JEREMIA 40
40
Jeremia ta kala naGedalia
1Omuwa okwa popi nangame, sho elenga ekuluntu lyaalangeli Nebusaradan lya mangulula ndje muRama. Onda li nda tulwa momalyenge pamwe naantu mboka ya zile kuJerusalem naJuda, oomboka ya li ye na okufalwa oonkwatwa kuBabilon.
2Elenga ekuluntu olyi ikalekele ndje e tali ti: “Omuwa Kalunga koye okwa uthile ehala ndika oshiponga shika. 3Ngashingeyi okwa gwanitha shoka a tile ote shi ningi. Ayihe mbika oya ningwa, oshoka aantu yoye oya yono kOmuwa noinaa vulika kuye. 4Ngashingeyi otandi ku kutha omalyenge gomomaako e tandi ku mangulula. Ngele owa hala okuya kuBabilonia pamwe nangame, shi ninga, notandi ke ku sila oshimpwiyu. Ihe ngele ino hala okuya ko, kala po. Oto vulu okuhogolola, noto vulu okuya mpoka wa hala.”
5Manga inaandi yamukula, Nebusaradan okwa ti: “Shuna kuGedalia yaAhikam, omutekulu gwaShafan, ngoka omukwaniilwa gwaBabilonia e mu ningi omuleli gwaJuda. Oto vulu okukala naye, u kale mokati kaantu mbaka, nenge oto vulu okuya shaa mpoka pwe ku opalela.” Okwa pe ndje omagano niikulya, ndi ye nayo, nokwa laleke ndje, ndi ye nondjila yandje. 6Onda yi ndi ka kale puGedalia muMispa mokati kaantu mboka ya thigalele moshilongo.
Gedalia, Omuleli gwaJuda
(2 Aak. 25:22-24)
7Omalenga gamwe omajuda naakwiita mboka inaayi igandja, oya kundana kutya omukwaniilwa gwaBabilonia a langeke Gedalia a ninge omuleli gwoshilongo ye a tonatele ayehe mboka inaa falwa kuBabilon — oohepele dhomoshilongo. 8Ismael yaNetania, Johanan yaKarea, Seraia yaTanhumet, aana yaEfai yokuNetofa naJaazania gwokuMaaka oya yi pamwe naantu yawo kuGedalia kuMispa. 9Gedalia okwa ti kuyo: “Otandi mu lombwele kutya inamu tila mu igandje kAababilonia. Kaleni moshilongo shika, longeleni omukwaniilwa gwaBabilon, notamu kala nawa. 10Ngame mwene otandi kala muMispa notandi mu kalele po, uuna Aababilonia naa ke ya huka. Ihe ne otamu vulu okugongela nokupungula omaviinu, iiyimati nomagadhi gooholivi, ne mu kale momikunda mwe dhi lala.” 11Aaisraeli ayehe mboka ya li muMoab, Ammon, Edom nomiilongo yilwe, oyu uvu kutya omukwaniilwa gwaBabilonia okwa zimine Aajuda yamwe ya kale muJuda nokwa ningi Gedalia omuleli gwawo. 12Oya thigi po omahala ngoka ya li ya halakanene mo, e taa shuna kuJuda. Oye ya kuGedalia kuMispa, noya kolo omaviinu nokugongela iiyimati oyindji.
Gedalia ta dhipagwa
(2 Aak. 25:25-26)
13Konima yaambika Johanan yaKarea naawiliki yaakwiita mboka inaayi igandja, oye ya kuGedalia muMispa 14e taa ti kuye: “Ou shi shi tuu kutya Baalis, omukwaniilwa gwaAmmon, okwa tuma Ismael yaNetania e ku dhipage?” Ihe Gedalia ine shi itaala. 15Nena Johanan okwe mu lombwele muuwike ta ti: “Etha ndje, ndi ka dhipage Ismael, nokape na ngoka te shi tseya kutya olye e shi ningi. Omolwashike ta zimininwa e ku dhipage po? Shika otashi ka halakanitha Aajuda ayehe mboka ya gongala pungoye, notashi etele aantu ayehe mboka ya hupile muJuda, omupya.”
16Ihe Gedalia okwa yamukula a ti: “Ino shi ninga! Oto lundile Ismael.”
Currently Selected:
JEREMIA 40: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
