JEREMIA 36
36
Embo lyopomimvo 605-604
1Momumvo omutine Jehoiakim yaJosia sho a li omukwaniilwa gwaJuda, Omuwa okwa lombwele ndje a ti: 2“Kutha ondhinga yembo, u nyolele mo adhihe ndhoka nde ku lombwele kombinga yaIsrael naJuda niigwana ayihe. Nyola adhihe nde dhi ku lombwele okuza ketameko muuyuni waJosia sigo onena. 3Ngiika Aajuda nge taa uvu ehanagulo alihe ndyoka nda hala oku ya etela, otaa pilamene oondjila dhawo oombwinayi. Ongame note dhimi po uukolokoshi nuulunde wawo.”
4Ondi ithana Baruk yaNerija nonde mu hokololele adhihe ndhoka Omuwa a lombwele ndje. Baruk nokwe dhi nyolele adhihe mondhinga yembo. 5Onda lombwele ihe Baruk nda ti: “Itandi ziminwa we ndi ye motempeli. 6Onda hala u ye mo esiku lyanofu, aantu sho tayi idhilike iikulya. Ya leshela mokule oohapu ndhika dhOmuwa e dhi lombwele ndje, ngaashi nde dhi ku hokololele. Dhi leshela Aajuda ayehe; ayehe mboka taa zi kiilando yawo, oye na oku dhi uva. 7Pamwe taa ka galikana Omuwa notaye etha oondjila dhawo oombwinayi, oshoka Omuwa ota hala okugeela aantu mbaka nondjahi onene nongeyo ye ya hwama.” 8Baruk okwa leshele oohapu dhOmuwa motempeli naanaa ngaashi nde mu lombwele, e shi ninge.
9Momwedhi omutimugoyi gwomumvo omutitano Jehoiakim sho a li omukwaniilwa gwaJuda, Aajerusalem ayehe naantu ayehe mboka ya zi kiilando yaJuda, oya hiywa okwiidhilika iikulya, opo ya geulukithe Omuwa. 10Nena Baruk okwe ya leshele motempeli oohapu adhihe ndhoka nde mu lombwele. Osha ningwa moshinyanga shaGemarja, omuna gwamushangampangu Shafan. Oshinyanga she osha li mehale lyopombanda popepi nOsheelo oshipe shotempeli.
Ondhinga yembo tayi leshelwa omalenga
11Mikaia yaGemarja, omutekulu gwaShafan, okwa uvu Baruk ta lesha mondhinga yembo shoka Omuwa a popi. 12Okwa yi muuwa moshinyanga shamushangampangu, moka omalenga agehe ga li taga pulakene iihokolola. Amushangampangu Elishama, Delaja yaShemaja, Elnatan lyaAkbor, Gemarja yaShafan, Sedekia yaHanania nomalenga omakwawo omo ga li. 13Mikaia okwe ya lombwele adhihe e dhi uvu dha leshelwa aantu kuBaruk. 14Nena omalenga oga tumu Jehudi yaNetania (omutekulu gwaShelemia, omutekulululwa gwaKushi), a ka lombwele Baruk e etelele ondhinga yembo ndjoka a leshele aantu. Baruk okwe ya etele ondhinga yembo. 15Oya ti: “Kuutumba u tu leshele wo.” Baruk nokwe shi ningi. 16Sho a mana okulesha, oya talathana mehaluko noya ti kuBaruk: “Oohapu ndhoka adhihe otu na oku dhi lombwela omukwaniilwa.” 17Oye mu pula ya ti: “Tu lombwela utale, owa nyola ngiini oohapu adhihe ndhika? Owe dhi lombwelwa kuJeremia?”
18Baruk okwa yamukula a ti: “Jeremia oye e dhi lombwele ndje adhihe, ongame nonde dhi nyolele nohinga mondhinga yembo ndika.”
19Omalenga oga ti kuye: “Indeni mu ka holame ne amuhe naJeremia. Inamu tseyika nando okomuntu mpoka mu li.”
Omukwaniilwa ta fike po ondhinga yembo
20Omalenga oga tula ondhinga yembo moshinyanga shamushangampangu Elishama e taga yi koshinyanga shomukwaniilwa, nkoka ye mu hokololele adhihe. 21Omukwaniilwa okwa tumu Jehudi a ka tale ko ondhinga yembo. Okwe yi kutha moshinyanga shaElishama e te yi leshele omukwaniilwa nomalenga agehe ngoka ga li ga thikama ge mu kunduka. 22Okwa li okufu, nomukwaniilwa okwa li a kuutumba pomulilo gwomakala moshinyanga shokufu. 23Jehudi shampa tuu a lesha ko iimpungu itatu nge ine, omukwaniilwa okwe yi lefula ko nokambele e te yi umbile momulilo. Okwa tsikile, sigo ondhinga yembo ayihe ya fikwa po. 24Ihe kakwa li nando ogumwe a haluka nenge a se oluhodhi, ongele omukwaniilwa mwene nenge omalenga, sho yu uvu adhihe ndhika. 25Nando Elnatan, Delaja naGemarja ya galikana omukwaniilwa kaa fike po ondhinga yembo, ine ya pulakena nando. 26Okwa lombwele omuna gwokombanda Jerakmeel, pamwe naSeraia yaAsriel naShelemia yaAbdeel, ya kwate omunyoli Baruk nomuhunganeki Jeremia. Ihe Omuwa okwe tu holeke.
Jeremia ta nyola ondhinga yembo yilwe
27Omukwaniilwa Jehoiakim sho a fike po ondhinga yembo ndjoka nda li nda totomonene Baruk, Omuwa okwa lombwele ndje, 28ndi kuthe ondhinga yembo yilwe nondi nyolele mo oohapu adhihe dha li mondhinga yembo yotango, ndjoka omukwaniilwa gwaJuda Jehoiakim a fike po. 29Omuwa okwa lombwele ndje, ndi lombwele omukwaniilwa ndi tye: “Owa fike po ondhinga yembo nowa pula Jeremia kutya omolwashike a nyola ta ti, omukwaniilwa gwaBabilonia ote ya nokuhanagula po oshilongo shika nokudhipaga aantu yasho niinamwenyo. 30Onkee ano ngashingeyi ngame, Omuwa, tandi ku lombwele tandi ti, ngoye omukwaniilwa Jehoiakim ito ka kala u na oluvalo talu lele muukwaniilwa waDavid. Omudhimba gwoye otagu ka ekelwahi gu ka anekwe muupyu womutenya nomuutalala wombambi yuusiku. 31Otandi ke ku geela, oluvalo lwoye nomalenga goye omoluulunde auhe we u ningi. Ngoye mwene, Aajerusalem nAajuda inamu pulakena omalondodho gandje. Onkee otandi mu undulile omupya aguhe nde gu mu sheyele.”
32Onda kutha ondhinga yembo yilwe e tandi yi pe amushanga gwandje Baruk. Okwa nyolele mo adhihe ndhoka nde mu lombwele. Okwa nyola adhihe ndhoka dha li mondhinga yembo yotango ya fikwa po kuJehoiakim, omukwaniilwa gwaJuda. Omwa gwedhelwa oohapu odhindji dha fa oonkwawo.
Currently Selected:
JEREMIA 36: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
