HESEKIEL 33
33
Kalunga ta langeke Hesekiel muulangeli
(Hes. 3:16-20)
1Omuwa okwa lombwele ndje a ti: 2“Muna gwomuntu, lombwela aantu shoka tashi ningwa, uuna tandi eta iita moshilongo. Aantu yoshilongo shoka otaa hogolola gumwe gwomongundu yawo, a ninge omulangeli. 3Uuna ta mono aatondi taa hedha ko, ota hiki ohiya, a londodhe shaa ngoka. 4Ngele oku na ngoka te yi uvu, ihe ita pupu ko, naatondi oye ya e taye mu dhipaga, nena oye e na ondjo yeso lye mwene. 5Eso lye olyo ondjo ye mwene, oshoka ina vulika kelondodho. Ando okwa pulakenene, ando a fadhuka po. 6Omulangeli ngele ota mono omutondi te ya, ye ita hiki ohiya, omutondi ote ya nota dhipaga aayoni mboka, ihe ombinzi yawo otandi yi pula miikaha yomulangeli.
7“Muna gwomuntu, ngashingeyi otandi ku langeke omulangeli gwoshigwana Israel. Ou na oku ya lombwela omalondodho ngoka nde ku pe. 8Ngele otandi ku lombwele te ti, omulunde ota ka sa, ihe ngoye ito mu londodha, a ethe oondjila dhe oombwinayi, opo a hupithe omwenyo gwe, nena ota ka sa shili moluulunde, nombinzi ye otandi yi pula miikaha yoye. 9Ngele oto londodha omulunde, ihe ite etha uulunde, ota ka sa omoluulunde we, ihe ngoye wa hupitha omwenyo gwoye.”
Shaa ngoka polwe mwene
10Omuwa okwa lombwele ndje a ti: “Muna gwomuntu, tumbululila Aaisraeli sho haa popi taa ti: ‘Otwa tsikwa uulunde wetu nomapuko ngoka twa ningi. Otatu kombwa po. Otatu kala, ngiini tu na omwenyo?’ 11Ya lombwela kutya oshili, ngaashi ngame, Omuwa Omupangeliawike, Kalunga omunamwenyo, itandi nyanyukilwa omulunde ta si. Onda hala, i itedhulule ye a kale e na omwenyo. Israel, etha uulunde to u ningi. Omolwashike wa hala okusa?
12“Muna gwomuntu, lombwela ngashingeyi Aaisraeli kutya omuyuuki ngele ta yono, uuyuuki mboka a longele itau mu hupitha. Omulunde ngele ote etha uulunde, ita ka pangulwa, nomuyuuki ngele ota tameke okuyona, omwenyo gwe itagu hupithwa. 13Ngele otandi lombwele omuyuuki kutya oku na omwenyo, ihe ota yono ta dhiladhila kutya uuyuuki we wonale owa gwana oku mu hupitha, itandi dhimbulukwa we uuyuuki we wonale. Ota ka sa moluulunde we. 14Ngele otandi londodha omulunde kutya ota ka sa, ye ote etha okuyona e ta kala omuyuuki — 15ngaashi ando, ngele ota galula shoka e shi pelwe ombambyona nota shunitha shoka a yakele — ngele ote etha okuyona e ta landula oompango ndhoka tadhi gandja omwenyo, ita ka sa, ihe ota kala e na omwenyo. 16Otandi ka dhima po uulunde e u longo nota kala e na omwenyo, oshoka okwa longa shoka shu uka noshiwanawa.
17“Aantu yoye ohaa ti, kandi li mondjila! Ihe otandi ti, yo oyo yaa li mondjila! 18Uuna omuyuuki te etha okulonga uuyuuki, e ta tameke okuyona, ota ka sa molwasho. 19Uuna omukeenakalunga te etha okuyona e ta longo uuyuuki nuuwanawa, okwa hupitha omwenyo gwe. 20Ihe Israel ngoye, oto ti shoka tandi ningi inashi uka. Otandi ke ku pangula pailonga yoye.”
Onkundana yetekopo lyaJerusalem
21Mesiku etitano lyomwedhi omutimulongo gwomumvo omutimulongo nomutiyali guupongekwa wetu, kungame okwe ya omuntu a zi ondapo kuJerusalem e ta lombwele ndje kutya oshilando osha teka po. 22Ongulohi ndjoka ya tetekele eyo lye, oshikaha shOmuwa osha kwata ndje. Omuntu sho a thiki ongula sho kwa shi, Omuwa okwa makula okana kandje ndi popye.
Oondjo dhaantu
23Omuwa okwa lombwele ndje a ti: 24“Muna gwomuntu, aantu mboka ye li momakulukuma giilando yaIsrael, otaa ti: ‘Abraham okwa li oye awike, sho a pewa evi alihe. Ngashingeyi tse oyendji, onkee evi lya ningi uuthiga wetu.’
25“Ya lombwela shoka ngame, Omuwa Omupangeliawike, tandi popi te ti: Ohamu li onyama yi na ombinzi. Ohamu simaneke iimenka. Ohamu dhipaga. Oshike tashi mu dhiladhilitha kutya evi olyeni? 26Omwi inekela omagongamwele geni. Iilonga yeni oyi nyanyalitha. Shaa ngoka ota hondele. Oshike tashi mu dhiladhilitha kutya evi olyeni?
27“Ya lombwela kutya ngame, Omuwa Omupangeliawike, otandi ya londodha kutya oshili ngaashi ngame Kalunga omunamwenyo, aantu mboka ye li momakulukuma giilando, otaa ka dhipagwa po. Mboka ya kala moshilongo, otaa ka lika po kiilikama. Mboka taa holama moondundu nomomakololo, otaa ka sa koshivu. 28Otandi ka mbugaleka oshilongo, nomanganga gawo guuntsa otaga hulu po. Noondundu dhaIsrael otadhi ka mbugala, nokaku na ngoka te ke dhi taakana. 29Uuna tandi geelele aantu oondjo dhawo nokumbugaleka oshilongo, nena otaa ka tseya kutya ongame Omuwa.”
Uunzapo wetumwalaka lyomuhunganeki
30Omuwa okwa popi a ti: “Muna gwomuntu, aantu yoye otaye ku popi, nge taa tsakanene pomakuma goshilando nenge piiyelo yomagumbo gawo. Otaa lombwelathana taa ti: ‘Tu yeni tu ka pulakene oohapu ndhoka dha zi kOmuwa ngashingeyi.’ 31Aantu yandje otaa gongala oongundu, ya uve shoka to popi, ihe itaa gwanitha shoka to ti. Otaa pulakene oohapu dhoye tadhi shata, ihe omitima dhawo otadhi lalakanene omaliko giifundja. 32Kuyo ku shi sha shilwe shaa shi omuholi gwokwiimba omaimbilo taga nyanyudha nenge okuhika okaharpa. Otaa pulakene oohapu dhoye adhihe, ihe itaa vulika nando okuyimwe yomudho. 33Ihe uuna oohapu dhoye nadhi ka tsa — odho notadhi ka tsa — nena otaa ka tseya kutya omuhunganeki okwa kala mokati kawo.”
Currently Selected:
HESEKIEL 33: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
