SEFANIA 3
3
Uulunde waJerusalem nokuhupithwa kwasho
1Yayee Jerusalem, oshilando sha tangalala nosha shunduka, tashi hepeke aantu yasho! 2Itashi pulakene Omuwa nenge shi taambe omapukululo ge. Inashi tula einekelo lyasho mOmuwa nenge shi mu kugile ekwatho. 3Aambala yasho oya fa oonime tadhi pumbu; aatokolihapu yasho oya fa omambungu ga sa ondjala taga li nuufukedhi esipa gaaha adhe kungula. 4Aahunganeki oyo aakotokeli aakaanohenda; aayambi otaa nyateke shoka oshiyapuki notaa pilike ompango yaKalunga pamayele gawo yene. 5Ihe Omuwa oku li natango moshilando; ota longo shoka shu uka, iha gama kuuwinayi. Ongula kehe otu utha epangulo lye, itali kala inaali ya. Ihe natango aakolokoshi otaa tsikile niilonga yawo iiwinayi yo yaa na nando ohoni.
6Omuwa ota ti: “Onda kombo po iigwana ayihe. Onda yonagula po iilando yawo, omakuma gayo nooshungo dhayo odha teka po. Iilando oya mbugala; omapandaanda oge li owala — inapa kala nando omuntu. 7Onda dhiladhila, nena aantu yandje otaa simaneke ndje nokutaamba omageelo gandje, yaa dhimbwe nando omalombwelo gandje. Ihe mbalambala oya longo iihuna yowala.”
8Omuwa ota ti: “Tegeleleni! Tegeleleni esiku, uuna tandi thikama okupangula iigwana. Onda tokola okugongela iigwana niilongo, opo ndi yi ulukile oonkondo dhondjahi yandje. Evi alihe otali ka yonagulwa po komulilo gwondjahi yandje.
9“Nena otandi ka shitulula aantu yiigwana, notaa ka galikana ndje ngame awike nohaikalunga yilwe. Ayehe otaa ka vulika kungame. 10Nokuli aantu yandje mboka ye li mehalakano muSudan, otaa ke etela ndje oondjambo. 11Pethimbo ndyoka, aantu yandje, itamu ka sa we ohoni, sho mwa li mwa tsa ondumbo nangame. Otii ka kutha po kehe ngoka ti itanga noti inomo, noitamu ka tsa we ondumbo nangame kondundu yandje ondjapuki. 12Aantu aaifupipiki naaishonopeki otandi ke ya kaleka po, mboka taa ya kungame okukonga ekwatho. 13Oshigwana shaIsrael shoka sha hupu ko, itashi ka ningila nando ogumwe uuwinayi, itashi ka popya iifundja noitashi ka kambadhala okukotokela. Otaa ka kala ye na elago negameno, itaa ka tila nando osha.”
Eimbilo lyenyanyu
14Imbeni nokuyelutha ewi lyenyanyu, ne Aaisraeli!
Nyanyukwa nomutima aguhe, Jerusalem!
15Omuwa a hulitha po oku ku geela;
okwa kutha po aatondi yoye ayehe.
Omuwa, omukwaniilwa gwaIsrael,
oku li pungoye;
onkee ito pumbwa we okutila.
16Ethimbo otali ya,
ya ka tye kuJerusalem:
“Ino tila, shilando shaSion!
Ino etha, omaako goye ga yululuke!
17Omuwa Kalunga koye oku li pungoye;
oonkondo dhe otadhi ku pe esindano.
Omuwa okwe ku hokwa,
nomohole ye ote ku pe omwenyo omupe.
Oti imbi e te ku nyanyukilwa,
ta nyanyukwa ongaambo ye li moshituthi.”
18Omuwa ta ti:
“Onda hulitha omupya gwoye
note kutha po okushekwa kwoye!
19Ethimbo otali ya!
Otandi ka geela aathiminiki yoye;
otandi ka mangulula iilema ayihe,
naapongekwa otandi ya eta kegumbo.
Ohoni yawo otandi yi shitukitha esimano,
nuuyuni auhe otau ke ya tanga.
20Ethimbo otali ya!
Otandi ka kongololela aantu yeni kegumbo;
otandi mu simanekitha nuuyuni auhe,
notandi mu ningi aanelago ishewe.”
Omuwa oye e dhi popi.
Currently Selected:
SEFANIA 3: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.