Romḛ-a 2
2
Ndɨla na jaa tungni
1Yim, tɨ jaa tɨ jaa tungni tɨ əm peer sul a? Ndɨla hul ɓə ɗina tɨ əm sul lo bad. Jo əm tung jaa tɨ əm peer sul gɨna yim mam ɓə jaa ɗula tɨ əm sul, kəysul əm ka mum ne ya̰ ka la. 2Yi gun i una ɓə Ndɨla na jaa tungni tɨ bi ne ka mum kuna ne sul tɨ tugla. 3Yim ne əm tung jaa tɨ əm peer sul tuna mum ne a ka jo yim mam ka la, pay əm ilgɨ ɓə Ndɨla ɓə jaa tungni tɨ əm sul lo a? 4Ɓee əm ləg Ndɨla na ɓari ɗəng la, ər hul ɗula la, ər hul ɓɔr ne jul əm kwi tɨ əm haal yiga kuna wa̰y bla a? 5Əm ɓini jaa laa la, əm ɓini yɛr la, kuna paa ne gɨna, mam ka jaa ne a ɓə tungni tɨ əm tɨ ɗəng ɗa̰y ne Ndɨla na hul laa la, ər jaa tungni ne tugla ɓə tɨba tɨ bi sul. 6Na ɗa̰y ne, Ndɨla ɓə gɨ jakaw wa̰y tɨ daa sul naa tuna ər mum tɨ kar. 7Ndɨla ɓə tɨm jili na kwi naa gɨ bi ton wo gɨ peer ɓari kar na hul par sɨgra la, ton taam taan la, hormo̰ la, tɨm jili ne tong lo la. 8Lɛ Ndɨla na ji hiina la, ər jaa tungni la, ɓə tɨba tɨ bi ne taam ər jaa kuri oy lo la, bi ne ti tɨ ɓijim lɔ sul la. 9Pɛw la ngɨnɨm la ɓə tɨba tɨ bi gun ne ka ɓijim sul. Tɨ Juyb-a sul toni barita, ɓə an tɨ bi ton tɨ Juyb-a lo sul. 10Ndɨla ɓə taan la hormo̰ la lapya la wur tɨ jakaw ne ka ɓari sul. Gɨ Juyb-a toni barita, gɨ bi ton tɨ Juyb-a lo la. 11Kəysul Ndɨla jugɔ wo lo. 12Bi gun ne ka ɓijim bla Moys na gṵ hul una, a ɓə ulu lɛ a ɓə ja tungni tɨ a sul na gṵ hul ne lo. Lɛ bi ne una gṵ hul ne la, a ka ɓijim la, a ɓə jaa tungni tɨ a sul na gṵ hul ne. 13Kəysul bi ton laar a jaa ne laa bla wa̰y kar, a ɓə tɨm bi tugla tɨ Ndɨla kwi lo, lɛ bi ne so ka na cida ɓə tɨm bi tugla tɨ Ndɨla kwi. 14Gorne bi ne tɨ Juyb-a lo ne a una Moys na gṵ hul lo lɛ a ka cida kuna a una gṵ hul ne toni gɨna, a ka kuna ya̰ na gṵ hul ne tɨ a hul teni jo a edɨ lo kaw. 15A ɓla na a mum tɨ kar ɓə mum ne gṵ hul ɓiri wo tɨ a hul. A nirimu ja jaa tuna wa̰y ne sul la, a ilgɨ kaw ɓla ɓə ya̰ mɨna lɛm mum ɓijim ne a ka la mum ndinimani ne a ka la una. 16Tɨ mum ne ɓə ndula ɓla tɨ bayri ɗa̰y ne Ndɨla ɓə jaa tungni na Jesu Krist tɨ mum kuru ne bi ka sul. Jaa Ndinimani ne ən ɗo ər beel ja kuna ne la.
Juyb-a la gṵ hul la
17Lɛ yim ne əm ja ɓə yim tɨ Juyb, əm ɗɛgɨ tɨ gṵ hul sul la əm ɗɨb əm tən ɓə yim tɨ Ndɨla na wo. 18Əm una wa̰y ne ər hul taam la, gṵ hul ɓla gɨ əm wa̰y tugla ɛr la. 19Yim ne əm ɗo əm hul ɓə yim wo tɨ bi tɨ ji nina ul ɓla la, əm tɨ un ndeeri gɨ bi ne yang tɨ un ɗoyri daan la, 20əm tɨ wo tɨ bi tɨ wa̰y una lo jicina ɓla la, bi ne dwari gaw wa̰y ɓla la, kəysul əm una ɓari ɓə gṵ hul, naa gɨ əm wa̰y tɨ una la kuri tɨ Ndɨla maan. 21Ɓari, yim ne əm wo gɨ əm peer wa̰y edɨ, ka waa ta əm edɨ əm ndɔ wa̰y lo a? Yim ja gɨ əm peer a ka wa̰y sila lo, lɛ əm sila! 22Yim ne əm ja gɨ əm peer a ka juna kar lo, lɛ əm ka juna! Yim ne əm koor uri kar, lɛ əm sila mum tɨ uri tɨ ləgɨ hul! 23Əm ɗɨb əm tən na Ndɨla gṵ hul, lɛ əm wur kaar tɨ Ndɨla sul kəysul əm oy gɨ Ndɨla gṵ hul lo! 24Nejo, kuna a kya̰ tɨ maktub tɨ Ndɨla maan hul ɓə tɨ yḭ jaa jo bi ne Juyb lo ɓurum Ndɨla ndil. 25Kuri, jo əm oy gɨ Ndɨla gṵ hul gɨna, əm cina ɓina na ji, lɛ jo əm oy gɨ Ndɨla gṵ hul lo gɨna, əm cina ɓina ji teni, əm ti kuna wo tɨ cina ɓina lo. 26Lɛ jo wo bya̰ ər cina lo lɛ, ər oy gɨ Ndɨla gṵ hul, pay Ndɨla ɓə ər ləg kuna wo tɨ cina ɓina lo a? 27La wo ne oy gɨ Ndɨla gṵ hul bla ər cina ɓina ɓə jaa tungni tɨ yim ne əm oy gɨ Ndɨla gṵ hul lo, jo əm na Ndɨla na maktub la əm ɓya̰ əm cina kaw. 28Tɨm Juyb ne kuri tɨ ndula ɓla tɨ bayri ngoy lo la cina ɓina kaw tuna ndula ya̰m sul tɨ bayri lo la. 29lɛ Juyb ne kuri tɨ yḭr ne tɨ Juyb tɨ ər nirimu la, cina ɓina ne kuri tɨ cina ɓina ne Lal ɓari jo kya̰ tɨ wo nirimu wala tɨ yḭr ne a kya̰ tɨ gṵ hul ne woɓari ɓə oy na ɗa̰y sul lo. Juyb ne kuri ten ər taan tɨ biɓari ndɔ lo, lɛ tɨ Ndɨla ndɔ.
Currently Selected:
Romḛ-a 2: nie
Highlight
Copy
Compare
Share
Want to have your highlights saved across all your devices? Sign up or sign in
© 2023, ATALTRAB