Likarkar rabte Bulus yǝ nyorsǝ Timotawus wa 4

1Nǝn nkee ngǝ mbu ɓa a wiiyo a Kaa ni ma Krisiti Yeso, yaa kiya kan kiita ɓaa ma huurtu ɓa, ma ɓaa ɓǝ woɗsǝ ɓa, ɗǝm kiya wo yǝ tom kuɓsutu usu, nǝn nkee ngǝ me, 2a nkee mara Kaa ra ɓeta, hana ma ɗǝɗa hana ɗǝɗa sem ra. Ngǝ ɓǝ sǝkǝ, ngǝ ɓǝ nkwaakǝ ɗǝm ngǝ ɓǝ na'nkwiiti ma sǝmmo, ɗǝm ngǝ ɓǝ fǝɗkǝ mara Kaa ra nlaa. 3Me fer usu kǝ wo, u ɓeta ɓǝ waando ma fǝɗkǝra ɓongtǝra wa ra. Pa me ɓǝn bǝɗ mbu kuɗa ɓosa ǝn yausǝ ɓa, ma mbu ngweeme ɓosa ǝn taasǝ me yǝ kura ɓa, ɓǝkǝ kwau malǝmma ɓǝ ka nkee mbu ɓǝn taasǝ me ɓǝ kura ɓa. 4Ɓǝ kǝ kǝrtǝ ngweeme ɓosa a fǝɗkǝra u ɓongtǝra wa, pa ɓǝkǝ kǝrtǝ ɓǝn kura tikaa u sem yaɓ ra wa. 5Pa waango, a ma ɗuura nga a mbusa nsaad, a kaa kuɗa a kongsa ɗaan, a nkee mara kwalari Yeso ra, ngǝ tom tinima u hoora Kaa ra wa.

6Pa waano, ɓaa wee nǝ naan nga na baiko wa, fer ko waano wa tommon. 7Nǝ tom sǝukǝra u yaɓ wan, nǝ feɗ moone kayan, nǝ ma na ɓongtǝra nwaanon. 8Waso, waano ɓan war nǝn wara ma kukǝra kaɗɗo keke a wiiyo a Kaa ni wa. U Ankundi yaande, an kan kiita ya ya, kiyǝ nǝ na a kaa feɗefeɗe ɓa, sem niina fin mana ra, pa ma nsaad ɓaa ɓǝn warsǝ wo usu ɓa.

Feɗefeɗe mara ya

9A kweetǝ ngǝ wo a nani nakǝn, 10me Dimas leenǝ, me yǝn waando mbu kaɗɗo taandi wa ɓa, yǝ faɗ Tasalonika. Karaska yǝ faɗ Galatiya, Titus yǝ faɗ Dalmatiya. 11Ən Luka fin mbusa tǝsǝ ke wa. A kǝr Markus sǝ wo ke, me yǝma kwasira a nani a tinima ma. 12Nǝ timi Tikikus me yǝ ko Afisa. 13Me ngǝn wowo, ngǝnǝ wo ma luktu songra waano nǝ leesǝ a Karbus ni Toruwas wa, ma likarkar sǝna, ma ɗǝm ntaa u nyorma u faɗ nǝsǝ rǝka wa.

14Alekzanda an tee tiyo ya yǝ tom nǝ mbuka kwalakwala. Ankundi yaande kiya puu a mbu yǝ tom nǝsǝ ɓa. 15Ngase kǝn ngǝ tom nlaa ma sase, me yǝn yauwa ma mara ndaa ra.

16A fer kankiita a ntiiri wa, ate ke semme yǝn konnǝsǝ ee wa ra, pa hanan yamnǝ yǝ monon. Kaa yǝɓǝ kankiita a mbu ɓǝ tom nǝsǝ ɓa ra. 17Pa Ankundi yaande yǝ ke ma niina, yǝ nanǝ kokrokto, me ma lau waano ɓaa nkee mara Kaa ra ɓaa ɓǝn Yahudawa ra ɓa nsaad. Ɗǝm ɓaa hik nǝ a ee namo yan. 18Ankundi yaande ki yǝ nǝ hik a mbu tentena ɓa nsaad, ɗǝm kiyǝ nǝ wo a kuɓsutu usu a liura kwakwa. A sanii too aa kaɗ ke ma sase feɗefeɗe sem ra. Aa kaɗ maaso.

Feɗefeɗe tooma ya

19A too Biriskila ma Akila ma taanda Onesiforus ra. 20Arastus yǝ kaɗ Korinti, ɗǝm nǝ lee Turofimus sem kwakwa ra a ur Militus wa. 21A kweetǝ ngǝ wo pa rara yǝ wo. Yubulus ma Fudens ɓǝn to ngǝ ma Lainus ma Kalaudiya ma ɓaata nsaad, 22A lee Ankundi yaande yǝ kaɗ ke ma wis waango. A lee kwasira Kaa ra a kaɗ ke ma saase nsaad.

Currently Selected:

Likarkar rabte Bulus yǝ nyorsǝ Timotawus wa 4: LLA

Highlight

Copy