JESAJA 48
48
Kalunga oye Omuwa gwonakuyiwa
1Pulakeneni ndhika, ne oluvalo lwaJakob,
one tuu mboka tamu tiwa Israel,
ne yomoludhi lwaJuda,
one mboka hamu gana medhina lyOmuwa
e tamu ithana Kalunga kaIsrael —
ihe itamu shi ningi moshili nomuuyuuki.
2Otamu iluku aanashilando oshiyapuki
nomwi itula Kalunga kaIsrael,
ngoka edhina lye Omuwa Omunankondoawike.
3Omuwa ota lombwele Israel ta ti:
“Onda hunganeke nale mbyoka tayi ka ningwa;
ohaluka onde yi gwanitha.
4Onda tseya kutya ngoye omutangalali,
omathenga goye ga fa ga ningwa mosheela
noshipala shoye omoshikushu.
5Onde ku hunganekele nale onakuyiwa yoye,
nda tomona iiningwanima, manga inaayi ningwa,
opo waa tye, iimenka yoye niiyelekela yoye oye yi eta po.
6“Ayihe nde yi popile, oya gwanithwa.
Zimina ashike kutya omahunganeko gandje oge li mondjila.
Ngashingeyi otandi ku lombwele iinima iipe tayi ke ya,
iiholekwa mbyoka inoo yi tseya nale.
7Ongashingeyi owala tandi yi longo,
kape na shimwe sha fa shika sha ningilwe nale.
Ngele nani oya ningilwe, oto vulu okutya owe yi tseya nale.
8Ondi shi shi kutya ngoye ku shi omwiinekelwa,
ngoye hela wa kala omupandala.
Omolwasho ino uva iinima mbika nale,
omolwasho kaku na nando ohapu yimwe ya yile momakutsi goye.
9“Ongame omutalanteni omolwedhina lyandje mwene.
Opo aantu ya pandule ndje,
otandi kankeke ondjahi yandje.
Onde yi lotitha, ndaaye ku hanagule po.
10Onde ku yeleke momulilo gwomahepeko,
ongoshisiliveli tashi hemuninwa montelekelo.
Ihe onda dhimbulula kutya ngoye ogwowala nani.
11Shoka tandi shi ningi,
otandi shi ningi molwandje mwene.
Itandi ka etha nando, edhina lyandje li shekwe,
nenge esimano lyandje li ye kugulwe.
Kores, omuwiliki a hogololwa kOmuwa
12“Pulakena ndje, oluvalo lwaJakob,
Israel, ngoye ngoka nde ku ithana.
Ongame Kalunga, omutango nomuhugunini,
Kalunga awike tuu ti.
13Oshikaha shandje osha dhike evi,
nolulyo lwandje lwa alele egulu.
Sho ndi ithana evi neyalelo,
oya holoka po polumwe yo yene.
14“One amuhe gongaleni, ne mu pulakene!
Oku na tuu kalunga, ngoka a hunganeke kutya
omuntu ngoka nda hogolola, ota ka homona Babilon?
Ota ka ninga shoka nda hala e shi ninge.
15Ongame awike nda popi nonde mu ithana;
onde mu pititha mo e tandi mu pe elago.
16Ngashingeyi hedheni kungame, mu uve shoka tandi ti:
‘Okuza ketameko inandi popya meholamo.
Oko nda li okuza kethimbo ndyoka mbika tayi ningwa.’ ”
(Ngashingeyi Omuwa Omupangeliawike okwa tumu ndje pamwe nOmbepo ye.)
Shoka Kalunga a nunina Israel
17Kalunga kaIsrael omuyapuki,
Omuwa omukulili gwoye ota ti:
“Ongame Omuwa Kalunga koye,
ngoka tii ku longele shoka she ku opalela
noku ku ulukila ondjila u na okweenda nayo.
18Ando to pulakene shili iipango yandje,
andola omayambeko otage ku kungulukile ga fa omulonga tagu tondoka omeya,
nuuyuuki otau tondokele kungoye wa fa omakuthikuthi gomefuta;
19Oluvalo lwoye otalu indjipala lwa fa omawe gehekevi,
naamwoye ongoomuma tadhi nyenge okuyalulwa.
Edhina lyawo itali ka kana,
itandi ke ya hanagula po.”
Eimbilo lyokutembuka muBabilon
20Pitii mo muBabilon,
tembukii mo muKaldea!
Igidheni onkundana yenyanyu;
yi tseyithileni apehepehe tamu ti:
“Omuwa a hupitha oshigwana she Israel!”
21Omuwa sho e enditha aantu ye
mombuga ya kalanda noyomutenya, oya li inaa sa enota.
Okwe ya kuthile omeya memanya:
okwa panda emanya, omeya noga tondoka mo.
22Omuwa ota ti:
“Aakaanakalunga kaye na nando ombili.”
Currently Selected:
JESAJA 48: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
