Ayyukan 27

Bulus yǝ tal yǝ ko Roma

1Pa ɓaa kansǝ me kǝtǝ nii tǝ ko Italiya wa, Bulus ma ɓaata pursuna ɓa ɓaa lee a neme a kuɓ kwang nsosa Roma ya ǝn yarsǝ me Yuliyas wa, fina a ɗaaso wiina nsosa u Kaisar wa. 2Tǝ kansǝ a kurnyaamo u fiɗsǝ Adiramitiyum wa, u ko a ham kurnyaamo ɓǝn tǝngsǝ ura ɓolɓol pa yǝ kan a Asiya wa, pa tǝ ntii siko a aulaara. Aristarkus eɗ Tasalonika ke u a put Makidoniya wa, yǝ ke ma taase.

3Handa weesǝ wa tǝ kan Sidon; pa Yuliyas yǝ weɗa yauta Bulus ma lau yǝ leesǝsǝ me yǝ ko a sik ɓisa ni me minda kiya taa mbu kǝsa kwasi ɓa. 4Tǝ niisǝ kǝnso wa tǝ kana kurnyaamo ɗǝm kaaɓisa yoro kwang pa tǝ leurǝ kǝk ma Sayifurus wa han yoro sem kwang ra ɓa. 5Pa tǝ talsǝ aulaara Kilikiya ra ma Bamfiliya tǝ kan Mira a put Likiya wa. 6Pa kǝnso kuɓ kwang nsosa Roma si ya yǝ wǝr kurnyaamo u Alekzandiriya wa yǝ ko Italiya pa yǝtǝ tung a si. 7Tǝ mon nlaa tǝ tǝr dem a ɗǝɗa tǝ wee kongsa pa tǝ kan Kinidus. Pa yoro yautǝsǝ me tǝ faɗ wiiyo ra wa, pa tǝ leurǝ ma kalla tǝ ko kirit a kal Salmoni wa. 8Tǝ tallǝ ham sǝsa ma kongsa pa tǝ kana a hanka ǝn yar me ham ɓan yausǝ me a nfaa ɓa kwang a ur Lasiya wa.

9Me a fersiso ndǝ kirin kwang kǝnso, pa siko a tom ma kongsa, me a fersiso meera tommon mǝbmǝb, a fersiso mbukamsa ɓisi se mbuseya wa wee talon.#27:9 Mbukamsa lee a senda siso; ǝn tom a feɗefeɗe ofe wanakurun ya ko a ntiiri ofe puu ya, a fersiso yoro ǝn tom kwang a aulaara. Pa Bulus yǝ ɓǝ nkee me, 10“Ɓeta, nǝ wǝr siko yau wa kǝnɗǝ wo ma kongsa, kurnyaamo ma mbu ɓǝnda kǝ tǝblǝ nsaad ɗǝm huurtu yau kǝ toma kongsa.” 11Pa kuɓ kwang nsosa Roma siya yǝ yau ma mbu Bulus yǝ nkeesǝ ɓa ra, pa yǝ yau ma mbu an nyaa kurnyaamo ya ma an kurnyaamo ya ɓǝ nkeesǝ wa. 12Pa Likiya pam me kurnyaamo ɓǝ fiɗ handa kǝnsora, ɓeta dem a ɗaaso ɓoso ɓǝ nkee me ndǝ kweetǝ ndǝ tallǝ ndǝ kan Finikiya me kǝ tommo ndǝ kaɗ rara kǝnso. Finikiya ǝn ham Kurnyaamo ɓǝn nǝɗsǝ a Kirit u yǝn sengǝsǝ lau yoro yǝn bǝɗsǝ ɓa.

