OBADJA 1
1
1Ndika ehunganeko lyaObadja:
Omuwa Omupangeliawike ota lombwele oshigwana shaEdom.
Omuwa ota ka geela Edom
Omuwa okwa tumu omutumwa gwe kiigwana,
otse notu uvu oohapu dhe tadhi ti:
“Thikameni! Tu yeni, tu ka hingileni Edom iita!”
2Omuwa ota ti kuEdom:
“Otandi ke ku ninga oshimbembe,
noshaa ngoka ote ku dhini.
3Einomo lyoye otali ku ningilile mo.
Ngoye owa kala mohote yokondundu;
egumbo lyoye oli li kokule mokati koondundu;
onkee oto ilombwele e to ti:
‘Olye ando ta vulu okuhata ndje pevi?’
4Nonando wi itungile egumbo puule ongoshihandhila shekodhi,
shi fe ando shi li mokati koonyothi,
natango otandi ke ku hata pevi.
5“Aafuthi nge taa ya uusiku,
otaa yangata po owala ayihe mbyoka ya hala.
Aantu nge taa toonona ko omandjembele,
aluhe ohaa thigi ko omakukila.
Ihe aatondi yoye otaye ku kombo po thiluthilu.
6Oluvalo lwaEsau, omaliko geni oga yiwa nago.
7Aahangani nangoye oye ku kotokele;
oye ku tidha moshilongo shoye.
Aantu wa kala nombili nayo,
oye ku sinda.
Ookuume mboka mwa li iikulya pamwe nayo,
oye ku tegele omwigo;
otaye ku popi taa ti: ‘Oondunge dhe odhi li nee peni?’
8“Esiku tandi geele Edom,
otandi ka yona po aanandunge yawo
notandi ka thekeka po uunongo wawo.
9Oofule yokuTeman otaa ka kala yu uvite uugelele,
nomukwiita kehe muEdom ota ka dhipagwa.
Omatompelo okugeela Edom
10“Oshoka owa yugu nowa dhipaga aamwanyoko, oluvalo lwaJakob,
ngoye oto yonwa po nowa dhinika sigo aluhe.
11Oko wa li wa thikama pooha esiku ndyoka,
aatondi sho ya teyagula po omiyelo dhawo.
Owa li omwiinayi wa fa aakwiilongo mbeyaka
ya yugu po uuyamba waJerusalem
noye u topolelathana yo yene.
12Ino kala u uvite enyanyu
omolwomupya gwaamwanyoko muJuda!
Ino nyanyukwa mesiku lyeyonuko lyawo!
Ngoye ino keula omoluudhigu wawo!
13Ando kwa li inoo gwayela moshilando shaantu yandje,
u nyanyukilwe okuhepekwa kwawo
nokuyuga po uuyamba wawo mesiku lyuudhigu wawo!
14Ando kwa li inoo thikama poompagiila,
u kwate mboka taa yi ontuku!
Ando inoo ya gandja kaatondi mesiku lyuudhigu wawo!
Kalunga ota ka pangula iigwana
15“Esiku oli li popepi,
uuna ngame, Omuwa, tandi ka pangula iigwana.
Edom, shoka wa ningi, oto ke shi ningilwa.
Oto ka shunithilwa uuwinayi mboka wa ningi.
16Aantu yandje oya nu oshitenga oshilulu shegeelo kondundu yandje ondjapuki.
Ihe osho iigwana ayihe puushiinda,
otayi ka nwa oshitenga shegeelo shi vule sheni muululu;
otayi ke shi nwiilila e tayi ka kana po.
Esindano lyaIsrael
17“Ihe okondundu Sion yamwe taa ka hupa,
oyo notayi ka kala eha eyapuki.
Ezimo lyaJakob otali ka lala oshilongo,
shoka oshawo pautho.
18Ezimo lyaJakob nolyaJosef otaga ka kala ngomulilo;
otaga hanagula po ezimo lyaEsau,
ngaashi omulilo tagu fike po etutu.
Kape na nando oluvalo lwaEsau talu hupu ko.
Ongame Omuwa onde dhi ti.
19“Aantu taa zi kuumbugantu waJuda,
otaa ka kwata po Edom;
mboka taa zi kiikulundundu yokuuninginino,
otaa ka kwata po evi lyAafilisti;
Aaisraeli otaa ka lala oshitopolwa shaEfraim naSamaria;
Aabenjamin otaa ka kutha po Gilead.
20Aapongekwa ya zi kuumbangalantu waIsrael,
otaa ka galuka nokulala Foinikia, sigo oSarefat.
Aapongekwa Aajerusalem mboka ye li muSarefat,
otaa ka kwata po iilando yomuNegeb.
21Aasindani yokuJerusalem
otaa ka matukila Edom notaye shi pangele.
Omuwa oye mwenemwene ta ka kala omukwaniilwa.”
Currently Selected:
OBADJA 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.