JESAJA 59
59
Omuhunganeki ta pangula uulunde waantu
1Inamu dhiladhila kutya Omuwa ota nyengwa oku mu hupitha nenge a thita omakutsi kaa uve, sho tamu galikana. 2Omolwomayono geni ite mu pulakene. Oondjo dheni odho dhe mu yoolola muKalunga keni, mwaa mone oshipala she. 3Iikaha yeni oya tiligana ombinzi, noonyala dheni odha nika omayono. Omilungu dheni otadhi popi iifundja, nelaka lyeni otali nongona omagwaaleko.
4Otamu yi koompangu, ihe kamu na uuyuuki. Otamu popile iifundja, opo mu kale nawa. Otamu ningi aasimba e tamu vala iihuna. 5Otamu utumanene omayi goshikoko notamu tungu omawiiwili. Ngoka ta li omayi ngoka, ota si; nongele limwe tali tendulwa, otamu zi epili. 6Omawiiwili kage shi kuzalwa, itamu vulu okwiisiikila nago. Iilonga yeni oyo iiwinayi, niikaha yeni oyu udha iikolokosha. 7Aluhe otamu matukile okulonga uuwinayi notamu endelele okutilahi ombinzi yomukeenandjo. Omadhiladhilo geni oga goyoka; ehanagulo oli li momapola geni. 8Itamu tseya ondjila yombili, nomoompadhi dheni kamu na uuyuuki. Omapola geni oga ngolyauka, nokape na ngoka e li mugo ta kala nombili.
Aantu taa hempulula oondjo dhawo
9Aantu otaa ti: “Ngashingeyi otu shi shi kutya omolwashike Kalunga itee tu hupitha miikaha yaamboka taye tu hepeke. Otwa tegamena uuyelele, ihe otatu lyanga momilema thokothoko. 10Otatu pwampwauka twa fa aaposi. Otatu lontauka omutenya twa fa tu li muusiku ongashika muuyuni womilema dheso. 11Otatu gono ngomamwanka, tatu kululula ngoonguti. Otatu kongo uuyuuki, ihe itatu u mono. Otwa hala emanguluko, ihe olya kala kokule.
12“Omuwa, omayono getu ngoka twa yono kungoye, ogendjigendji. Oondjo dhetu otadhi tu tamaneke. Omayono getu otage tu landula notwa tseya iilonga yetu iiwinayi. 13Otwa tsu ondumbo nangoye, otwe ku idhimbike notwa tindi oku ku landula. Otwa hepeke yalwe notwe ku pilamene. Meni lyetu otwa dhiladhila iifundja, nomakana getu oga popi iilombo. 14Okutokola kwomondjila otaku pegulwa po, nuuyuuki itau vulu okuhedha ko. Oshili otayi goyokithwa montaneho, nuuyuuki itau gwanithwa nando. 15Oshili oya pumba, naangoka te etha uuwinayi, ota yugwa.”
Omuwa ta ka mangulula aantu ye
Omuwa okwe shi tala nokwa geye, sho kaku na uuyuuki. 16Okwa tala nonkumwe kutya kakwa li nando oongoka ta kwatha aahepekwa. Omolwashoka ta longitha oonkondo dhe mwene, e ya mangulule noku ya pa esindano. 17Ota zala uuyuuki wa fa ehuuyanza, nesindano lya fa egala lyosheela. Oti izaleke iikonene ya fa omutsuhu noti ikuwikile muulaadhi wa fa elwaakani. 18Ota ka geela aatondi ye pailonga yawo, naamboka wo ya kala kokulekule. 19Otaye ke mu tila okuza kuuzilo sigo okuuninginino. Shaa ngoka ota tila oonkondo dhe oonene. Ote ya a fa efundja lyomulonga, ta tsinuka ko a fa oshikungulu shombepo.
20Omuwa ota lombwele aantu ye ta ti: “Otandi ke ya kuSion ndi mu popile nondi hupithe ayehe mboka yi itedhulula moondjo dhawo. 21Otandi ka hangana nane. Onde mu tilile Ombepo yandje nonde mu pe oohapu dhandje, dhi kale pune sigo aluhe. Okuza mpaka otamu ka vulika kungame nokulonga aana yeni noluvalo lwawo lu vulike kungame aluhe sigo aluhe.”
Currently Selected:
JESAJA 59: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
