JESAJA 24
24
Omuwa ta ka pangula evi
1Omuwa ota ka hanagula po evi e tali ningi eputu lyowala. Ota ka gonyagula evi e ta halakanitha aantu yalyo. 2Ayehe otaa ningilwa sha faathana: shomuyambi osho shomukwanegongalo, shomuhona osho shomupiya, shomulandithi osho shomulandi, shomulilwangunga osho shomulingunga, shomuyamba osho shohepele. 3Evi otali ka kombwa po e tali ka yugwa po. Omuwa okwa popya notashi ka tsakanithwa.
4Evi otali ka kaha notali ka kukuta; uuyuni auhe otau nongwa noonkondo; evi neyalelo otaga thithonoka po. 5Aantu oya nyateke evi mokuyona iipango yaKalunga nokutaaguluka ehangano lyaaluhe ndyoka a hangana nayo. 6Omolwashoka Omuwa okwa uthile evi etulomutima. Aantu yalyo otaa futilwa shoka ya longele. Aantu aashonashona mboka taa ka kala ye na omwenyo. 7Omiviinu otadhi ganya nomaviinu taga kala ga pumba. Shaa ngoka a li nale nawa, ngashingeyi okwa nika uupongo. 8Ehiko lyenyanyu lyuuharpa nolyoontunda dhawo olya mwena. 9Aantu itaa nu we omaviinu nokwiimba; omalovu oga lulila aanwi. 10Moshilando omu na evundakano, naantu momagumbo gawo otaa iyedhilile mo ya holame. 11Aantu otaa lilagana momapandaanda, oshoka kape na we omaviinu. Enyanyu olya kana po; olya tidhwa mo mevi. 12Oshilando osha kumunwa po nomiyelo dhasho odha teywa po. 13Shika otashi ningilwa iigwana ayihe ya kala kombanda yevi. Otashi ka kala sha fa ehulilo pethimbo lyeshopolo lyooholivi komiolivi nongetoonono lyomandjembele komiviinu.
14Mboka taa ka hupa ko, otaa ki imba kenyanyu. Mboka yokuuninginino otaa ka hempulula Omuwa omunene, 15naamboka yokuuzilo otaa ke mu tanga. Aantu mboka ya kunkula nefuta, otaa ka hambelela Omuwa Kalunga kaIsrael. 16Okuza kooha dhuuyuni otaku ka uvika omaimbilo taga tanga Israel, oshigwana oshiyuuki.
Ihe ngame onda ti: “Otandi thithonoka po, otandi thipuka po! Yaye ngame! Aagwaaleki taa tsikile okugwaaleka notaa vuka moku shi ninga.” 17Omahalutho, omakelo noomwigo otadhi mu tegelele, ne aakali kombanda yevi. 18Shaa ngoka ta kambadhala okufadhuka po ehalutho, ota gwile mekelo, naangoka ta zi mekelo, ota ka yulwa komwigo. Iikungulu yomvula otayi puuka kegulu, nomakankameno gevi otaga kakama. 19Evi otali ka pambuka e tali nyanyulwa po nokumwahuka. 20Evi lyo lyene otali ka tantala lya fa onkolwe notali pepwa po lya fa otenda yothayila moshikungulu. Uuyuni owa thindilwa pevi kuulunde wawo; otau ka gwila po, ihe itau ka yambuka po we.
21Ethimbo otali ya, uuna Omuwa ta pangula aanankondo yomewangandjo naakwaniilwa yevi pohi. 22Omuwa ota ka mbwinda mumwe aakwaniilwa ya fa oonkwatwa noku ya umbila melambo. Ote ya tula mondholongo, ya kale mo sigo ethimbo lyegeelo lyawo lya adha. 23Omwedhi otagu ka luudha, netango itali ka minikila we, oshoka Omuwa Omunankondoawike oye ta ka kala omukwaniilwa. Ota ka pangela muJerusalem kondundu Sion, naawiliki yoshigwana otaa ka tala eadhimo lye.
Currently Selected:
JESAJA 24: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
