Yohanna 20

Emfǝɗka Yeso ɓa ɓǝ wǝr tina sal

1A kaa ntiiri tǝro mbutu ɓa, Maryamu u ur Magadala wa, yǝ ko a han tina ɓa ma ɗenda naakǝn si handa too sundu ra, pa yǝ wǝr ɓaa tǝng ɗungara u ɓaa likisǝ tina siso wa. 2Pa yǝ mon yǝ ko a Bitrus ni ma aufǝɗke u Yeso yǝn yausǝsǝ kwang siya, yǝ ɓǝ nkee me, “Ɓaa too Ankundi a tiinan, tǝ maa han ɓaa tisǝsǝ ɓa ra.”

3Pa Bitrus ma aufǝɗke kara ɓǝ nii ɓǝ ko a han tina sǝɓa. 4Nsaad raɓ siso ɓaa moone, pa ate aufǝɗke kaya, yǝ mon yǝ talǝ Bitrus, yǝ nkaa kano a han tina ɓa. 5Yǝ kwirsǝ yǝn ngiɗing ɗaanda tina wa, yǝ wǝr luktu hok woɗɗa wa, pa yǝ kan da. 6Pa Bitrus yǝ wo ma ndiira usu, yǝ kana tina kawa, yǝ wǝr luktu hok woɗɗa wa ta kǝnso, 7ɗǝm ma luktu hok woɗɗa wa u ka ɓaa tisǝ lau ɗuura Yeso ra wa. Luktu kawa ɓaa ɓǝrkǝsǝ nkweera ira a kalla fin mbusa, sem a han fina ma luktu woɗɗa kawa ra. 8Ndiira usu, ate aufǝɗke yaa yǝ kansǝ a han tina sǝɓa a ntiiri siya, yǝ kan ɗaan a tina siso kǝn. Sase ma yǝ wǝrsǝ wa, yǝ na ɓongtǝra. 9Ding a fersiso, kaɓǝ maa me ɓaa ka wee nyoron a likarkar me, tommon ɗaɗ, Yeso yǝ nii a tina ra.

Yeso yǝ weɗɗa ee usu a Maryamu u ur Magadala wa

10Pa emfǝɗkaa sǝsa ɓǝ kang ɗuuru ɓosa, 11pa Maryamu usu, yǝ nǝɗ a ee tina ya taandi, yǝn teetee. 12Yǝsǝ a oro wa, pa yǝ nttiima, yǝn ngiɗing tina kawa. Pa yǝ wǝr ɓantimira Kaa ɓa raɓ, ɓǝ kǝɗ ma lukta pengpeng a ham ka ɓaa tisǝ Yeso ɓa, ate fin, yǝ kaɗ ma lau ɗuura wa, ate fin ya ɗǝm, ma lau kwelkete wa.

13Ɓaa taa me, “Toone, ngǝn tee mbiu?”

Yǝ nkee me, “Ɓaa too Ankundi yaane aa faɗɗan, ɗǝm nǝ maa han ɓǝ tisǝsǝ ɓa ra.” 14Yǝ feɗsǝ nkee maaso wa, pa yǝ kǝrtǝ yǝ wǝr Yeso kǝɗ, pa yǝ maa me ǝn Yeso ra.

15Yeso yaa nkee me, “Toone, ngǝn tee mbiu? Ngǝn kǝr yamniu?”

Sase yǝn sen me, ǝn an war ɓabra sǝra ya, yǝ nkee me, “An taanda ya, me ngǝ toosǝ ngase, ǝnǝ nkee ham ngǝ tisǝsǝ ɓa, nase kǝn, ko naa too.”

16Yeso yaa nkee me, “Maryamu.”

Pa yǝ kǝrtǝ ma lau Yeso wa, yaa nkee ma ee ɓaa Yahudawa ɓa me, “Rabboni!” Uǝn sensǝ me Malǝm wa.

17Yeso yaa nkee me, “Ngǝnǝ ma ra, me ding waso, nǝ kang a Paapa ni sundu ra. Nwa ngo a ɓaata ɓǝna ni, ngǝ ɓǝ nkee me, nǝn kang kang a Paane ni, ɗǝm Paase kǝn, a Kaa ɓǝna ni, ɗǝm Kaa ɓǝsaa.”

