HESEKIEL 31
31
Omuti gwomusendeli
1Mesiku lyotango lyomwedhi omutitatu gwomumvo omutimulongo nogwotango guupongekwa wetu, Omuwa okwa lombwela ndje a ti: 2“Muna gwomuntu, lombwela omukwaniilwa gwaEgipiti naantu ayehe to ti:
Ngoye omunankondo ngiini!
Otandi ku yeleke nalye?
3Owa fa omusendeli muLibanon, gwiitayi yomuzile gwaalofu,
omuti gwa tsa miikogo.
4Ogwa kokithwa komeya,
omilonga dhokohi odhe gu palutha.
Odha tutike ehala lyomuti mpoka gwa mena.
Dha tondokitha omeya komiti adhihe dhomomugulu.
5Sho pwa li pwa tuta nawa,
ogwa koko omule gu vule adhihe.
Iitayi yagwo oya kola niile.
6Miitayi yagwo oondhila dhi ili nodhi ili
odha tungile mo iihandhila yadho.
Iiyamakuti oya valele momuzile gwagwo.
Iigwana yomuuyuni oya gondjo momuzile gwagwo.
7Omuti ogwa li gwo opala ngiini —
omule gu na iitayi iile.
Omidhi dhagwo odha tsa mevi muule, moonza dhomilongameya.
8Moshikunino shaKalunga
kamu na omusendeli tagu yelekwa nagwo.
Kaku na omukiperesi gu thike piitayi yagwo,
nenge omukwiyu tagu yelekwa niimpona yagwo.
Meopalo lyagwo ogu vule omiti adhihe moshikunino shaKalunga.
9Onde gu opaleke, niitayi ya yalalala.
Ogwa li gwa silwa efupa komiti adhihe muEden,
moshikunino shaKalunga.
10Ngashingeyi ngame, Omuwa Omupangeliawike, otandi mu lombwele shoka tashi ka ningiwa omuti nguka gwa koko, sigo gwa tsu kiikogo. Sho gwa ningi omule, ogwi itanga unene. 11Onkee onde gu ekelehi nokweetha omupangeli omukwiilongo e gu kwate po. Ota ka ninga nagwo, ngaashi gwi ilongele nuukolokoshi wagwo. 12Aakwiilongo yaa na ohenda otaye gu ke po e taye gu etha. Iitayi niimpona yagwo ya teka otayi ka gwila kondundu nomesilu kehe moshilongo. Iigwana ayihe mbyoka ya li momuzile gwagwo, otayi zi po e tayi yi. 13Oondhila otadhi ke ya notadhi lambele komuti gwa gwila pevi, niithitukuti otayi ka taaguluka iitayi yagwo. 14Ano okuza nena ndjika kaku na we omuti tagu ka koka gu ninge omule gwe gu fa nenge gu mbunyuke iitayi yi tse miikogo, nando gu tutikwe ngiini. Adhihe odha uthilwa eso dha fa omuntu nakukasa, dhi ye kumboka taa kulukile muuyuni wokuusi.”
15Omuwa Omupangeliawike ota popi ta ti: “Esiku ndyoka omuti nguka tagu yi muuyuni wokuusi, otandi ke gu siikilitha oonza dhomeya endhindhiliko lyokulila oosa. Otandi ka keelela omilonga noitandi pitika, oonza dhi kunguluke omeya. Molwaashoka omuti gwa si, otandi ka undulila oondundu dhaLibanon omilema notandi ka ganyitha omiti adhihe dhomomugulu. 16Uuna tandi gu tumine muuyuni wokuusi, ewalakato lyokugwapo kwagwo otali kakameke iigwana. Omiti adhihe muEden nomanyakwa agehe gomiti dha tekelwa nawa dhaLibanon ndhoka dha kulukile muuyuni womohi, otadhi ka hupuluthwa kekulukilomo lyagwo. 17Otadhi ka ya pamwe nagwo muuyuni wokuusi, dhi ka tsakanene naandhoka dha tetekele nale. Naayehe mboka ye li momuzile gwagwo, otaa ka halakanithilwa mokati kiigwana ayihe.
18“Omuti nguka ogwo omukwaniilwa gwaEgipiti pamwe naantu ye ayehe. Nomiti dhomuEden kadha li omile nomisimani. Ihe ngashingeyi ogwa fa omiti dhaEden, otagu ka kulukila muuyuni wokuusi gu tsakanene naakaanakalunga naamboka ya dhipagelwa molugodhi. Ongame nda popi.” Omuwa Omupangeliawike osho ta ti.
Currently Selected:
HESEKIEL 31: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
