2 Korantiyawa 6
6
1A tinima taa ke ma Kaa wa, tǝn kǝnasǝ, saase sǝ konsǝ kwasira Kaa ra wa, sǝ lee aa tom mbu sal ɓa ra. 2Sǝ kura mbu Kaa yǝ nkeesǝ ɓa,
“A fer kwasira wa, nǝ kurangǝn.
Ɗǝm a kaa konnkweera wosǝ wa, nǝ kwasingǝn.”
Waso ɗǝm ǝn fer u kǝsa kon kwasira Kaa ra wa, naso ǝn kaa konnkweera ɓa.
3Tǝ tom mbu kwiɗɗa a yaake ni ra, me tom aa taa mbu sǝrma ɓa a tinima ta ra. 4Pa me maaso, nsaad mbu tǝn tomsǝ ɓa, tǝn tom me tǝ weɗɗa me tǝn ɓan tom tinima Kaa ma ɓa. Tǝn tom maaso ma sǝmmo, ɗǝm ma wee kongsa wa, ɗǝm ma kuɗa teptepra dem. 5Ɓaa hoɓtǝn, ɓaa titǝ a hit neu ɓeta wa, ɓaa titǝ hunde a fer kisa wa, tǝ tom tinima u faɗsǝ kokrokto waato wa, ɗǝm tǝn taa munda ra, ɗǝm tǝn taa mbuseya ra. 6Ma lau pengpengra huurtu ra, ma maa mbuka tǝsǝ ma siso wa, ma sǝmmo ɗǝm ke ma tom mbu kwalari ɓa, tǝ weɗɗan me tǝn ɓan tom tinima Kaa ɓa, ma lau Wis Ɗekɗek wa, ɗǝm ma lau yauta ta u teno wa, 7ma matamse waato u ɓongtǝra wa, ɗǝm ma kwangto Kaa wa. Tom mbu yǝsǝ keke a wiiyo a Kaa ni ɓa, ndǝ siso mbu kito ɓǝta u tǝ masǝ a nem seya ya ma nem kwasa ya wa. 8Ɓan natǝ mbarta, ɓan titǝ tǝ kang mbu nhuura ɓa, ɓan minitǝ, ɗǝm ɓan nkeetǝ matamse u tǝblǝ ɗǝnda wa. Nga ɓaa kangtǝsǝ ɓan para ɓa wa, ding siso tǝn nkee ɓongtǝra. 9Nga ɓaa maatǝ ra, si ɓaa maatǝn ɓong. Nga taa ee woɗɗa ya, ding siso, tǝ ma huurtu. Ɓan hoɓtǝ, pa ɓaa toɗtǝ ra. 10A taarǝma ɗaan, tǝn taa mbu hur kuɗa ɓa. Hana ka tǝ sem ma mbuka ke ra, ding siso, tǝ ti ɓeta dem ɓǝ tom kǝnaa. Nga taase tǝ sem ma mbuka ke ra, pa mbusa nsaad ndǝ waato.
11Saa ɓaa Korintiyawa ɓa, tǝ nhuukǝsǝ mbuka ke ra, ɗǝm tǝ weɗɗan me tǝ ma yauta saa dem. 12Ai, sem taase tǝ mbisisǝ tǝsǝ na yauta taa wa ra, pa ndǝ saase sǝ mbisisǝ sǝtǝ na yauta saa wa. 13Nǝn kan ma saase nga Paapa yǝn kansǝ ma emɓisa wa, saase kǝn, sǝtǝ weɗɗa me sǝn yautǝ.
Sǝ tǝmba ɗuura ma ɓaa ɓǝ bǝɗɗa Kaa ra ɓara
14Sǝ kong tǝmba ɗuura ma ɓaa ɓǝ bǝɗɗa Kaa ra ɓara. Yaa yǝn tomsǝ mbu yǝsǝ keke a wiiyo a Kaa ni ɓa, kiyǝ nkaa yǝ tom kaɗɗo ma eɗ kwalakwala yau? Kǝ tomtomni yaa yǝsǝ a han ɗekɗekto ɓa ma yaa yǝsǝ a han teptepto ɓa ya, ɓǝ tom siktǝrau? 15Ko Almaseho ǝn sik Shaitan yau? Ko ǝn mbi tǝmbasǝ ɓan bǝɗ Kaa ɓa ma ɓaa ɓǝ bǝɗɗaa Kaa ra ɓau? 16Mbu tǝmba hit Kaa wa mbi, ma hit kwandamse wau? Ndase ndǝn hit Kaa yaa ma Huurtu ya. Nga Kaa nkeesǝ wa me, “Kǝnǝ kaɗ ke ma ɓosa, nǝ siki a ɗaaso ɓoso. Kǝnǝ kaɗ Kaa ɓosa, ɓosa kǝn, ɓǝ kaɗ ɓet ɓǝna.”
17“Me maaso sǝ fiɗ a ɗaaso ɓaa ɓǝ bǝɗɗaa Kaa ra ɓa,
sǝ nweerǝ ee waaso a ɓoni,
Ankundi yǝ nkee sase.
Sǝ kong ntee mbu yǝsǝ sem ɗekɗek ra ɓa,
ma lau maaso wa, kǝnǝsǝn kon wa.”
18“Kǝnǝ kaɗ Paapa a saani,
saase kǝn sǝ kaɗ em ɓǝna parata ma toona,
Ankundi Yaa ma Kwangto nsaad ya, yǝ nkee sase.”
Currently Selected:
2 Korantiyawa 6: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
