JEREMIA 22
22
Epangulo lyaakwaniilwa
1-2Omuwa okwa lombwele ndje, ndi ye kuuwa womukwaniilwa gwaJuda, oluvalo lwaDavid, ndi ka lombwele omukwaniilwa, omalenga ge nAajerusalem, ya pulakene shoka Omuwa a popi ta ti: 3“Ongame, Omuwa, tandi mu lombwele mu longe shoka oshiwanawa noshu uka. Hupitheni omuyugwa miikaha yomuyugi. Inamu ngwandjagula nenge mu hepeke aakwiilongo, oothigwa nenge aaselekadhi, ne inamu dhipagela aantu yaa na ondjo mehala ndika eyapuki. 4Ngele otamu ningi shili, ngaashi nde mu lombwele, nena oluvalo lwaDavid otalu ka tsikila okukala muukwaniilwa. Noyo ayehe kumwe nomalenga gawo naantu yawo otaa tsikile okupitila miiyelo yuuwa ye li momatembakwiita noya kayila uukambe. 5Ihe ngele itamu vulika komalombwelo gandje, nena otandi mu ganene kutya uuwa mbuka otau ka teka po. Ongame, Omuwa, nda popi.
6“Sho te tala uuwa waJuda, owo opalela ndje wa fa oshilongo Gilead nowa fa oondundu dhaLibanon; ihe otandi u ningi ehala lyaa na aantu. 7Otandi tumu aantu ye u hanagule po. Ayehe otaye etelele omakuya gawo, otaa keke po omiti omisendeli notaye dhi umbile meziko.
8“Aantu yomiigwana oyindji otaa ka pitilila po poshilando shika notaa pulathana taa ti: ‘Omolwashike Omuwa a ningile ngeyi oshilando shika oshinene?’ 9Eyamukulo otali ka kala: ‘Oshoka oye etha ehangano lyOmuwa, Kalunga kawo, e taa simaneke nokulongela ookalunga yalwe.’ ”
Joahas ta hunganekwa
10Aajuda ne, inamu lila omusi Josia; inamu sila oluhodhi ngoka a ka lala nale. Ihe lileni omwanamati Joahas; otaye ke mu fala ko, noita galuka ko we, nevi a valelwa mo, ite ke li mona we. 11Omuwa ota popi Joahas yaJosia, ngoka a landula he muukwaniilwa waJuda ta ti: “Okwa yi a yililila, ita galuka we. 12Ota ka sila moshilongo shoka a falwa, noita ka mona we oshilongo shika.”
Jehoiakim ta hunganekwa
13Yaye ngoka ta tungitha uuwa we uukolokoshi,
nomafilitsa ge uugoyoki.
Ota longitha omukwawo osima
noita gandja ondjambi yaaniilonga ye.
14Yaye ngoka ta popi ta ti:
“Otandi ki itungila ongulumbala yi na efilitsa lyomala ga andjuka.”
Ota tungile mo omakende,
ote yi ambeke nomisendeli
e te yi painda nuutiligane.
15Ou shi, otashi ku ningi omukwaniilwa wa za ko,
nge wa tungu uuwa womisendeli,
egumbo ewanawa li vule galwe?
Ho okwa li inaa hepa iikulya niikunuwa,
ihe okwa longo shoka shu uka nosho opala,
naayihe oye ende nawa.
16Okwa popile oohepele naakweyi moontamanana;
naayihe oye ende nawa.
Shika otashi ti okutseya Omuwa.
17Ihe ngoye oho lalakanene okutaneka owala eliko lyoye mwene,
okutilahi ombinzi yaakaanandjo
nokuthindila nonyanya aantu yoye pevi.
Omuwa oye a popi.
18Onkee ano Omuwa ta popi Jehoiakim yaJosia, omukwaniilwa gwaJuda, ta ti:
“Kaku na ngoka ta ka lila oosa dhe ta ti:
‘Akutu, tatekulu, akwetse, mentu gwameme!’
Kaku na ngoka te ke mu lila nenge a popye a tye:
‘Akutu shime, akwetse Nkeyama!’
19Ota ka fumvikwa a fa okasino taka kookololwa po
e taka dhogelwa handiyaka yiiyelo yaJerusalem.”
Ekumbu lyAajerusalem
20YAjerusalem, londeni kuLibanon mu kugagane,
indeni koshilongo Baasha mu igidhe;
kololokeni koondundu dhaMoab,
oshoka ookuume keni ayehe oya dhengwa.
21Omuwa okwe mu lombwele nale, manga mu li meloolo,
ihe ne omwa tindi okupulakena.
Shika osho hamu ningi aluhe mokukala kweni;
ne ihamu vulika kOmuwa.
22Aawiliki yeni otaa ka pepwa po kombepo,
ookuume keni otaa ka kwatwa po miita,
oshilando sheni otashi shundulwa nokusa ohoni,
omoluuwinayi mboka mwa ningi.
23Owa kala megumbo lyomisendeli dhaLibanon,
lya fa oshihandhila shokuvululukilwa mo.
Oto ka fudhagana ngiini,
uuna uuwehame tau ku kalukile,
nuudhigu wa fa womukulukadhi ta thetwa.
Jehoiakin ta hunganekwa
24Omuwa okwa lombwele omukwaniilwa gwaJuda Jehoiakin yaJehoiakim ta ti: “Oshili, ngaashi ndi na omwenyo, nando u kale okalinga koshihako koshikaha shandje shokolulyo, otandi ku hukula ko. 25Otandi ku gandja kaantu mboka we ya tila, oomboka ya hala oku ku dhipaga. Otandi ke ku gandja miikaha yaNebukadnezzar, omukwaniilwa gwaBabilon, noyaakwiita ye. 26Otandi ke mu umbila ne nanyoko muupongekwa koshilongo hoka inaamu valelwa ko, noko tamu ka sila amuhe. 27Oshilongo shika shondjuulukwe yeni itamu shi mono we, itamu galukile we kusho.”
28Omulumentu nguka Jehoiakin okwa ningi nani a dhinika, a fa oshiyuma sha tatuka noshe ekelwahi, inaashi halika we? Omolwashike a dhogwa pamwe noyana, u umbilwa moshilongo kee shi shi? 29Evi, evi, evi! Pulakena oohapu dhOmuwa! 30Omuwa ota popi ta ti:
“Ndhindhilikeni omulumentu nguka
a fa kee na oluvalo,
omuntu kee na elago mokukala kwe akuhe.
Kaku na nando ogumwe gwomoyana
ta kala e na elago lyokukuutumba koshipangelapundi shaDavid
ye a pangele we muJuda.”
Currently Selected:
JEREMIA 22: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
