MATEUS 17

Jesus ta adhimithwa

(Mrk. 9:2-13; Luk. 9:28-36)

1Sho pwa piti omasiku gahamano, Jesus okwa kutha Petrus nosho wo aamwayinathana Jakob naJohannes e te ya fala kondundu ondeendeka, ye ki ikalele. 2Oye kwa shituluka montaneho yawo. Oshipala she osha adhima ngetango, noonguwo dhe odha yele dha fa uuyelele. 3Nena Moses naElia oye ya holokele noya kundathana naJesus. 4Petrus okwa lombwele Jesus e ta ti: “Omuwa, opwe tu opalela mpaka okukala. Ngele owa hala, otandi dhikile mpaka omatsali gatatu, limwe olyoye, limwe olyaMoses nalimwe olyaElia.”

5Ano manga ta popi, oshikogo shuuyelele oshe ya siikile. Ewi olya zi moshikogo lya ti: “Nguka Omumwandje omuholike nde mu hokwa, mu uveni!”

6Aalongwa sho ye li uvu, oyi ihata iipala yawo pevi ya tilililila. 7Jesus okwe ya kuyo nokwe ya gumu ta ti: “Thikameni, inamu tila.” 8Sho ya yelutha omeho gawo, inaa mona we nando omuntu, Jesus oye awike.

9Ano sho ya li taa kuluka kondundu, Jesus okwe ya kumagidha a ti: “Emoniko ndika inamu li hokololela nando omuntu, manga Omuna gwOmuntu inaa yumudhwa kuusi.”

10Aalongwa oye mu pula ya ti: “Omolwashike aalongimpango taa ti kutya Elia oye e na okuya tango?”

11Jesus okwe ya yamukula a ti: “Eeno, Elia ote ya nota ku ukitha ishewe ayihe. 12Ihe otandi mu lombwele: Elia okwi ile nokuli, ihe aantu inaye mu dhimbulula. Oyo ye mu ningile shaa shoka ya hala. Ano osho tuu nOmuna gwOmuntu ota hepekwa kuyo.”

13Aalongwa noyu uvu ko ihe kutya ote ya lombwele Johannes Omushashi.

Jesus ta aludha omunashintona

(Mrk. 9:14-29; Luk. 9:37-43a)

14Ano sho ya galukile kongundu yaantu, omulumentu gumwe okwe ya kuJesus e ta tsu oongolo koshipala she. 15Oye a ti: “Omuwa, sila ohenda omumwandje omumati e na oshintona nuuwehame owindji, oshoka olwindji ota gwile momulilo nomomeya. 16Onda li nde mu eta kaalongwa yoye, ihe oya nyengwa oku mu aludha.”

17Jesus okwa yamukula a ti: “Yayee aantu yopethimbo ndika, sho mwaa na eitaalo nomwa pilaala. Osigo uunake ndi kale pune? Osigo uunake ndi na oku mu idhidhimikila? Mu eteni nkuka kungame.” 18Jesus okwa ganda ompwidhuli, oyo noya zi muye. Omumati nokwa aluka pethimbo olyo tuu ndyoka.

19Sho yi ikalele, aalongwa oye ya kuJesus noye mu pula ya ti: “Omolwashike twa nyengwa oku yi tidha mo?”

20Oye a ti kuyo: “Omolweitaalo lyeni enkundi. Otandi mu lombwele: Andola mu na eitaalo li thike pomuma yosinapi, ando otamu vulu okulombwela ondundu ndjika: ‘Itumba po mpaka, u hedhe nkwiyaka!’ Ando tayi itumbu po; nokaku na shoka tashi mu nyenge.

21[“Ihe oludhi nduka ihalu tidhwa mo koshinima shilwe, okegalikano nokeidhiliko alike.”]

Jesus ta popi ishewe okuhepekwa kwe

(Mrk. 9:30-32; Luk. 9:43b-45)

22Ano aalongwa ayehe sho ya li ya gongala pamwe muGalilea, Jesus okwa ti kuyo: “Omuna gwOmuntu ota ka gandjwa miikaha yaantu. 23Oyo taye mu dhipaga, ihe esiku etitatu ota yumudhwa.”

Aalongwa oya si oluhodhi noonkondo.

Iimaliwa yotempeli

24Jesus naalongwa ye sho ya thiki kuKapernaum, aagongeli yiimaliwa yotempeli oye ya kuPetrus noya ti: “Omuhongi gweni oha futu tuu iimaliwa yotempeli?”

25Petrus okwa ti: “Oha futu.”

Ihe Petrus sho e ya megumbo, Jesus okwa tetekele oku mu pula a ti: “Oto ti ngiini, Simon? Aakwaniilwa yokombanda yevi ohaa pula kulye oompale nomafendelo, okoyana nenge okaathigona?”

26Petrus okwa yamukula a ti: “Okaathigona.”

Jesus okwa ti kuye: “Ano oyana oya manguluka. 27Ihe opo twaaye ya ningithe oomwenyo oombwinayi, inda kefuta, u umbile mo okandjolo. Kutha ohi ndjoka to yulu tango. Ngele wa makula okana kayo, oto mono mo oshimaliwa oshisiliveli. Shi kutha mo, u shi ya pe, shi ninge oompale dhetu nangoye.”

Currently Selected:

MATEUS 17: ONDB

Highlight

Copy