JESAJA 26

Ekandanga

1Esiku onali ya, uuna aantu taa ki imba ekandanga mevi lyaJuda taa ti:

“Oshilongo shetu osha kola!

Kalunga mwene ota gamene omakuma gasho!

2Egululeni iiyelo yoshilando,

opo oshigwana oshiyuuki shi ye mo,

oshigwana hashi dhiginine eitaalo.

3Omuwa, oho gandja ombililela

kumboka ihaa tenguka noye ku inekela.

4Inekeleni Omuwa sigo aluhe;

ote ke tu gamena aluhe.

5Okwa fupipike mboka ya li tayi inomo;

okwa kumuna po oshilando shawo sha kola,

nomakuma gasho okwe ga nyanyulile montsi.

6Otashi tampagulwa kaathiminikwa,

noompadhi dhaakweyi otadhi shi lyatagula.”

7Omuwa, ongoye to yelekanithile aayuuki ondjila;

ondjila ndjoka taa ende oya yelekana.

8Otatu landula ehalo lyoye notwe ku inekela;

etegameno lyomitima dhetu oli li medhina lyoye.

9Omwenyo gwandje ogwe ku yuulukwa uusiku,

moontundumene ombepo yandje tayi ku kongo.

Uuna to pangula evi naantu yalyo,

ayehe otaa ka koneka uuyuuki.

10Nando to sile aakolokoshi ohenda,

itaa koneke nando uuyuuki.

Moshilongo nando mu kale aayuuki,

aalunde otaa kolokosha owala;

otaa tindi okudhimbulula uunene woye.

11Aatondi yoye itaa tseya kutya oto ke ya geela.

Omuwa, ya sitha ohoni nou ya dhenge;

naa adhike kegeelo we li ya longekidhile.

Ya ulukila, nkene u hole aantu yoye.

12Omuwa, ongoye to tu pe elago;

ashihe shoka tatu tompola,

ongoye we shi tu ningile.

13Omuwa Kalunga ketu,

otwa pangelwa kaapangeli yalwe peha lyoye,

nando ongoye awike Omuwa gwetu.

14Ngashingeyi oya si noitaa ka kala we ye na omwenyo.

Oomwenyo dhawo oya topoka nadho,

itadhi ka yumuka we,

oshoka owe ya geele e to ya hanagula po.

Kape na we ngoka te ya dhimbulukwa.

15Omuwa, ongoye wi indjipalitha oshigwana shetu,

owa taandelitha oshilongo shasho koombinga adhihe,

naashika oshe ku etele esimano.

16Omuwa, ongoye wa geele aantu yoye,

nomuuwehame oye ku galikana.

17Omuwa, otwa keme kuudhigu

twa fa omukulukadhi e na oshitheta.

18Otwa li muuwehame woshitheta,

ihe mokuvala otwa fa twa vala ombepo.

Inatu mona esindano lyoshilongo shetu,

inatu tompola sha.

19Oonakusa yoye otaa ka ninga omwenyo ishewe!

Omidhimba dhawo otadhi ka yumuka.

Ayehe mboka ya kotha moombila,

otaa ka penduka nokwiimba ekandanga.

Ngashika omume tayi tutike evi,

osho Omuwa ta ka mwenyeka mboka ya sa nale.

Epangulo nehupitho

20Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po. 21Omuwa ote ya ta zi monkalelo ye, a geelele oonakukala kombanda yevi oondjo dhawo. Aadhipagi mboka ya dhipaga aantu meholamo kombanda yevi, otaa ka hololwa, nevi itali ka holeka we mboka ya dhipagwa.

Currently Selected:

JESAJA 26: ONDB

Highlight

Copy

Compare