13Pa ɓǝ kurasǝ yoro ǝn nyanya fiɗsǝ ma lau kudu ra wa, ɓǝ sen me ɓǝ taa mbu kaɓǝn taasǝ ɓan, pa ɓǝ kee kurnyaamo suwa a mbu kaasǝsǝ ɓa ɓa tal ma lau kal Kirit wa. 14Tom kwaɗ ɗa pa kuɓ kwang yoro kokrokto ke yǝ fiɗ ma lau kwasa ra ma han kaa yǝn fiɗsǝ ɓa, yǝn tǝng tǝ kurnyaamo waato tǝ kang a aulaara. 15Pa yoro ka wa yǝ wosǝ maaso wa kurnyaamo waato yǝ nkaa yǝ loo ra pa ta lee yor ka wa yǝn tǝng tǝ tǝn bǝɗsǝ. 16Tǝ leurǝsǝ ma tsibiri ke ngeek u ǝn yarsǝ me Kauda wa, pa tǝ kweetǝ ma kongsa tǝ wiin kurnyaamo ngeek wa ta kan ɗaan a u kwang wa. 17Pa ɓǝ tisǝ au kurnyaamo ya ɗaan a u kwang wa wa pa ɓǝ kaa ma kurti ɓaa leurǝ kuɓ kwang kurnyaamo sisi me ɓǝn kura kokto me tom ɓǝ naa a nsera a kunda aulaara Sirtis yara, pa ɓǝ ke kurti masǝ kurnyaamo ra ɓǝ lee kurnyaamo suwa yǝ bǝɗ ma lau yoro ǝn kosǝ wa. 18Handa weesǝ wa yor ka wa yǝ nyaa kwang ɓǝ haa mbusa pera a kurnyaamo ka ɓa ɓǝ yaɓ a mbraa. 19Tǝrsǝ taatǝn wa, ma nema ɓosa ɓǝ nhaa mbu tinima kurnyaamo ka ɓa ɓǝ yaɓ a mbraa. 20Pa tǝ tǝrsǝ dem wa, tǝ wǝra osa hana seklǝmeta ra me yoro kokrok siso yǝn faɗ wiiyo ma nyaa. Pa tǝ ti senda me tǝ noo ra.

21Ndiira tǝrsǝ kwang mbuseya semra wa, Bulus yǝ nii kǝɗ yǝɓǝ nkee me, “Parata, kama sǝ kuranǝ nǝ nkeesǝsǝ me ndǝ tǝng kirit. Pa kama kama sǝ kana kongsa sa ra ɗǝm kama mbusǝsa tǝblǝra. 22Pa waso nǝn nkeesǝ hana yamni yǝ tom ma naankwiiti wa me yaake yǝ wodɗa a ɗaaso waso ra kurnyaamo kiya tǝblǝ sase seɗe. 23Ura a pǝrtǝra an timira Kaa ya yaa nǝsǝ usu ya, ɗǝm yaa nǝn nyoo sǝsǝ ya yǝ nǝɗ a kalla a nani 24yǝnǝ nkee me, ‘A kura kokto ra, Bulus. Kǝ ngǝ nǝɗ a kiita a wiiyo a Kaisar ni, ɗǝm me ngase Kaa yǝ yau ngǝsǝ kon nkweera nsaad ɓaa ɓǝsa a kurnyaamo siso ɓa.’ 25Saa ɓeta, me maaso sǝ tom naankwiiti wa ɓaatǝ, me nǝ ma ɓongtǝra a Kaa ni kiya tom nga yǝ nkeenǝsǝn wa. 26Pa tommon ɗaɗ yoro nɗǝn mudkǝ a nsera tsibiri ra.”

