JESAJA 18
18
Kalunga ta teya po Etiopia
1Pomilonga dhaEtiopia ope na oshilongo mpoka oshihomo shomawawa tashi uvika. 2Okuza koshilongo shoka oontumwa otadhi ende moowato dhomanenge muNiili. Galukileni kegumbo, ne oontumwa mu na ontuku! Faaleleni elaka koshilongo sheni sha kambakanwa komilonga, koshigwana sheni sha kola sho shi na omatha, kaantu yeni aaleeleka ye na oshipa tashi adhima, mboka taa tilika kuuyuni auhe.
3Pulakeneni, amuhe mboka mwa kala kombanda yevi! Taleni utale epandela tali yeluthwa koondungu dhoondundu! Pulakeneni ekugagano lyenkuma! 4Omuwa okwa lombwele ndje a ti: “Otandi ka entamena ndi li megulu ndi ilongelela nda fa omata gomume muusiku wopothinge, ndi ilongelela nda fa etango tali minikile moshanga shomutenya. 5Omandjembele manga inaaga toononwa, oongala sho dha yagumuka nomandjembele taga tiligana, aatondi otaa ka teya po Etiopia nuupu ya fa ombele tayi pompona ko iitayi komuviinu. 6Omidhimba dhaakwiita yawo otadhi ka thigilwa oondhila niithitukuti. Othinge otaa lika po komambiimbili nokufu okiithitukuti.”
7Esiku otali ya, uuna Omuwa Omunankondoawike ta ka taamba omayambo koshilongo shika sha kambakanwa komilonga, koshigwana shika sha kola noshinankondo, kaantu mbaka aaleeleka ye na oshipa tashi adhima, mboka haa tilika kuuyuni auhe. Otaa ke ya kondundu Sion, nkoka Omuwa Omunankondoawike ta simanekelwa.
Currently Selected:
JESAJA 18: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
