1 KOR 8

Mbuseya ɓaa nǝngsǝ men kwandamse ɓa

1Waso, a ɗuura mbuseya ɓaa nǝngsǝ men kwandamse ɓa, ndǝ maan me nsaad ndǝ ma maa mbuka wa. Maa mbuka wa ɗǝm ǝn wo ma too ɗuura wa, pa yauta yǝn sokǝ kokrokto a naɓongtǝra wa. 2Nsaad yaa yǝn wǝrsǝ nga yǝ maa mbukan ya, ding waso, yǝ maa mbu pamsǝ me kama yǝ maa ɓa ra. 3Pa hanan yamni yaa yǝ sǝ ma yauta Kaa ta ya, Kaa yǝ maasǝn.

4Waso, a ɗuura se mbuseya ɓaa nǝngsǝ men kwandamse ɓa, ndǝ maan me, nsaad a put taandi wa, kwanda yǝn mbukake ra, ɗǝm ndǝ maan me, Kaa fin, u ko sem ɗǝm ra. 5Hanaka, u ko ɓan yar ɓǝsǝ me “wisa” u ɓoti a liura wa ma u a put taandi wa, me ǝn tumoto, wisa ma ankundimse ɓǝ kǝn dem, 6pa nsaad siso, waato a tani, Kaa fin, u yǝn Kaa paapa ya, yaa mbusa nsaad fiɗsǝ a sanii ya, ɗǝm yaa ndǝn ɗanyǝsǝ men sase ya, ɗǝm Ankundi fin, Yeso Almaseho, yaa mbusa nsaad fiɗsǝ ma lau usu ya, ndase kǝn ma lau usu ndǝn ɗanyǝsǝ wa.

7Pa sem ɓeta nsaad ɓǝ maasǝ maaso wa ra, me ding waso, ɓaata ɓaa ɓǝ solsǝ ma nyoo kwandamse ɓa, ɓǝn sen me mbuseya ɓǝn sesǝ ɓa, ǝn mbuseya ɓaa nǝngsǝ men kwanda wa. Pa me senda ɓora kini sundu ra wa, ɓǝn wǝr nga ɓǝ tom tenatenaton ma lau mbuseya siso wa, pa ɓǝn taarǝ. 8Mbuseya yǝ ndǝ wo ngwang ma Kaa ra. Me ndǝ se ra, ndǝ hik mbuka ra, ɗǝm hana ndǝ sen, ndǝ sokǝ mbuka ra.

9Pa sǝ nhii nwaa, sǝ pǝta lee kaɗ hurhurto waaso siso, yǝ tom mbu kwiɗɗo ɓa a ɓaa ɓǝ kini ra ɓa. 10Me ɓaa senda ɓora kini ra ɓa, ɓǝ wǝr ngǝ, ngase ngǝsǝ ma maa mbuka wa ya, ngǝn se mbuseya a hit kwandamse wa, siso yǝɓǝ suɗ kǝn ɓǝ se mbuseya ɓaa nǝngsǝ men kwandamse ɓa rau? 11A tommo maaso wa, maa mbuka waango siso, kǝ kang mbu kwiɗɗo ate ɓa, yaa Almaseho yǝ woɗɗsǝ a ɗuura ira ya. 12Ma lau tom ɓaata tenatenato maaso wa, sǝn tom tenatenato Almaseho, sǝn ti ɓǝ rǝkata me senda kuɗa ɓora ra kini ra. 13Me maaso, me se mbuseya wa ǝn kwa ate yaane yǝ kwiɗɗi, nǝ pǝta se ntuu wa ra, me tom pa nǝ kwa ate yaane yǝ kwiɗ ɗa.

Currently Selected:

1 KOR 8: LLA

Highlight

Copy