1 KOR 16
16
Kwasira men ɓan bǝɗ Kaa ɓa
1To, a ɗuura mara kwasira men ɓan bǝɗ Kaa ɓa wa, sǝ tom nga nǝ nkeesǝ kwauwo ɓan bǝɗ Kaa Galatiya wa me ɓǝ tom wa. 2A kaa tǝro ntiiri lumu ɓa, hana nyamni yǝ kǝr mbuka yǝ tomma tiyoo, a mbu yǝn taasǝ ɓa, sem me nǝ won nhe pa aa ntii kwauwo ra. 3Pa me nǝ won, kǝnǝ timi ɓaa sǝ yausǝ ma ɓosa ɓa, ke ma nyorma me ɓaa ko ma kwauwo kwasira waaso Urshalima. 4Me pamman keke me nǝ ko, to, pa ɓǝ nǝ tung tǝ ko ke.
Werko siko wa
5Kǝnǝ wo a saani nɗiira nǝ leurǝsǝ put Makidoniya wa, me nǝn taa me kǝnǝ bǝɗ ma lau Makidoniya wa. 6Minda kǝnǝ kaɗ singgǝ a saani, ko kǝnǝ nkaa nǝ feɗ rara kǝnso, me sǝ nǝ tom kwasira a han nsaad nǝ kosǝ ɓa. 7Sem yauwo waano me nǝ sǝ wǝr waso nǝ taalǝ maɗ ra, men yauwo waano nǝ tom tǝro dem a saani, me Ankundi yǝ yauwan. 8Pa kǝnǝ nǝɗ Afisa aa kan kaa Fentikos ɓa, 9me ɓaa wilnǝ ɗǝɗa u tom tinima kwasira wa, hana ka ɓaatakera kǝn dem wa.
10Me Timoti yǝ won, sǝn ti yǝ kaɗ hurhur a ɗaaso waaso, me sase kǝn yǝn tom tinima Ankundi ma nga nǝn tomsǝ wa. 11Me maaso, yaake yaa kong mbisi kono ra, saa tung ma kwasira yǝ kang a nani, me nǝn sengge ɗǝɗa ira ke ma ɓaata.
12A ɗuura ate yaaɗe Afollos ra, nǝ kǝnasǝ dem me yǝ wo a sani ke ma pepere ɓaata ya. Sem ma yauwo usu yǝ wo waso ra, pa kiyǝ wo a fer yǝ taasǝ ɗǝɗa wa.
13Sǝ kaɗ ma waro, sǝ kweetǝ a naɓongtǝra waaso, sǝ tom ma naankwiiti wa, ɗǝm sǝ tom ma kokrokto. 14Aa lee sǝ tom mbu nsaad ɓa ma yauta.
15To, ɓaata ɓǝna, sǝ maan me, ɓet a ɗur Istifanus ɓa ndǝ ɓosa ntiiri ɓǝ ntiisǝ kon nfaata a put Akaya wa, ɓǝ na nkweera ɓora a tom tinima ɓan bǝɗ Kaa ɓa wa. 16Nǝn kǝnasǝ sǝ yau ee nkamǝra ɓet sǝsa ra, ɗǝm ma nsaad sika a tinima ndaa ma, ɗǝm ma kongsa ndaa. 17Nǝ kura nepton a wo Istifanus wan, ma Fartunatus wa, ma Akaikus wa, u tom nǝsǝ nga ndǝ saase sǝ wosǝ wa. 18Ɓosa ɓǝ hurnǝ kuɗan, ma saase nsaad. Nkamǝra ɓeta sǝsa pam me ɓǝ na mbarta.
Mara u feɗefeɗe wa
19Kwauwo ɓan bǝɗ Kaa ɓǝsǝ a put Asiya wa, ɓǝn toosǝ. Akila ma Biriskila, ke ma kwauwo ɓan bǝɗ Kaa ɓǝsǝ a ɗuur ɓoso ɓa, ɓǝn toosǝ dem ma lau Ankundi wa. 20Sǝ too ɓaatǝ ma nɗaa ɓaatǝ wa, nga em Kaa ɓa ɓǝn tomsǝ wa.
21Ən nase Bulus nǝn nyorsǝ tooma ma wa, ma nem nyaane.
22Nsaad yaa yǝ sem ma yauta Ankundi ra ya, yǝ kaɗ yaa ma meto ya. Ngawo Ankundi.
23Kwasira Ankundi yaande Yeso ra, yǝ kaɗ ke ma saase.
24Aa lee yauta na yǝ kaɗ ke ma saase ma lau Almaseho Yeso wa. Aa kaɗ maaso.
Currently Selected:
1 KOR 16: LLA
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
