JEREMIA 5
5
Uulunde waJerusalem
1Aajerusalem, matukileni momapandaanda geni!
Ligameneni akuhe! Italeni ne yene!
Kongeni omalandithilo!
Otamu vulu tuu okumona omuntu ta ningi nawa
nota kambadhala okwiinekela Kalunga?
Ngele osho, nena Omuwa ota ka dhimina po Jerusalem.
2Nonando tamu ti, otamu longele Omuwa,
itamu dhiladhila shoka tamu popi.
3Oshili, Omuwa ota tala uudhiginini.
Okwe mu dhenge, ihe inamu pupa ko;
okwe mu nyanyagula, ihe omwa tindi okunongela sha.
Omwa tangalala noinamu etha uulunde weni.
4Onda dhiladhila: “Mbaka oohepele dhowala naashamba.
Oye na uugoya; inaa tseya shoka Kalunga kawo ta pumbwa,
shoka Kalunga a hala ya ninge.
5Otandi hedha kaanenentu e tandi popi nayo.
Oshili, otaa tseya Kalunga shoka ta pumbwa,
shoka Omuwa a hala ya ninge.”
Ihe oye ekelehi epangelo lyOmuwa
noya tindi okuvulika kuye.
6Omolwashoka oonime tadhi ka hituluka momugulu, dhi ya lye po;
omambungu gomombuga otage ke ya ndimbula iintimbu,
noongwe otadhi ka hundjunina miilando yawo.
Aantu ngele otaa gwaya mo, otadhi ya tuula,
oshoka uulunde wawo wi indjipala,
esiku nesiku oya pilamene Kalunga.
7Omuwa okwa pula a ti:
“Omolwashike ndi dhimine po aantu yandje?
Oye etha ndje noya longele ookalunga yaa shi yoshili.
Onda palutha aantu yandje sigo ya kuta,
ihe oyo ya hondele noya kala momagumbo goohonda.
8Oya fa uukambe uutsezi wo ondoka wa nikula
taa haluka aakiintu yayakwawo.
9Ondi kale ando inaandi ya geelela iihuna mbika
nondaa konenene oshigwana miinima ya tya ngaaka?
10Otandi tumu aatondi ya ke po omiviinu dhaantu yandje,
ihe haku ya hanagula po sheke.
Otandi ya lombwele ya ponone ko iitayi,
oshoka iitayi mbyoka kayi shi yandje.
11Aaisraeli nAajuda oya gwaaleke ndje shili.
Ongame Omuwa nda popi.”
Omuwa te ekelehi Israel
12Aantu yOmuwa oye mu idhimbike ta ti: “Ita ka ninga sha! Itatu adhika koshiponga! Itatu adhika kiita nenge kondjala yekomba.” 13-14Oya ti, aahunganeki kaye na omwago, oohapu dhawo ombepo yowala, kaye na elaka lya za kOmuwa. Omuwa, Kalunga Omunankondoawike, okwa lombwele ndje a ti: “Jeremia, aantu sho taa popi iinima ya tya ngaaka, otandi ka tema oohapu dhandje dhi ninge omulilo mokana koye. Aantu otaa ningi ya fa iikuni, nomulilo otagu ya lungunitha po.”
15Aaisraeli ne, Omuwa ote eta oshigwana tashi zi kokule, shi mu matukile. Osho oshigwana oshinankondo noshikulu, shoka elaka lyasho inoo li tseya. 16Oondjumbeta dhasho odho aakwiita aanankondo taa dhipaga yaa na onge yasha. 17Otaa ka dhilagula po iilya yeni niikulya yeni; otaa ka dhipaga po aana yeni aamati naakadhona. Otaa ka tsela po iimuna yeni, oongombe niikombo. Otaa ka hanagula po omiviinu nomikwiyu dheni. Iilandohote yeni mbyoka mwi itula, otayi ka hanagulwa po kiita yawo.
18Omuwa ota ti: “Ihe nomomasiku ngoka wo itandi ke mu yonagula po thiluthilu. 19Aantu nge taa pula taa ti: ‘Omolwashike Omuwa Kalunga ketu a ningile aantu ye iinima ya tya ngaaka?’ Ya yamukula to ti: ‘Ngaashi mwi iteka ndje nomwa longele iikalunga iikwiilongo mevi lyeni yene, osho tamu ka longela aakwiilongo mevi lyaa shi lyeni.’ ”
Kalunga ta londodha aantu ye
20Omuwa ota ti: “Shi hokololeleni oluvalo lwaJakob, ne mu shi tseyithile Aajuda: 21Pulakena, shigwana ngoye oshigoya noshaa na oondunge. Ne omu na omeho, ihe kamu wete ko; omu na omakutsi, ihe kamu uvite ko. 22Ongame Omuwa, oshike ihaamu tila ndje? Omolwashike itaamu kakama koshipala shandje? Onda ndumbile ehekevi li ninge ongamba yefuta, ongamba yolela itaayi taakanwa we. Efuta otali vulu okufuluka, ihe itali vulu oku yi taaguluka. Omakuthikuthi otaga yaya, ihe itaga vulu okuwayuka mo. 23Ihe yantu ne! One aatangalali naanamanganga; omwa pilamene ko nomwa thigi ndje po. 24Inamu hala nando mu simaneke ndje, nando handi mu lokithile omvula yontemuna noyothinge nohandi mu pe eteyo omumvo kehe. 25Uulunde weni owe mu keelele uuwanawa mbuka auhe.
26“Aantu aawinayi oya kala mokati kaantu yandje. Otaa hondjunine ya fa aategi yoomwigo ya yule oondhila, ihe otaa lukile omatavu ya yule aantu. 27Naanaa ngaashi omukongo tu udha oshikuku she oondhila, osho yu udhitha omagumbo gawo nomaliko ga yugwa. Osho she ya ningi aanankondo naayamba. 28Oyo ondoka ya ndinda nawa. Miilonga yawo iiwinayi kamu na ongamba. Itaa uthile oothigwa pauyuuki nenge ya popile oohepele.
29“Ihe ngame Omuwa otandi ke ya geelela iihuna mbika, otandi ka kwatela oshigwana shika iikonene. 30Moshilongo omwa ningwa iihuna. 31Aahunganeki otaa hunganeke iifundja, aayambi otaa pangele pamalombwelo gaahunganeki, naantu yandje oye shi hole pahedhi ndjika. Ihe otaa ka ninga shike, ayihe nge ya hulu po?”
Currently Selected:
JEREMIA 5: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
