Kuna ne, gṵ hul may ndeeri la, gṵ sula ndeeri la, ər ti tugla la, ər ndini la.
13Gɨna, pay wa̰y ne ndinimani duga ɓə tɨm wa̰y tɨ ən humna cam a? In lo bad! Tɨ ɓijim jo si na ən tɨ ulu. Ər so wa̰y ne ɓari ər hun na ən. Kuna ne gɨna gṵ sula naa ul mu tɨ ɓijim una ɓari, ɓə ɓijim tɨ wa̰y ndinimani lo, lɛ ər tɨ wa̰y ne ɓijim ura peer.
Ɓijim ti tɨ woɓari sul
14Kuri, yi una ɓari ɓə gṵ hul o̰ tɨ Ndɨla na lal ndɔ, lɛ yin ən tɨ woɓari, yin tɨ ɓijim na ha̰r. 15Tɨ kuri ən una wa̰y ne ən wo kar lɔ lo, kəysul tɨ wa̰y ne ən taam kar jo ən ka lo, lɛ ən ka wa̰y ne ən koor jo. 16Jo wa̰y ne ən wo kar, tɨ wa̰y ne ən taam kar lo gɨna, ən ko ən mu ɓə gṵ hul ndini nari. 17Ndogle, tɨ yin jo ən ka in lo, lɛ tɨ ɓijim ne ti tɨ ən ndɔ jo ka wa̰y ne. 18Ən una ɓari ɓə wa̰y ne ndinimani ɓudu in teni wo tɨ ən ndɔ, yin ne tɨ woɓari bla, kəysul ən taam wa̰y ndinimani kar lɛ yin lɛm tɨ kar lo. 19Wa̰y ndinimani ne ən taam kar, ən lɛm ər kar lo, lɛ ɓijim ne ən taam kar lo jo tɨ wa̰y ne ən ka. 20La jo ən ka wa̰y ne yin, ən taam kar lo a, tɨ yin jo ən ka in lo, lɛ tɨ ɓijim ne wo ən ndɔ jo ka. 21Gṵ hul ne ɓla ndɔ tɨ ən ji: Gorne ən taam wa̰y ndinimani kar gɨna, tɨ ɓijim jo ən lɛm kar. 22Tuna wa̰y ne tɨ ən nirimu, ən ka ndula laar tuna gṵ hul ne o̰ tɨ Ndɨla ndɔ sul, 23lɛ ən ləg ən ndula ya̰m gun, gṵ hul paa jak wo nin, ər moon sal na gṵ hul ne ən ilgɨ ko mu tɨ sul. Gṵhul jak ne par ən dangay tɨ ɓijim na gṵ hul ne wo tɨ ən ndɔ. 24Yin tɨ wo tɨ jindemni! Jaa jo ɓə ən ndula ne tɨ ulu maan hura a? 25Ka yi ka gɨ Ndɨla ne hura ən barka na yi Baali tɨ Jesu Krist!
Kuna ne, yin, na ən wa̰y una, yin tɨ gṵ hul tɨ Ndɨla maan na ha̰r, lɛ na ən ndula yaam, yin tɨ ha̰r tɨ gṵ hul tɨ ɓijim maan.
© 2023, ATALTRAB