Kurnyaamo yǝ ookǝ

27A pǝrtǝra puu nhaa kurun nda, yoro yǝn tǝngtǝng ding a aulaara Adiriya ra. Pa a pam pǝrte ɓan tinima a kurnyaamo sǝsa ɓǝ wǝr nga ɓǝ kǝk ma putu. 28Pa ɓǝ pǝtasǝ mbraa kama wa, ɓǝ wǝr kututub usu kansǝ naata pusa puu a nhaa puusa. Tomsǝ singǝ wa ɓǝ ɓaarǝ ɓǝ mǝdkǝ kututub to usu kangan nata puu wanakurun. 29Pa kokto me tom kurnyaamo ɓoso yǝ kǝu kundate ra, pa ɓǝ mudkǝ anka kurun u nɗiira kurnyaamo wa#27:29 Ən nɓaa u ɓan kwaa kǝsǝ a kira aulaara ra ma yǝ ma kurnyaamo me yǝn faɗ ɗa. me tom kurnyaamo yǝ faɗ ɗa. Pa ɓǝ tom kǝnara me handa a wee naakǝn. 30Pa ɓan nyaa kurnyaamo sǝɓa ɓǝn taa me ɓǝ mono pa ɓǝ ham ma kurnyaamo ngeek wa ɓǝn weɗa nga ɓǝn kwaakǝ anka ma lau wiiyo kurnyaamo wa. 31Pa Bulus yǝ nkee kuɓ kwang nsosa Roma siya ma ɓaata nsosamse ɓa me, “Mee ɓet ɓa ɓǝ nǝɗ ɗaan a kurnyaamo ra sǝ noo ra.” 32Pa nsosamse siya ɓǝ ɗǝm kurti kasǝ kurnyaamo ngeek suwa wa ya lee yǝ bǝɗ mbraa.

33Handa tomsǝ ngwang me kǝ wee wa Bulus yǝɓǝ kǝna nsaad me ɓǝ se mbuseya, “Waso tǝro puu nhaa kurun sa taarǝma sǝ se mbuseya ra. 34Wa nǝn kǝna sǝ, sǝ se mbuseya me sǝ ɗanyǝ. Me yaa ke sem kǝn a ɗaaso waaso kiya nfaa hana nhiinyo fin a ɗuura ira wa ra.” 35Ndiira Bulus yǝ nkeesǝ mbusa maaso wa, yǝ too nkaadǝng yǝ na himara Kaa, pa yǝ ɓaa a nuuwa ɓosa yǝ ntii kǝuwǝ. 36Ɓǝ taa naankwiiti wan hana yamni yǝ nkaa yǝ se mbuseya. 37Ɓaa ɓǝsa a kurnyaamo sǝsa nsaad ɓǝ kansǝ 276. 38Pa ɓǝ sesǝ ɓǝ kwee wa ɓǝ haa muuma ɓǝ yaɓ a mbraa me kurnyaamo yǝ tom fekfek.

39Handa weesǝ wa ɓǝ maa put siso ra, pa ɓǝ wǝr hanka a ɗaaso nseera kwausǝ ɓǝ taa me ɓǝkǝ ko ma kurnyaamo ɓoso kǝnso mee kǝ tommo. 40Pa ɓǝ ɗǝm anka ɓǝ yaɓ a mbraa. A fersiso ɗǝm ɓǝ ke kurti masǝ ɓot nyaa kurnyaamo ya. Pa ɓǝ nik pilang kurnyaamo ka wa men yoro yǝɓǝ tǝng ɓa ko a han ɓǝ wǝrsǝ ma nseera sǝɓa. 41Pa kurnyaamo ka wa yǝ timbi nseera ma wiiyo yǝ naa rang yǝ nkaa yǝ mon ɗǝm ra, pa kurnyaamo ka wa yǝ ntii kawo ma ndiira yǝn yaasǝn yaasǝ meen parparto mbraa wa.

42Pa nsosamse siya ɓǝn sen me ɓǝkǝ tod pursuna sǝɓǝ me tom yaake yǝ mon yǝ ham a mbraa yǝ noo ra. 43Pa kuɓ kwang nsosa Roma siya yǝn taa me kiya kwasi Bulus me ɓaa ǝn todɗa, pa yǝ yau ma mbu nsosamse ɓǝn sensǝ ɓa ra. Yǝ ti ɓeta nsaad yayǝ maasǝ me kiya nkaa yǝ ham a mbraa yǝ fiɗ ya, yǝ ham yǝ fiɗi yǝ ko a kira. 44Ɓaata ɓǝ laɓ kataka ma pepere kurnyaamo okǝsǝ ya ɓaa bǝɗ mbraa. Maso nsaad ɓaa tal a kira kwakwa.

Currently Selected:

Ayyukan 27: LLA

Highlight

Copy