JESAJA 52
52
Kalunga ta mangulula Jerusalem
1Penduka po! Eeno, yambuka po,
Sion! Izaleka oonkondo!
Inzandula mo monguwo yoye yoshituthi, Jerusalem,
ngoye oshilando oshiyapuki!
Aafukolume naantu ya nyata itaa ka pita we miiyelo yoye.
2Jerusalem, ipupula ontsi!
Yambuka mo montsi, u kuutumbe koshipangelapundi!
Idhitulula omalyenge mothingo yoye,
ngoye omukadhona onkwatwa Sion.
3Omuwa ota lombwele aantu ye ta ti: “Sho mwa ningi aapika, inamu landwa niimaliwa; osho tamu ka mangululwa pwaa na ofuto yasha. 4Aantu yandje oya yi tango kuEgipiti ya kale mo muundjendi; opo ihe Assur e ya kwata po koonkondo. 5Nongashingeyi muBabilonia osha ningwa sha faathana: one aapongekwa noinamu kulilwa nasha. Mboka taye mu pangele, otayi itanga yo tayi inomo notaa sheke edhina lyandje aluhe. 6Mesiku tali ya otamu ka tseya ndje kutya ongame Kalunga nonde shi mu lombwela.”
7Oompadhi odho opala ngiini
dhaangoka te ya ta zi koondundu te eta onkundana ombwanawa,
tu uvitha ombili!
Ota tseyitha elaka etoye lyehupitho e ta ti kuSion:
“Kalunga koye oye omukwaniilwa!”
8Pulakeneni!
Aalangeli yoshilando otaa yelutha omawi gawo,
oyo ayehe taa kugilile kenyanyu.
Oshoka oye wete Omuwa oshipala noshipala,
sho te ya ta galukile kuSion.
9Nyanyukweni mu kugilile mokule,
ne omakulukuma gaJerusalem,
oshoka Omuwa ota hekeleke aantu ye,
okwa hupitha Jerusalem.
10Omuwa ota longitha okwooko kwe okuyapuki
nota ka hupitha aantu ye,
nuuyuni auhe otau ke shi mona.
11Zii mo muBabilon! Shi thigeni po!
Inamu guma tuu shoka sha nyata!
Iyoololeni mo musho ne mu iyapule,
ne aahumbati yiiyuma yOmuwa.
12Itamu pumbwa okuza mo ompulukuta,
itamu zi mo ontuku,
oshoka Omuwa ote mu tetekelele,
Kalunga kaIsrael te mu wilike.
Ehepeko nesimano lyomupiya gwOmuwa
13Tala, omupiya gwandje ota ka hepuluka;
ota ka yelwa pombanda,
ta simanekwa nokutumbalekwa unene.
14Oyendji oya li ye mu halukila,
oshoka olupe lwe olwa li lwa shituka,
inalu fa we lwaantu;
ondjelo ye oya tutuka,
inayi fa we yaana yaantu.
15Ihe iigwana oyindji otayi mu kuminwa,
naakwaniilwa otaye mu tsile omazima ya kumwa,
oshoka otaa ka tseya sha inaaye shi hokololelwa nale,
notaa ka uva ko shoka inaaye shi uva nale.
Currently Selected:
JESAJA 52: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
