HESEKIEL 45
45
Oshitopolwa shoshilongo shOmuwa
1Uuna evi tali topolelwa omazimo, oshitopolwa shimwe nashi yapulilwe Omuwa. Oshi na okukala shookilometa omulongo nambali netata momukoka nookilometa omulongo momutamo. Ehala ndyoka alihe oli na okukala eyapuki. 2Mehala ndika omu na okukala eyana lyotempeli molupe lwombine yoometa 250 kombinga kehe, lya kundukwa kehala lyomwaka lyomutamo gwoometa omilongo mbali nantano. 3Yeleka etata lyoshitopolwa oshiyapuki, ehala lyookilometa omulongo nambali netata lwookilometa ntano; omo tamu kala otempeli, ehala ndyoka eyapukielela kwaagehe. 4Otashi ningi oshitopolwa oshiyapuki moshilongo, sha yoololelwa aayambi mboka haa longele Omuwa motempeli ye. Otashi kwatelele mo omagumbo gawo neyana lyotempeli. 5Etata ekwawo lyoshitopolwa oshiyapuki otali yoololelwa Aalevi mboka haa longo motempeli. Omo tamu kala omikunda dhawo dhokukala mo.
6Ontega noshitopolwa oshiyapuki oku na oshitopolwa shimwe shookilometa omulongo nambali netata momukoka nookilometa mbali netata momutamo. Otashi yoololelwa oshilando moka tamu kala Omuisraeli kehe.
Oshitopolwa shomuleli
7Omuleli gwoshilongo oku na okuyoololelwa oshitopolwa. Otashi ka taandela okuza kuuninginino woshitopolwa oshiyapuki sigo okEfuta lyopokati kuuninginino; nokuza kuuzilo washo sigo okongamba yoshilongo yokuuzilo. Omukoka gwasho nagu kale gu thike pomukoka gwoshitopolwa sha pewa ezimo limwe lyAaisraeli. 8Oshitopolwa shika osho shoka omuleli ta kala nasho mevi lyaIsrael, opo kaa thiminike we oshigwana, ihe a zimine oshihupe shoshilongo shi kale shomazimo gaIsrael.
Omautho kaaleli
9Omuwa Omupangeliawike okwa ti: “Aaleli ne yaIsrael, omwa yono unene! Hulitheni po uukolokoshi nomahepeko! Utheni eutho lyu uka nolyoshili. Inamu tidha we aantu yandje momapya gawo. Ongame, Omuwa Omupangeliawike, tandi shi mu lombwele.
10“Shaa ngoka na longithe iiviha niiyelekitho yi shi okwiinekelwa.
11“Oshiyelekitho efa, shoka hashi yeleke iipindomwa (iilya nuusila), nashi kale shi thike poshiyelekitho obat mokuyeleka iikunguluki. Ondjele yiiyelekitho oyo ohomer. Mohomer yimwe namu kale ooefa omulongo, osho wo oobat omulongo.
12“Iiviha yeni nayi kale ngeyi: oogera omilongo mbali otadhi ningi osekeli yimwe, noosekeli omilongo hamano otadhi ningi omina yimwe.
13“Omayambo geni naga ningwe pamuthika nguka: oshitihamano shimwe sheteyo kehe lyiilya yosiima noshitihamano shimwe sheteyo kehe lyiishokelya.
14“Mokor kehe yomagadhi gooholivi gandjeni oshitimulongo shimwe shobat. Obat osho oshiyelekitho shomagadhi; oobat omulongo otadhi ningi ohomer yimwe nenge okor yimwe.
15“Moshigunda kehe shoonzi omathele gaali dhi li momaunapelo gaIsrael omawanawa, namu ze onzi yimwe. Eteni oondjambo dhiikulya niimuna omolwomafikilondjambo nomakwatathanondjambo, opo oondjo dheni dhi dhimwe po. Ongame, Omuwa Omupangeliawike, nde shi utha.
16“Aantu ayehe yomoshilongo oye na okugandja omayambo ngaka komuleli gwaIsrael. 17Omuleli oku na oshimpwiyu omolwokufika omidhidhindjambo nomolwoondjambo dhiikulya nomaviinu miituthi yomwedhi omupe, mOmasabati nomiituthi ayihe yaIsrael. Ota gandja omayonondjambo, oondjambo dhiikulya, omafikilondjambo nomakwatathanondjambo gokudhima po oondjo dhAaisraeli.”
Iituthi
(Eks. 12:1-20; Lev. 23:33-43)
18Omuwa Omupangeliawike okwa ti: “Mesiku lyotango lyomwedhi gwotango omu na okuyamba ongombe ondumentu yaa na oshipo, mu yapule otempeli. 19Omuyambi na kuthe ombinzi yeyonondjambo ndika e te yi gwayeke piikulo yotempeli, komakuvu gane goshiyambelo nopiikulo yomiyelo dhokuya kehale lyaayambi. 20Mesiku etiheyali lyomwedhi omu na okuninga oshinima tuu shoka omolwashaangoka inaa yonena owina nenge e shi ningi mokwaashi wo. Pahedhi ndjika otamu yapula otempeli yi kale ondjapuki.
21“Mesiku etimulongo netine lyomwedhi gwotango otamu tameke okudhana oshituthi shOpaasa. Omasiku gaheyali amuhe otamu li iikwiila inaayi tulwa efulika. 22Mesiku lyotango lyoshituthi omuleli ota yamba ongombe yi ninge eyonondjambo omolwoondjo dhe nodhaantu ayehe. 23Esiku kehe lyomomasiku gaheyali goshituthi ota yambele Omuwa oongombe oondumentu heyali noonzi oondumentu heyali dhaa na oshipo noku dhi lungunitha po omudhidhi. Ota yamba wo oshikombo oshilumentu esiku kehe shi ninge eyonondjambo. 24Omolwongombe kehe nonzi kehe ndjoka tayi yambwa, otapu kala ondjambo yiilya yoolata omulongo naheyali netata nomagadhi gooholivi oolita ndatu.
25“Omolwoshituthi shomatsali giihwa iitalala, shoka tashi tameke mesiku etimulongo netitano lyomwedhi omutiheyali, omuleli ota yamba esiku kehe lyomomasiku gaheyali eyonondjambo, omafikilondjambo noondjambo dhiikulya nomagadhi gooholivi, ngaashi ha ningi moshituthi shOpaasa.”
Currently Selected:
HESEKIEL 45: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
