MIKA 2
2
Uudhigu waamboka taa hepeke oohepele
1Akutu mboka haa lala ondangala nokudhiladhila okulonga uuwinayi. Uuna ongula tayi shi, otaa tsakanitha omadhiladhilo gawo omawinayi pompito ye ya opalela. 2Nge ya hala omapya, otaye ga kwata; uuna ya hala omagumbo, otaye ga kutha po. Kaku na ngoka egumbo lye nenge eliko lye tali hupu.
3Omuwa ota ti: “Otandi mu dhiladhilile oshiponga, noitamu ka vula oku shi henuka. Otamu ki imona owala mu li muudhigu, noitamu ke enda we nokwiithela. 4Ethimbo ndika nge tali ya, aantu otaye mu sheke nokwiimba eimbilo lyetyololoko tali holola shoka she mu adha:
Otwa teka po thilu!
Omuwa okwa kutha po evi lyetu
nokwe li pe mboka ye tu fala muupika.”
5Onkee ano ethimbo nge lya thikana, uuna evi li na okugalukila kaantu yOmuwa, mokati keni itamu ka kala nando ogumwe, ta pewa oshitopolwa shasha.
6Aantu otaa lombwele ndje taa ti: “Ino tu uvithila. Ino uvitha ayihe mbyoka. Kalunga ite ke tu geela nando. 7Oto dhiladhila kutya oshigwana shaIsrael osha thingwa? Omuwa ihi idhidhimike we? Ota ningi shili iinima mbyoka? Ita popi ando nombili kumboka haa longo uuyuuki?”
8Omuwa ota yamukula: “Otamu ponokele aantu yandje ngaatondi. Aalumentu taa galuka kolugodhi, otaa dhiladhila kutya otaa ka kala nawa pomagumbo, ihe omwa hala, mu ya yuge oondjatha komalutu gawo. 9Otamu tidha aakulukadhi yaantu yandje momagumbo gawo omaholike noyana omwe ya yugu eyambeko lyandje sigo aluhe. 10Thikameni, mu ye; mpaka kape na we egameno lyasha. Uulunde weni owe etele ehala ndika eyonuko.
11“Aantu mbaka oya hala omuhunganeki u udha iifundja nota kotokele ta ti: ‘Otandi mu hunganekele eloolo lyomaviinu niikwakunuwa.’ ”
12“Ihe otandi ke mu gongela, ne aantu amuhe yaIsrael mboka mwa hupu po. Otandi ke mu gongela, ngaashi oonzi tadhi ya koshigunda. Ngaashi omanapelo gu udha oonzi, evi lyeni otali ka kala lyu udha ishewe aantu polumwe.”
13Kalunga ote ke ya palela ondjila e te ya pititha mo muupika. Otaa ka teya omiyelo dhoshilando e taa yi yaa na mbudhi. Omukwaniilwa gwawo oye Omuwa mwene. Oye te ya wilike.
Currently Selected:
MIKA 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.