JEREMIA 14
14
Oluteni olululu
1Oohapu ndhika dhOmuwa dha lombwelwa Jeremia, otadhi popi oluteni:
2“Juda ota lilagana;
iilando ye oya shunduka,
aantu ye oya mbwata pevi moluhodhi,
naJerusalem ta kugu onkugo.
3Aanamadhina taa tumu aapiya ya ka teke omeya.
Otaa yi kiitentemba, ihe itaa mono ko omeya.
Otaa galuka niiyuma yi li owala.
Oya tyololoka yo ya ngwangwana,
otaa holeke iipala yawo.
4Evi olya kalanda, oshoka oshilongo inashi lokwa.
Aanamapya naaniimuna oya haluka
notaa holeke iipala yawo.
5Oholongo onyali otayi thigi po okanimona kayo
molwoluhepo lwomwiidhi.
6Uusinokuti owa lontomana koondungu dhoondundu
tau fudhagana wa fa oombandje.
Owa tsika oshitanana, oshoka kau na uunapelo.
7Aantu yandje otaa kugile ndje taa ti:
‘Nando uulunde wetu u tu tompe,
Omuwa, tu kwatha, ngaashi wa uvaneka.
Otwe ku pilamene olwindji;
otwa yono kungoye.
8Omuwa, ongoye etegameno lyaIsrael;
ongoye omuhupithi gwetu methimbo lyiiponga.
Omolwashike wa fa omukwiilongo mevi lyetu,
wa fa omweendanandjila ngoka to penduka mo esiku limwe?
9Omolwashike wa fa omuntu a haluka,
wa fa omukwiita kee na oonkondo dhokukwatha?
Oshili, ongoye Omuwa to kala pamwe natse!
Otse aantu yoye;
ino tu thiga po nando.’ ”
10Aantu mbaka Omuwa ote ya popi ta ti: “Oye hole okunyekuka po pungame notaa nyengwa okwiipangela. Onkee ano inandi ya hokwa. Otandi dhimbulukwa omayono gawo notandi ya geele moluulunde wawo.”
11Omuwa okwa lombwele ndje a ti: “Ino galikana ndje nando, ndi kwathe aantu mbaka. 12Nokuli nando naa idhilike iikulya, itandi ka pulakena onkugo yawo, nonando ya yambele ndje omafikilondjambo noondjambo dhiikulya, itandi ya hokwa nando. Otandi ke ya dhipagela miita, mondjala nomelega.”
13Ngame onda ti: “Omuwa Omupangelinkondoawike, owa tseya aahunganeki mboka taa lombwele aantu kutya itaku kala iita nenge ondjala, oshoka owu uvaneke kutya moshilongo otamu ka kala ombili.”
14Omuwa okwa yamukula a ti: “Aahunganeki mboka otaa popi iifundja medhina lyandje; ngame inandi ya tuma, inandi ya lombwela nenge ndi popye nayo. Omamoniko gawo inaga za kungame. Omahunganeko gawo kage na oshilonga, ogo omafafaeko gawo yene. 15Ongame Omuwa tandi ku lombwele shoka tandi ka ninga aahunganeki mboka inaandi ya tuma, ihe otaa hunganeke medhina lyandje kutya iita nondjala itayi ke ya mo moshilongo shika — otandi ke ya dhipagela miita nomondjala. 16Aantu mboka ye ya lombwele iinima mbika, otaa dhipagwa pahedhi ya faathana. Omidhimba dhawo otadhi ka umbilwa momapandaanda gaJerusalem, noitaku ka kala mboka taye dhi fumvike. Ayehe osho taa ka ningilwa ngaaka — aakiintu yawo, oyana aamati naakadhona. Otandi ke ya futithitha uulunde wawo.”
17Omuwa okwa lombwele ndje, ndi hokololele aantu oluhodhi lwandje ndi tye:
“Omeho gandje otaga pononoka omahodhi uusiku nomutenya.
Itandi etha okulila, oshoka aantu yandje oya tosholwa nayi
noya hendagulwa nayi.
18Nge te piti mo, ndi ye komalundu,
ote tala omidhimba dhaantu ya sile miita.
Nge tandi ya miilando, ote tala aantu ya sa kondjala.
Aahunganeki naayambi otaa yi koshilongo kaaye shi ko.”
Aantu taa galikana Omuwa
19Omuwa, owe ekelahi shilishili Juda?
Owa tonda nduno Aasioni?
Omolwashike we tu hende nayinayi ngeyi,
notatu nyengathana okupangwa?
Otwa tegelele ombili, ihe inatu yi mona;
otwa tegelele ealudho, ihe uumbanda wowala we ya po.
20Omuwa, tse otwa yona kungoye,
otatu hempulula oondjo dhetu nomayono gootatekulu.
21Molwedhina lyoye ino tu etha.
Ino sitha Jerusalem ohoni;
osho oshipangelapundi shoye shesimano.
Ino teya po ehangano we li hangana natse.
22Kaku na oshikalunga shaapagani
tashi vulu okulokitha omvula;
newangandjo lyo lyene ihali lokitha nando oshihomo shimwe.
Otwe ku inekela, Omuwa Kalunga ketu,
oshoka ongoye awike to longo mbika.
Currently Selected:
JEREMIA 14: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
