JESAJA 38
38
1Pomasiku ngeyaka Hiskia okwa kwatwa kuuvu uudhigu, konyala a se. Omuhanganeki Jesaja yaAmos okwa yi e ke mu talele po e ta ti kuye: “Omuwa ota ti: ‘Longekidha egumbo lyoye, oshoka ono si. Ito ka aluka we.’ ”
2Hiskia okwa pungulukile mekuma nokwa galikana: 3“Omuwa, dhimbulukwa kutya onde ku longele nuudhiginini neinekelo nonda kambadhala aluhe okuninga shoka she ku opalela.” Okwa lili nokulililila.
4Nena Omuwa okwa lombwele Jesaja 5a shune kuHiskia, e mu lombwele a tye: “Ongame Omuwa, Kalunga kahokulu David, ndu uvu egalikano lyoye nonda mono omahodhi goye. Otandi ke ku kaleka ko omimvo omulongo nantano u na omwenyo.
6“Otandi ku hupitha miikaha yomupangeli gwaAssur pamwe noshilando shika Jerusalem. Otandi ka popila oshilando shika.”
7Jesaja okwa yamukula a ti: “Omuwa ote ke ku pa endhindhiliko, a holole kutya ota dhiginine euvaneko lye. 8Omuwa ota ka shunitha omuzile monima oonkatu omulongo moshiulikithimbo shomukwaniilwa Ahas.” Omuzile nogwa shuna monima oonkatu omulongo.
9Hiskia sho a aluka kuuvu we, okwa nyola eimbilo ndika lyehambelelo:
10Onda dhiladhila kutya metifa lyokukalamwenyo kwandje
otandi ka kulukila muuyuni wokuusi
e tandi kuthwa ngaaka oshihupe shokukala ndi na omwenyo.
11Onda dhiladhila kutya itii ka mona we Omuwa,
eeno, Omuwa gwandje omevi lyaanamwenyo.
Itii ka ligamena we aana yaantu
nenge ndi kale pamwe naamboka ye li kombanda yevi ndika.
12Omwenyo gwandje ogwa kuthwa mo nogwa adha ehulilo.
Ongetsali lyaanahambo tali dhikulwa po,
ongoshiyata tashi tetwa moongodhi dhokoshitungitho,
sho sha pu okutungwa.
Onda dhiladhila kutya Kalunga ota hulitha ndje po.
13Uusiku auhe onda kugu kuuwehame,
oto ti onkoshi tayi kokota po omasipa gandje.
Onda dhiladhila kutya Kalunga ota hulitha ndje po.
14Otandi kululula ongonguti.
Omeho gandje oga ningi oshiwiwili, sho te ligamene kegulu.
Omuwa, ondi na uudhigu,
ila, u kwathe ndje!
15Otandi ti ngiini?
Nenge ondi mu lombwele shike?
Omwenyo gwandje ogwa lulilwa,
noite vulu nando okukotha.
16Omuwa, otandi ku kalele,
eeno, ongoye awike tuu!
Panga ndje ndi kale ndi na omwenyo.
17Tala, oluhodhi olululu olwa shitukile ndje elago.
Mohole yoye owa hupitha ndje,
owa hili ndje moshilambo shekano.
Oondjo dhandje adhihe ongoye we dhi umbile konima yoye.
18Oshoka ombila itayi vulu oku ku hambelela,
uusi itau ku tanga.
Mboka ya kulukile moshaasi,
ihaa inekele uudhiginini woye.
19Aanamwenyo, eeno, aanamwenyo
oyo taye ku hambelele,
ngashika ngame tandi shi ningi nena.
Oohe taa hokololele oyana oshili yoye.
20Omuwa, ongoye wa aludha ndje.
Otatu hiki uuharpa e tatu ku imbile omahambelelo
motempeli yoye omasiku getu agehe.
21Jesaja okwa lombwele omukwaniilwa a tule ekamina lyoonkwiyu poshitumbuka she, oye nota aluka. 22Omukwaniilwa Hiskia okwe mu pula a ti: “Endhindhiliko olini po tali ulike kutya otii ka vula okuya motempeli?”
Currently Selected:
JESAJA 38: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
