1 KOR 13

Ɗǝɗa Yauta ra

1Hana kama kanǝ nkaa nǝ kan ma eeme ɓeta ya ma u ɓan timira Kaa ɓa wa, pa nǝ sem ma yauta ra, nǝ kaɗ nga kararawa u yǝn teesǝ dem wa, hana kwamkwam u yǝn teesǝ dem wa. 2Hana nǝ ma nawoo nawanto wa, ɗǝm nǝn nkaa nǝ maa mbu a nhuukǝra ɓa, ɗǝm nǝ ma maa mbuka wa nsaad, hana ɗǝm nǝ na ɓongtǝra u ka nkaa aa pǝɗ yola wa, pa me nǝ sem ma yauta ra, nǝn mbukake ra. 3Me kǝnǝ na mbu nǝsǝ ma siso ɓa nsaad hanhanta ɗǝm nǝ na maabiri yaane a kǝɗɗǝ, pa nǝ sem ma yauta ra, nǝ sem ma nsaa ra.

4Yaa yǝsǝ ma yauta ya, yǝ ma sǝmmo ɗǝm yǝ ma kuɗa yaɓ ra. Yaa yǝsǝ ma yauta ya, yǝ sem ma simbara ra, yǝ tomma nheura ra, yǝ sem ma too ɗuura wa ra. 5Yaa yǝsǝ ma yauta ya, yǝ mbisi nambarta ɓeta wa ra, yǝ tomma yau ɗuura wa ra, yǝ tomma nfiima naakǝn da, yǝ tiyaa ete a kuɗa ra. 6Yaa yǝsǝ ma yauta ya, yǝ hura kuɗa ma mbu kwalakwala ɓa ra, pa yǝn hur kuɗa a mbu ɓongtǝra ɓa. 7Yaa yǝsǝ ma yauta ya, yǝn sǝm ma hana mbi u ɓeta ɓǝ yamsǝ aa tommo ɓa, yǝn na ɓongtǝra hana a mbi. Yaa yǝsǝ ma yauta ya, yǝn ti kanggo ma hana a mbi, ɗǝm yǝn ti sǝmmo hana a mbi.

8Yauta yǝ fǝta feɗɗo ra. Pa nawanto wa kiyǝ talǝ, eeme ɓolɓol ya ɗǝm, kǝ tumu, maa mbuka wa kǝ feɗɗe. 9Ɓongtǝra, maambuka waando kung ra, ɗǝm nawanto waando kung ra. 10Pa a fer mbusa ka tom keke wa, yammo waando kǝ tumu. 11A fer nǝsǝ auwe wa, nǝn kan nga auwe, nǝn sen nga auwe, maa mbuka waano nga u auwe wa. Pa nǝ maasǝ ete wa, pa nǝ lee embato waano. 12Nga wa ndǝn wǝr fulnlaa nga ndǝn sengge a hurtu mbraa wa, pa kaa ɓisa kǝ ndǝ wǝr oota ma oota. Waso maa mbuka waano kung ra, pa a kaa ɓisa kǝnǝ maa nsaad nga Kaa yǝ maanǝsǝ wa. 13To, pa waso mbu taatǝn sǝ ɓa, ɓǝ fǝta tummo ra, u yǝ sǝn naɓongtǝra wa, ti kanggo wa, ma yauta. Pa nsaad u faɗsǝ mbarta a ɗaaso ɓoso wa, ndǝ sase yauta.

Currently Selected:

1 KOR 13: LLA

Highlight

Copy