JEREMIA 38
38
Jeremia tu umbilwa momuthima
1Shefatia yaMattan, Gedalia yaPashhur, Jukal yaShelemia naPashhur yaMalkija oya kundana sho nda li tandi lombwele aantu kutya 2Omuwa okwa ti: “Shaa ngoka ta kala moshilando shika, ota ka dhipagelwa molugodhi nenge ta si kondjala nenge kelega. Ihe shaa ngoka ta piti mo noti igandja kAababilonia, ita ka dhipagwa; ote ki ilikolela omwenyo gwe.” 3Onda li wo tandi ya lombwele kutya Omuwa okwa ti: “Otandi ka gandja oshilando shika miikaha yetangakwiita lyaBabilon, oyo notaye shi kwata po.”
4Omalenga oga yi komukwaniilwa e taga ti: “Omulumentu nguka oku na okudhipagwa. Mokupopya iinima ya tya ngaaka ota tyololokitha aakwiita moshilando nosho wo aantu ayehe ye li mo. Ita kwatha aantu, ote ya hepeke owala.”
5Omukwaniilwa Sedekia okwa yamukula a ti: “Onawa, mu ningeni ngaashi mwa hala, itandi vulu oku mu keelela.” 6Oya kutha ndje po noya kulukithile ndje noongodhi momuthima gwomuna gwokombanda Malkija, ngoka gwa li kaagu na omeya, enono alike, nonda ningine menono.
7Ihe Omuetiopia Ebedmelek, omuthonwantu ngoka a li ha yakula muuwa, okwe shi uvu kutya oyu umbila ndje momuthima. Pethimbo ndyoka omukwaniilwa okwa li ta pulakene iihokolola posheelo shaBenjamin. 8Ebedmelek okwa yi ko e ta ti komukwaniilwa: 9“Nkeyama, aantu mbaka oya ningi nayi. Oya tula Jeremia momuthima; ota ka sila mo kondjala, oshoka moshilando kamu na we iikulya.” 10Omukwaniilwa okwa lombwele Ebedmelek a kuthe aalumentu yatatu, ya hile ndje mo momuthima, manga inaandi sa. 11Ebedmelek okwa yi naalumentu mboka koompungulo dhuuwa e ta kutha iilapi yimwe ya kulupa, mbyoka a kulukithile ndje yi li koongodhi. 12Okwa lombwele ndje, ndi tule iinyanyu mbyoka moonkwapa dhandje, opo oongodhi dhaa ehameke ndje. Onde shi ningi, 13oyo noya hili ndje mo momuthima. Konima yaambika onda kala molugumbo lwomalangelo.
Sedekia ta kundathana naJeremia lwahugunina
14Pethimbo ekwawo omukwaniilwa Sedekia okwi ithanene ndje kuye posheelo oshititatu shotempeli e ta ti: “Otandi ke ku pula epulo, ihe onda hala u lombwele ndje oshililela.”
15Onda yamukula nda ti: “Ngele otandi ku lombwele oshililela, oto ka dhipaga ndje, nongele otandi ku tsu omayele, ngoye ito pupu ko nando.”
16Omukwaniilwa Sedekia okwa uvanekele ndje ongumitila a ti: “Otandi gana kuKalunga omunamwenyo, Kalunga ngoka e tu pa omwenyo kutya itandi ke ku dhipaga nando nenge ndi ku gandje miikaha yaantu mboka ya hala oku ku dhipaga.”
17Onda hokololele Sedekia kutya Omuwa Omunankondoawike, Kalunga kaIsrael, okwa ti: “Ngele oto igandja miikaha yomalenga gomukwaniilwa gwaBabilon, omwenyo gwoye otagu ka hupithwa, noshilando shika itashi ka fikwa po. Amuhe noyaandjeni otamu ka hupithwa. 18Ihe ngele ito igandja, oshilando shika otashi ka gandjwa miikaha yAababilonia, notaye ke shi fika po. Nangoye wo ito hunuka mo miikaha yawo.”
19Omukwaniilwa okwa yamukula a ti: “Onda tila Aajuda mboka ya yi kAababilonia. Ote ningi ndi gandjwe miikaha yawo notaa ka hepeka ndje.”
20Onda ti: “Ito ka gandjwa miikaha yawo. Otandi ku galikana, u vulike kelaka lyOmuwa; nena oto kala nawa, nomwenyo gwoye otagu hupithwa. 21Omuwa okwa hololele ndje memoniko shoka tashi ka ningwa, ngele to tindi okwiigandja. 22Onda mono kutya aakiintu ayehe ya thigala muuwa waJuda, otaa falwa ya ye komalenga gomukwaniilwa gwaBabilon. Pulakena shoka taa ti, sho taa yi:
‘Ookuume komukwaniilwa oye mu pukitha,
oye mu gwililile po.
Ngashingeyi oompadhi dhe odha ningine menono,
ookuume ke oye mu thigi po.’ ”
23Onda gwedha ko nda ti: “Aakulukadhi yoye ayehe pamwe naanona otaa ka falwa kuBabilon, nangoye mwene ito ka hunuka mo miikaha yawo. Oto ka kwatwa po onkwatwa komukwaniilwa gwaBabilon, noshilando shika otashi ka fikwa po.”
24Sedekia okwa yamukula a ti: “Ino yakela ko tuu nando omuntu koonkundathana ndhika; ngele to shi ningi, oto si. 25Omalenga ngele ge shi uvu kutya otwa kundathana nangoye, otage ke ya notaga pula shoka twa li tatu popi. Otaga ka uvaneka kutya itage ku dhipaga, ngele to ga hokololele adhihe. 26Ga lombwela kutya owa galikana ndje, ndaaye ku shune we mondjedhililo, u sile mo.” 27Omalenga oge ya noga pula ndje, nonde ga lombwele naanaa shoka omukwaniilwa a lombwele ndje ndi popye. Kaga li we taga vulu sha shilwe, oshoka kaku na ngoka u uvu oonkundathana dhetu. 28Onda kala molugumbo lwomalangelo, sigo Jerusalem sha kwatwa po.
Currently Selected:
JEREMIA 38: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
