Likarkar rabte Bulus yǝ nyorsǝ Timotawus wa 1
1
1Likarkar wa fiɗ a Bulus ɓahone Krisiti Yeso yani yaa yǝ taasǝ yawo lau Kaa ya. Kaa yǝ timinǝ me nǝ nkee waa huurtu wa u yǝsǝ ɗaan a Krisiti Yeso ni wa.
2Nǝn nyor ngǝ Timatawus auwane nǝn taasǝ ya. Aa lee kwasira ma nyorataara ma kaɗɗo hurhur u fiɗsǝ a Kaa Paapa ni ma Yeso Almaseho Ankundi yaande, aa kaɗ ke ma saase.
Ngǝ kura ɗuura waara ra
3Nǝn na himara Kaa, yaa nǝn tomsǝsǝ tinima ya, nga sirta ɓǝna ɓǝ tomsǝ wa, ma kuɗa fin, nga fer nǝn ɗimsǝ ma ngiinga a kǝnara na pǝrta ma kaa wa. 4Me nǝ ɗimma kǝlkǝlta nga nǝn, ǝn tǝnǝ me nǝ ngǝ wǝrǝ, me nǝ kung ma kuɗa pengpeng ra dem. 5Nǝ ɗimin ma na ɓongtǝra u teno waango wan, nkamǝra na ɓongtǝra wa, u kǝkaange Loyis ma maange Yunis ɓǝsǝ ma siso wa, nǝ maan me ngǝma siso kǝn. 6Me maaso nǝn ɗim ngǝ me a tom tinima Kaa na ngǝsǝ ɓa ɓong, a fer nǝ ti ngǝsǝ neme u saltǝra wa. 7Me Kaa yǝ na ndǝ wis kokto wa ra, pa yǝ na ndǝ wis ma kwangto wa, ma u yauta wa, ma u ma ɗuura wa.
8Me maaso ngǝ kura ɗuura nwaara ngǝ nkee mara Ankundi yaande wa ra, hana ɗuura nwaara na me ɓaa neunǝ men saase wa. Pa a kaɗ ke ma niina ɗaan a kongsa men Mara Kwalari ra, ma lau kwangto Kaa wa. 9Yǝ konnkweera yǝ ndǝ yar a kaɗɗo Wis ɗekɗek wa, sem me ndǝ tom mbuka kera, pa men mbu yǝn taasǝ ɓa ma kwasira ira. Kwasira ra ɓaa na ndǝ a Krisiti Yeso ni si ɓa mar put taandi wa ra, 10pa waso ɓaa weɗan a talte ma lau wo an kon nkweera yaande, Krisiti Yeso, yaa yǝ muɗkǝsǝ woɗɗa yaa wo ma huurtu ya. Ɗǝm ma lau Mara Kwalari ra yǝ weɗa ndǝ kaɗɗo u feɗ ɗa ra wa, a talte. 11Men Mara Kwalari ra ɓaa taunǝ me nǝ kaɗ eɗ nkee mara Kaa ra ya, ma ɓahone ma malǝm. 12Ən mbu kwaasǝ nǝn weesǝ kongsa nga nǝsǝ wa. Pa ding waso ɗuura nwaa na ra, me nǝ maa yaa nǝn nasǝ ɓongtǝra a sani yan, ɗǝm nǝ yauwan kiya nkaa yǝnǝ war mbu yǝ nanǝsǝ ɓa a wo a kaa sǝsa.
13Aa ma fǝɗkǝra u ɓongtǝra siso kwakwa, u ngǝ kurasǝ a nani wa. Ɗǝm ngǝ tom mǝɗkǝra ma siso, wato, fǝɗkǝra u fiɗsǝ ma lau na naɓongtǝra wa, ma yauta u sǝsǝ ma siso a Almaseho Yeso ni wa. 14A war fǝɗkǝra yaɓ u ɓaa ti ngǝsǝ a nema sǝnga wa, a war ma kwasira u Wis Kaa wa yǝsa a dani wa.
15Ngǝ maan me hanan yamni a put Asiya wa yǝ kǝrtǝnǝ ndiiran, nsaad ma Faijelus ma Hamojenis.
16A lee Ankundi yaande yǝ weɗa nyorataara a taanda Onesiforus ra, me nfee yǝn naa nǝ nkwiiti, ɗǝm yǝ kuraa ɗuura nwaara me nǝ ma sakla ra. 17Pa tomsǝ maaso wa, fer yǝ kansǝ Roma wa, yǝ kǝrnǝ ma kongsa pa yǝ wǝrǝ. 18A lee Ankundi yaande yǝ waando me Onesiforus yǝ taa nyorataara a sani a kaa feɗefeɗe ɓa! Ngǝ maan me yǝ kwasi ni dem a ɗǝta ɓolɓol a fer nǝsǝ Afisa wa.
Currently Selected:
Likarkar rabte Bulus yǝ nyorsǝ Timotawus wa 1: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
