JESAJA 33
33
Okukugila ekwatho
1Yaye aatondi yetu! Oya yugu noya kotokele, nando kaku na ngoka e ya yugu nenge e ya kotokele. Ihe ethimbo lyawo lyokuyuga nokukotokela otali hulu po, noyo yene taa ka ninga omulape gwokuyugwa nokukotokelwa.
2Omuwa, tu sila ohenda. Otwe ku inekela. Tu gamena esiku nesiku nou tu hupithe methimbo lyuudhigu. 3Uuna to tu kondjele, iigwana otayi yi ontuku oshihomo shiita. 4Omaliko gawo otaga nyantukwa nago koombahu, otaga yiwa nago koshiluku shomakamuti.
5Omuwa omunene ngiini! Oye ha pangele ayihe. Jerusalem ohe shi udhitha uuyuuki nuukwashili. Oha kolekele oshigwana omathimbo gasho. 6Aluhe ota popile aantu ye e te ya pe uunongo nomayele. Etilo okutila Omuwa olyo uuyamba waSion.
7Aalumentu oofule otaa kugu onkugo. Aakalelipo yoshilongo mboka taa kambadhala ye ete ombili, otaa kugu ya lulilwa. 8Oonenendjila odha mbugala, kape na we aayendanandjila. Omauvathano oga tewa, nomaziminathano oga yonagulwa. Kape na omuntu ta simanekwa we. 9Oshilongo osha polimana sha mbugala. Omakuti gaLibanon oga ganya po, esilu lyaSharon lyo ondoka olya fa owala ombuga, muBaasha nokuKarmel omafo otaga yagumuka ko komiti.
Omuwa ta londodha aatondi ye
10Omuwa ota lombwele iigwana ta ti: “Ngashingeyi otandi ikwatele ko. Otandi ka holola oonkondo dhandje kutya ongame lye. 11Otamu pangele oompangela dhaa na oshilonga naashihe tamu shi ningi, kashi na omwago. Ombepo yandje oya fa omulilo ngoka tagu mu lungunitha po. 12Otamu ka nyanyuka mwa fa omamanya gokaalaka taga fikwa, mwa fa omano taga tomekwa ga ninge omutoko. 13Ne mboka yokokule, uveni shoka nda longo; nane mboka yopopepi tseyeni oonkondo dhandje.”
14Aalunde yomuSion otaa kakama kehaluko. Otaa popi taa ti: “Epangulo lyaKalunga olya fa omulilo gwa tema sigo aluhe. Ope na tuu gumwe gwomutse ta ka hupa ko komulilo hagu lyana?” 15Otamu vulu okuhupa ko, ngele otamu popi notamu longo shoka shu uka. Inamu nyokoma oohepele noinamu taamba oombumbo. Inamu gama kumboka taa dhiladhila okudhipaga nenge okulonga uukolokoshi. 16Nena otamu ka kala mwaa na ombudhi yasha; otamu ka kala megameno mwa fa mu li mepopilongulu lya kola. Otamu ka kala mu na iikulya yokulya nomeya gokunwa.
Oshilongo shokomeho
17Oto ka mona ko omukwaniilwa meopalo lye ta lele oshilongo shoka sha taandela koombinga adhihedhihe. 18Uumbanda woye uukulu wokutila aafendelithi aakwiilongo naatonateli yooshungo otau ka kala owala momadhiladhilo. 19Ito ka mona we aakwiilongo aadhudhu mboka haa popi elaka ndyoka waa li shi. 20Tala utale Sion, oshilando moka hatu dhana iituthi yomalongelokalunga! Tala Jerusalem! Ehala olyevululuko ngiini lyokukala omuntu! Olya fa etsali ndyoka ihaali tenguka, oomboha dhalyo ihadhi dhikulwa mo noongodhi dhalyo ihadhi tokolwa. 21Omuwa ote ke tu ulukila eadhimo lye. Otatu ka kala pomilonga ominene nopomatondokelo gomeya, ihe oosikepa dhaatondi itadhi ka thayila mo. 22-23Oongodhi adhihe dhokooshumbu dhoosikepa odha yululuka, oothayila itadhi wapa okuyalalekwa! Otatu ka kwata po uuyamba auhe waakwiita aatondi yetu. Otaku ka kala oshindjishindji, noshilema otashi ka mona po oshitopolelwa shasho. Omuwa ye mwene ta ka ninga omukwaniilwa gwetu; oye te ke tu lela e te tu gamene. 24Kape na nando ogumwe muSion ta ka tya: “Otandi ehama.” Omayonagulo gawo agehe otaga ka dhimwa po.
Currently Selected:
JESAJA 33: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
