HESEKIEL 47
47
Omulonga tagu kunguluka okuza motempeli
1Omulumentu okwa shuna ndje muuyanda wotempeli. Omeya oga li taga zi kohi yuuyanda taga kungulukile lwokuuzilo, okombinga ndjoka otempeli ya taalela. Otaga zi kohi yombinga yuumbugantu wotempeli taga piti oshiyambelo kuumbugantu. 2Omulumentu okwa kutha ndje mo mehala lyotempeli twa pitile mosheelo shokuumbangalantu e ta fala ndje tatu kunkula otempeli pondje sigo okosheelo shoka sha taalela kuuzilo. Okalonga okashona oka li taka kunguluka mo kombinga yuumbugantu wosheelo. 3Omulumentu okwa yeleke noshiyelekithoshiti she oometa omathele gatano u uka lwokuuzilo, hoka omeya taga tondokele. Okwa lombwele ndje, ndi taaguluke okalonga. Omeya oga li ga tsa ndje poompando. 4Opo ihe a yeleke oometa dhilwe omathele gatano, omeya noga tsu ndje poongolo. Okwa yeleke ishewe oometa omathele gatano, omeya noga tsu ndje moshiya. 5Okwa yeleke ishewe oometa omathele gatano, omeya noga li omale, itandi vulu we oku ga taaguluka. Oga li omale oku ga tokola, shila onontente. 6Okwa lombwele ndje a ti: “Muna gwomuntu, ayihe mbika yi ndhindhilika nawa.”
Omulumentu okwa fala ndje ihe komunkulo gwomulonga. 7Sho nde ya ko, onda mono kutya okwa li ku na omiti odhindji kominkulo adhihe mbali. 8Okwa lombwele ndje a ti: “Omeya ngaka otaga tondoka moshilongo taga uka kuuzilo sigo okesilu lyaJordan nokEfuta lya sa. Omeya ngaka omayelele otaga lugulula omeya goshimongwa mEfuta lya sa. 9Shaa mpoka omulonga tagu tondoka, otapu ka kala omaludhi agehe giinamwenyo noohi. Omulonga otagu lugulula omeya gEfuta lya sa, noshaa mpoka taga tondoka, otaga fala po omwenyo. 10Okuza koothithiya dhaEn-gedi ondjila ayihe sigo oothithiya dhaEneglaim otaku ka kala aayuli yoohi komunkulo gwefuta, oyo notaa ka lukila iiyulitho yawo. Otaku ka kala oohi dhomaludhi ogendji ngaashi mEfuta lyopokati. 11Ihe omeya momatapa nomoondombe okukunkula nomunkulo itaga lugululwa. Otaga ka kala olunza lwomongwa. 12Komunkulo kehe gwomulonga otaku kala omiti dhomaludhi gi ili nogi ili tadhi imi iiyimati. Omafo gadho ihaga ganya, dho itadhi kuka. Otadhi imi iiyimati iipe omwedhi kehe, oshoka odha tosipalekwa komulonga ngoka tagu kunguluka okuza motempeli. Omiti otadhi gandja iikulya, nomafo gadho otaga aludha aantu.”
Oongamba dhoshilongo
13Omuwa Omupangeliawike okwa ti: “Oku na oongamba dhoshilongo shoka shi na okutopolelwa omazimo omulongo nagaali gaIsrael. Ezimo lyaJosef nali pewe iitopolwa iyali. 14Onda uvanekele oohokulu nokugana kutya otandi ya pe uuthiga wevi ndika; li topolelathaneni ngashingeyi.
15“Ongamba yokuumbangalantu otayi uka lwokuuzilo okuza kEfuta lyopokati sigo okoshilando Hetlon, ketaulilo lyaHamat, sigo oshilando Zedad, 16tayi yi kiilando Berota naSibrajim (oyi li pokati koshikandjo shoshilongo shaDamaskus noshikandjo shoshilongo shaHamat), sigo okoshilando Tikon (shi li pongamba yoshilongo Hauran). 17Ongamba yokuumbangalantu otayi zi ano kEfuta lyopokati yu uka lwokuuzilo koshilando Enon, manga iikandjo yopooha yaDamaskus naHamat yi li kuumbangalantu wayo.
18“Ongamba yokuuzilo otayi uka kuumbugantu ya za pokati koshikandjo shaDamaskus noshaHauran. Omulonga Jordan ogwo ongamba pokati kaIsrael naGilead, sigo oTamar kEfuta lya sa.
19“Ongamba yokuumbugantu otayi uka kuuningininombugantu okuza kuTamar sigo okomatope gaMeriba muKadesh. Okuza mpoka otayi uka kuuningininombangalantu ya kunkula nongamba yaEgipiti sigo kEfuta lyopokati.
20“Ongamba yokuuninginino oyo Efuta lyopokati sigo okehala ndyoka li li kuuninginino waHamat.
21“Topolelathaneni evi ndika ezimo nezimo; 22otali ningi uuthiga weni waaluhe. Aakwiilongo mboka ya kala mokati keni noye na aanona ya valelwa mo, naa mone wo oshitopolwa shawo shevi, uuna tamu li topola. Otaa ningwa ya fa Aaisraeli; otaa umbilwa iihogololitho omolwiitopolwa yevi pamwe nomazimo gaIsrael. 23Omukalimo kehe omukwiilongo ota mono oshitopolwa she pamwe naantu yezimo ndyoka a kala nalyo. Ongame, Omuwa Omupangeliawike, nda popi.”
Currently Selected:
HESEKIEL 47: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
