MATEUS 10

Aayapostoli omulongo nayaali

(Mrk. 3:13-19; Luk. 6:12-16)

1Jesus okwi ithana aayapostoli ye omulongo nayaali nokwe ya pe epangelo okutidha mo oombepo dha nyata nokwaaludha uuvu kehe noshigombo kehe. 2Omadhina gaayapostoli omulongo nayaali ogo ngaka: omutango oSimon, i ithanwa Petrus, nomumwayina Andreas; Jakob yaSebedeus nomumwayina Johannes; 3Filippus naBartolomeus; Tomas naMateus, omufendelithi; Jakob yaAlfeus naTaddeus; 4Simon, omulaadhi naJudas Iskariot, ngoka e mu gwaaleke.

Etumo lyaalongwa

(Mrk. 6:7-13; Luk. 9:1-6)

5Jesus okwa tumu mboka omulongo nayaali nokwe ya lombwele a ti: “Inamu ya kaapagani ne inamu ya moshilando nando oshimwe shAasamaria. 6Indeni tango koonzi ndhoka dha kana dhomAaisraeli. 7Mokweenda kweni uvitheni, mu ya lombwele mu tye: Oshilongo shegulu she ya popepi. 8Aludheni aavu, yumudheni aasi, pangeni aanashilundu, tidhii mo oompwidhuli. One mwa pewa oshindji omagano, gandjeni wo omagano. 9Inamu humbata iimaliwa yoshingoli nenge yoshiliveli nenge yoshikushu moondjato dheni; 10hampunda yokweenda nayo, hahema mbali, hangaku koompadhi nenge ondhimbo. Oshoka omulongi okwi ilongela okupewa iipalutha ye.

11“Ngele tamu yi moshilando shontumba nenge momukunda, puleni, olye e li mo e shi kwiinekelwa. Kaleni moka, sigo tamu ka huma ko. 12Ngele tamu yi megumbo, kundii mo. 13Egumbo ndyoka ngele oli shi kwiinekelwa, ombili yeni nayi kale mo, ihe ngele kali shi kwiinekelwa, ombili yeni nayi mu galukile. 14Nongele itamu taambwa, noohapu dheni itadhi pulakenwa, zii mo megumbo ndyoka nomoshilando shoka, ne mu pupule ko ontsi koompadhi dheni. 15Ngame otandi mu lombwele: Evi lyaSodom nolyaGomorra otali ningi ihwepo li vule oshilando shoka mesiku lyepangulo.”

Aalongwa taa tidhaganwa

(Mrk. 13:9-13; Luk. 21:12-17)

16“Ongame otandi mu tumu ongoonzi mokati komambungu. Kaleni ano mwa kotoka ongomayoka nongoonguti mwaa na okantongo. 17Kotokeni, oshoka aantu otaye ke mu gandja koompangu notaye ke mu dhenga noongola moosinagoga dhawo. 18Otamu ka falwa kiipala yomalenga noyaakwaniilwa omolwandje, shi ninge ompito yokuhokolola elaka etoye kuyo nokaapagani. 19Ihe ngele taye mu gandja ngeyi kaatokoli, inamu kala mu na oshimpwiyu kutya otamu ka popya shike, oshoka otamu pewa pethimbo tuu ndyoka shoka mu na oku shi popya. 20Oshoka hane tamu popi, ihe Ombepo yaHo ta popi mune.

21“Aantu aamwayinathana otaa ka gandjathana mokusa, noohe otaa gandja oyana. Aanona ota ka tsa ondumbo naakuluntu yawo notaye ya dhipaga. 22Otamu ka tondwa kwaayehe omolwandje. Ihe ngoka ti idhidhimike sigo ehulilo, oye ta hupithwa. 23Ngele taye mu tidhagana moshilando shontumba, tembukileni kushilwe. Ongame tandi mu lombwele: Itamu ka mana okulonga miilando ayihe yaIsrael, sigo Omuna gwOmuntu te ya.

24“Omulongwa ke vule omulongi gwe, nomupika ke vule mwene gwe. 25Osho opala, omulongwa ngele ta ningwa ngaashi omulongi gwe nomupika ngaashi mwene gwe. Mwene gwegumbo ngele oye mu ithana Belsebul, ano unene tuu aanegumbo osho taye ya ithana wo.”

Olye e na okutilika

(Luk. 12:2-7)

26“Ano inamu tila aantu, oshoka kaku na shoka sha siikilwa itaashi ka hololwa, naashoka sha holama itaashi ka tseyika. 27Shoka nde shi mu lombwele momilema, shi hokololeni puuyelele. Naashoka tamu shi uvu mokunongonenwa momakutsi, shi uvitheni kiihoko yoongulu. 28Inamu tila mboka taa dhipaga olutu, ihe itaa vulu okudhipaga omwenyo. Unene tileni Kalunga ngoka ta vulu okuyonagulila moheli omwenyo nolutu. 29Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile pevi, Ho ngele ina hala. 30Nomafufu geni agehe gokomutse oga yalulwa. 31Ano inamu tila: one mu vule omanza ogendji.”

Okuhempulula nokwiidhimbika Kristus

(Luk. 12:8-9)

32“Kehe tuu ngoka ta hempulula montaneho kutya ogwandje, nangame wo osho tandi ka ninga puTate megulu. 33Ngoka ti idhimbike ndje paantu, nangame wo otandi mu idhimbike puTate megulu.”

Hambili, ihe egongamwele

(Luk. 12:51-53; 14:26-27)

34“Inamu dhiladhila, ngame onde ya okweeta ombili kombanda yevi. Inandi ya okweeta ombili, ihe egongamwele. 35Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno. 36Aanegumbo yomuntu ngoka otaa ningi aatondi ye.”

37“Ngoka e hole he nenge yina e mu vulile ndje, oye ino opalela ndje. Ngoka e hole omwana omumati nenge omukadhona e mu vulile ndje, oye ino opalela ndje. 38Ngoka itaa humbata omushigakano gwe e ta landula ndje, oye ino opalela ndje. 39Oongoka ta kambadhala okuhupitha omwenyo gwe, ote gu kanitha, naangoka ta kanitha omwenyo gwe omolwandje, ote gu hupitha.”

Ondjambi

(Mrk. 9:41)

40“Ngoka te mu taamba, ota taamba ndje, naangoka ta taamba ndje, ota taamba ngoka a tumu ndje. 41Oongoka ta taamba omutumwa gwaKalunga molwaashoka oye omutumwa, ota mono ondjambi yomutumwa. Naangoka ta taamba omuntu omwiinekelwa molwaashoka oku shi kwiinekelwa, ota mono ondjambi yomwiinekelwa ngoka. 42Naangoka ta nwetha gumwe gwaambaka aafupi oshitenga shomeya omatalala molwaashoka oye omulongwa gwandje, ongame tandi mu lombwele, oye ita kala inaa mona ondjambi ye.”

Currently Selected:

MATEUS 10: ONDB

Highlight

Copy