JESAJA 35
35
Enyanyu lyehupitho
1Ombuga nomalondo otaga ka nyanyukwa,
ontale otayi ka tundulukwa
nokutemuna oongala.
2Ombuga otayi ka imba nokuligola kenyanyu;
otayi ka opala ya fa oondundu dhaLibanon
notayi ka ondoka ya fa omapya gokuKarmel naSharon.
Aantu otaa mono eadhimo lyOmuwa,
otaa tala uunene noonkondo dhe.
3Kolekeni omaako ngoka ga vulwa
noongolo ndhoka dha loloka.
4Lombweleni ayehe mboka ya tyololoka tamu ti:
“Ikoleleni, inamu tila!”
Kalunga ote ya e mu mangulule,
ote ya a pangule aatondi yeni.
5Omeho gaaposi otaga ka tsikuluka,
nomakutsi goombolo otaga ka uva ko.
6Oshitiningili otashi ka nuka ngomenye,
nelaka lyoshikokoma otali imbi kenyanyu.
Omeya otaga ka tsipuka mombuga,
nomontale otamu ka tondoka omilonga.
7Ehekevi lya pupyala otali ka pola,
nomalondo otaga ka ninga omadhiya goothithiya.
Pokuma pwa li pwa kala oombandje,
otapa mene omwiidhi, oombungu nomanenge.
8Otaku ka kala onenendjila ya lukwa Ondjila ondjapuki.
Ondjila ndjoka ihayi endwa komulunde,
naangoka te ende nayo, iha puka nando na kale omugoya.
9Itamu ka kala oonime;
kape na iilikama iigeyi tayi tokola ondjila ndjoka.
Ayehe mboka Omuwa e ya mangulula,
otaa ka shuna kaandjawo nondjila ndjoka.
10Aakulilwa yOmuwa otaa ka galuka.
Otaa yi muSion nokuligola,
enyanyu lyaaluhe otali adhima miipala yawo.
Etunduluko nenyanyu olye ya kola,
oluhodhi nomayemato kage po we.
Currently Selected:
JESAJA 35: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
