JESAJA EFALOMO
EFALOMO
Embo lyaJesaja olya lukilwa omuprofeti a simana ngoka a li muJerusalem pehulilo lyetata lyethelemumvo etihetatu, Kristus manga inaa valwa.
Embo olya topolwa miitopolwa iinene itatu:
1. Oontopolwa 1-39 odha zi kethimbo uuna Juda, oshikwaniilwalongo shokuumbugantu, sha li sha shololekwa koshilongo oshinankondo Assur. Jesaja okwa dhimbulula kutya oshiponga oshinene sha taalela Juda kasha li unene oonkondo dhaAssur, ihe okuyona nokwaavulika kwoshigwana, sho shaa na einekelo muye. Mokupopya nomiilonga ya yela, omuprofeti ota lombwele aantu naawiliki yawo ya kale aayuuki yo yaa na ontondo, note ya londodha kutya ngele itaa vulika kuKalunga, otashi ke ya etela omupya nehulopo. Jesaja okwa hunganeke wo ethimbo lyombili yuuyuni nolyokuholoka kwomuna gwaDavid ngoka omukwaniilwa a tegelelwa.
2. Oontopolwa 40-55 odha zi kethimbo aantu oyendji yomuJuda ya li muupongekwa muBabilon, ya li ya dhengwa pevi noyaa na etegameno. Omuprofeti okwa uvitha kutya Kalunga ota ka mangulula aantu ye note ke ya galulila kegumbo muJerusalem, ya tameke onkalamwenyo ompe. Enenedhiladhilo lya yela moontopolwa ndhika otali ti kutya Kalunga oye mwene gwehistoli (onakuziwa nonakuyiwa yuuyuni). Edhiladhilo lye kombinga yAaisraeli, olya kwatelela mo etumo lyawo mokati kiigwana yilwe. Abraham okwa lombwelwa kutya mungoye aantu ayehe otaa ka lalekwa nuuyamba (Gen 12:1). Otashi ti, muAbraham otamu ka za omuhupithi gwaantu ayehe kombanda yevi, Jesus Kristus. Ootekisti ndhoka tadhi popi “Omupiya gwOmuwa” odho dha simana membo ndika.
3. Oontopolwa 56-66 odha tumbulilwa aantu mboka ya galuka nale muupika noye li muJerusalem. Oya pumbwa ya shilipalekwe kutya Kalunga ota ka gwanitha omauvaneko ge koshigwana. Oshimpwiyu oshinene osha li kutya moshigwana mu monike uuyuuki ihe hantondo, okudhiginina Esabati, omayambo negalikano. Otekisti yi shi okutumbulwa oyo. 61:1-2, (oohapu dha longithwa kuJesus petameko lyiilonga ye okufatulula eithano) lye.
Elandulathano lyoshikalimo
Omalondodho nomauvaneko 1:1—12:6
Iigwana tayi geelwa 13:1—23:18
Kalunga ta pangula uuyuni 24:1—27:13
Omalondodho natango nomauvaneko 28:1—35:10
Omukwaniilwa gwaJuda naAssur 36:1—39:8
Omatumwalaka ge na euvaneko netegameno 40:1—55:13
Omalondodho nomauvaneko 56:1—66:24
Currently Selected:
JESAJA EFALOMO: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.