18Pa Maryamu u ur Magadala ya wa, yǝ ko yǝ nkee emfǝɗka sǝɓa, “Nǝ wǝr Ankundin!” Pa yǝɓǝ nkee mbu Yeso yǝ nkeesǝsǝ ɓa.

Yeso weɗɗa ee usu a emfǝɗkaa ɓǝsa ni

19Ma ɗikira kaa sǝsa, ǝn kaa ntiiri lumu ɓa, emfǝɗkaa Yeso wa ɓǝ kwau a han fina, ɗǝm inntii hit ɓǝsǝ ɗaan ɓa neusǝ nsaad, me ɓǝn kura kokto ɓaa Yahudawa ɓa. Pa Yeso yǝ wo yǝ nǝɗ kǝɗ a ɗaaso ɓoso, yǝɓǝ nkee me, “Sǝ naupa!” 20Pa ndiira yǝ nkeesǝ maaso wa, yǝɓǝ weɗɗa nema isa ma kal mbere isi. Pa emfǝɗkaa ɓǝ hur kuɗa ma wǝro Ankundi wa.

21Pa Yeso yǝ ɓaarǝ yǝɓǝ nkee me, “Sǝ naupa! Nga Paapa yǝ timinǝsǝ wa, maaso kǝn, nase nǝn timisǝsǝ wa.” 22Yǝ nkeesǝ maaso wa, yǝɓǝ hur heemǝra ira, yǝ nkee me, “Sǝ kon Wis Ɗekɗek wa. 23Nsaad ɓaa sǝ leeɓǝsǝ tenatenato ɓosa ɓa, ɓaa lee ɓǝn. Nsaad ɓaa sǝ leeɓǝsǝ tenatenato ɓoso ra ɓa, ɓaa lee ɓǝ ra kǝn.”

Yeso yǝ weɗɗa ee usu Toma

24Pa Toma, yaa ɓan yarsǝsǝ me, em raɓ ɓa ya, yǝ fin a ɗaaso ɓaa puu nhaa raɓ sǝɓa, usu yǝ sem a kalla a fer Yeso yǝ wosǝ wa ra. 25Ndiira usu ɓaata emfǝɗkaa ɓa, ɓaa nkee me, “Tǝ wǝr Ankundin.”

Pa Toma usu yǝ nkee me, “Ndub me nǝ wǝr npoo u kusamse wa a nem isin, ɗǝm nǝ tung wat yaane a npoo usu, nǝ ɗǝm tung nem yaane aa kal mɓere isi, me sem maaso ra, nǝ na ɓongtǝra ra.”

26Ndiira tǝro kurkurun wa, emfǝɗkaa ɓisa ɓaa hito ɗǝm, Toma yǝ ke ma ɓosa, inntii neusǝ, pa Yeso yǝ wo yǝ nǝɗ kǝɗ a ɗaaso ɓoso, yǝɓǝ nkee me, “Sǝ naupa!” 27Pa yǝ nkee Toma me, “Aa tung wat nyaange a hamɓa, aa sengge nema sǝnaa. Aa mal nem nyaange ngǝ tung a kal mɓere yaa ne. Aa lee pǝno, ngǝ na ɓongtǝra.”

28Toma yǝ nkee me, “Ankundi yaane ma Kaa ɓǝna ɗǝm!”

29Pa Yeso yaa nkee me, “Nwa ngǝ wǝrnǝsǝ wa nhe, pa ngǝ na ɓongtǝrau? Saltǝra a ɓaa ɓǝ wǝrnǝ ra ɓa, ɗǝm ɓǝ na ɓongtǝran.”

30Yeso yǝ tom mbusan dem u nhiinyanhiinya wa a wii emfǝɗka ɓisa wa, u ɓaa nyor a likarkar nwa ra wa. 31Pa ɓaa nyor u nwa, me sǝ na ɓongtǝra me, Yeso yǝ Almaseho, Au Kaa ya, ɗǝm ma lau naɓongtǝra wa, kǝsǝ taa huurtu ɗaan a ɗǝnda ira.

Currently Selected:

Yohanna 20: LLA

Highlight

Copy